၇.၄.၂၀၂၄
တၫ်ဒုးဆူၣ်လၢ ကညီကီၫ်စဲၣ်အပူၤ ထံလီၫ်ကီၫ်ပူၤပှၤလီၫ်အိၣ်ကမှံ(၇)ကလီၤဘျဲၣ်ဃၣ်ဃၣ်အဂီၫ် လိၣ်ဘၣ်တၫ်ဆီၣ်ထွဲမၤစၢၤတဖၣ်အဂ့ၫ် ပှၤဘၣ်ကီဘၣ်ခဲဒဲက၀ီၤ ပှၤဘၣ်မူဘၣ်ဒါတဖၣ်တဲ၀ဲန့ၣ်လီၤ.
တၫ်သဘံၣ်သဘုၣ်ဆူၣ်ထီၣ်လၢ ကီၫ်ပယီၤပူၤတၫ်စူၤခါအဆၢကတီၫ် ထံလီၫ်ကီၫ်ပူၤပှၤဘၣ်ကီဘၣ်ခဲအကကွဲၫ်တဖၣ် တဒိးန့ၫ်ဘၣ်တၫ်အီၣ်တၫ်အီလၢလၢလီၫ်လီၫ်ဘၣ်အဂ့ၫ် ဘီမုၫ်စၢဖှိၣ်ကရၢဘၣ်ထွဲတၫ်ဟ့ၣ်ဟီၣ်ခိၣ်ဖိတၫ်မၤစၢၤ တၫ်တၢၣ်ပီၣ်တဲသကိး၀ဲၤဒၢး(UNOCHA) ထုးထီၣ်ဟ့ၣ်ပလီၫ်ဃၣ်၀ဲ ဖဲလါယူၤလံ(၁)သီအနံၤန့ၣ်လီၤ.
မ့မ့ၫ်ကညီကီၫ်စဲၣ်ပူၤတခီ ထံလီၫ်ကီၫ်ပူၤပှၤလီၫ်အိၣ်ကမှံအိၣ်၀ဲ (၇)ကလီၤဘျဲၣ်ဃၣ်ဃၣ်အဂ့ၫ် ကညီဒီကလုာ်စၢဖှိၣ်ကရၢ(KNU) ဒီး ကညီပှၤဂ့ၫ်၀ီၤခွဲးယာ်ကရူၫ်(KHRG)ထုးထီၣ်ပာ်ဖျါဃၣ်၀ဲ တၫ်ကစီၣ်န့ၣ်လီၤ.
မမ့ၫ်လၢ သူမွဲကျိၤကၢၫ်နံၤအကပၤ ကမျၢၫ်လၢလဲၤအိၣ်ကဒူတဖၣ်အိၣ်၀ဲ(၅)ကထိဃၣ်ဃၣ်ဒီး တနီၤတခီလဲၤအိၣ်ကဒု၀ဲဒၣ် ဖဲကစၢၫ်ကလိဒီးပှၫ်ပူၤန့ၣ်လီၤ. တၫ်စူၤခါကတီၫ် ဘၣ်ကွၫ်ဆၢၣ်မဲာ်ဘၣ်ဒီးတၫ်ကီတၫ်ခဲတဖၣ်အဂ့ၫ်န့ၣ် ပှၤဘၣ်မူဘၣ်ဒါတဂၤလၢအမၤစၢၤ သူမွဲကျိၤအကပၤ ပလီးတပိပှၤစံၣ်သုးဒဲက၀ီၤ စံး၀ဲဒ်အံၤန့ၣ်လီၤ.
“တၫ်စူၤခါကတီၫ်အဃိ အ၀ဲသ့ၣ်ကအိၣ်ဆိးဘၣ်အဂီၫ် တၫ်ကီတၫ်ခဲအိၣ်လီၤ. ထံလီၤစူလၢကစၢၫ်ကျါန့ၣ် တနီၤအိၣ်ဖဲသူမွဲကျိအကပၤအဃိ ဟီၣ်ခိၣ်မ့ၫ်လီၤပှီၫ်ကွံာ် ဟံၣ်တဖၣ်စ့ၫ်ကီးပာ်ဃုာ်၀ဲလီၤ.ဟံၣ်တနီၤန့ၣ်အဒူၣ်ဒီးအဒုးတလၢဘၣ်၀ံၤ မ့ၫ်တၫ်စူၤခါကတီၫ်အဃိတၫ်ကီတၫ်ခဲလီၤ. တၫ်လီၫ်တနီၤန့ၣ် အသးဆူၣ်လၢကကဲထီၣ်တၫ်ဒုးလီၤ ကအိၣ်ကဆိးအဂီၫ်လိၣ်ဘၣ်တၫ်သူၣ်ထီၣ်အဒူၣ်ဒီးအဒုးတဖၣ်လီၤ. ကညီကီၫ်စဲၣ်ဒီတဘ့ၣ်န့ၣ် ပှၤစံၣ်သုးအိၣ်(၇)ကလီၤဘျဲၣ်လီၤ. ဖဲအကျါပှၤမၤစၢၤအီၤန့ၫ်တၫ်(၂)ကလီၤလီၤ. ပှၤလၢအိၣ်တ့ၫ်တဖၣ်န့ၣ် ဘၣ်ကွၫ်ဆၢၣ်မဲာ်ဘၣ်တၫ်အီၣ်တၫ်အီတၫ်ကီတၫ်ခဲတဖၣ်လီၤ.“
လၢကီၫ်ပယီၤတၫ်ဒုးကဲထီၣ်သးအလီၫ်တဖၣ်အပူၤ လဲၤခးလီၤတၫ်လၢကလံၤကျါတဖၣ်,ခးကျိဖးဒိၣ်တဖၣ်,တၫ်ဒွဲၣ်အူမၤဟးဂီၤကွံာ်ဟံၣ်ဃီတဖၣ်အဃိ ကမျၢၫ်တဖၣ်ဘၣ်ကွၫ်ဆၢၣ်မဲာ်ဘၣ်ဒီးသးသမူတၫ်လီၤဘၣ်ယိၣ်၀ံၤ တၫ်ကဖံးအီၣ်မၤအီၣ်အဂီၫ်ကီခဲ၀ဲအဃိ ကမျၢၫ်တဖၣ်ဘၣ်ပာ်တ့ၫ်ဟံၣ်ဃီဘၣ်ဃ့ၫ်ပူၤဖျဲးသးန့ၣ်လီၤ.
ကီၫ်ပယီၤဒီတဘ့ၣ် ကီၫ်ဒိၣ်ဒီးကီၫ်စဲၣ်တဖၣ်အပူၤ ကမျၢၫ်စံၣ်သုးအိၣ်ထီၣ်၀ဲ(၃)ကကွဲၫ်ဘျဲၣ်၀ံၤ စးထီၣ်လၢ ၂၀၂၁နံၣ်, လါဖ့ၤဘြူၤအါရံၤ, သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီး(၃)နံၣ်ဘျဲၣ်အတီၫ်ပူၤ ထံလီၫ်ကီၫ်ပူၤပှၤလီၫ်အိၣ်ကမှံဖိနီၣ်ဂံၫ်ဟဲအါထီၣ်တုၤလၢအကကွဲၫ်တဖၣ်အဂ့ၫ် ဘီမုၫ်စၢဖှိၣ်ကရၢပာ်ဖျါဃၣ်၀ဲဖဲ အလံာ်ပာ်ဖျါအပူၤန့ၣ်လီၤ.
ref:voa
