၇.၃.၂၀၂၄
ထံဂုၤကီၫ်ဂၤတကပၤ လိၣ်လၢကမၤပူၤဖျဲးပှၤကီၫ်ပယီၤဖိအသးသမူ၀ံၤ လၢတၫ်ဒီသဒၢန့ၫ်တၫ်လၢ သုးကီၣ်ကးအတၫ်မၤအၢမၤသီတၫ်လီၤဘၣ်ယိၣ်အဂီၫ် အိၣ်ခိးမနုၤလဲၣ်အဂ့ၫ် ဘၣ်ထွဲကီၫ်ပယီၤမီၫ်သီအူကၠီၣ်မိထိ ထုးထီၣ်တၫ်သံကွၫ်လၢဘီမုၫ်စၢဖှိၣ်ကရၢတၫ်ဘံၣ်တၫ်ဘၢကီၣ်ကးအဖီခိၣ်န့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ(၃)နံၣ်အတီၫ်ပူၤ သုးကွီၫ်မ့ၣ်တၫ်မၤကမၣ်,တၫ်မၤသံလီၤတူာ်ကလုာ်ဒူၣ်စၢၤသွဲၣ် တကးဘၣ်ဘၣ်ထွဲတၫ်မၤကမၣ် ဟီၣ်ခိၣ်ဖိစၢၤသွဲၣ်အဖီခိၣ် လၢ၀့ၫ်နယူယီး,ဘီမုၫ်စၢဖှိၣ်ကရၢ၀ဲၤလီၫ်ခိၣ်သ့ၣ်န့ၣ် ဖဲလါယူၤလံ(၁)သီနံၤ တၫ်မၤ၀ဲဘၣ်ထွဲတၫ်ဒီသဒၢတြီဆၢတၫ်အိၣ်ဖှိၣ်(R2P)အပူၤ မီၫ်သီအူကၠီၣ်မိထိတဲ၀ဲဒ်အံၤန့ၣ်လီၤ.
ဖဲ၂၀၀၅ နံၣ် ဟီၣ်ခိၣ်ပတီၫ်ထီတၫ်အိၣ်ဖှိၣ်အပူၤ တၫ်ပာ်ဂၢၫ်ပာ်ကျၢၤဃာ်R2P လၢကဒီသဒၢန့ၫ်တၫ်အဂီၫ်မူဒါအိၣ်အဖီခိၣ် တၫ်မၤကမၣ်ပှၤဂ့ၫ်၀ီခွဲးယာ်တဖၣ် ကတြီဆၢ၀ဲ၀ံၤ ကဒီသဒၢန့ၫ်တၫ်လၢကမျၢၫ်အဂီၫ် ထံဂုၤကီၫ်ဂၤတကပၤဟံးန့ၫ်ဂ့ၫ်၀ီကန့ၫ်အဂီၫ် ကအိၣ်ကတီၤအသးန့ၣ် မ့ၫ်တၫ်လၢအရ့ဒိၣ်၀ဲအဂ့ၫ် ဘီမုၫ်စၢဖှိၣ်ကရၢဘၣ်ထွဲကီၫ်ပယီၤမီၫ်သီ အူကၠီၣ်မိထိတဲ၀ဲလီၤ.
ကီၫ်ပယီၤပာ်ဃုာ် လၢဟီၣ်ခိၣ်ဒီတဘ့ၣ် စုက၀ဲၤတၫ်သဘံၣ်သဘုၣ်လၢကဲထီၣ်သးတဖၣ်ဒီး တၫ်မၤသံမၤ၀ီလၢအၢအၢသီသီတဖၣ် ဘီမုၫ်စၢဖှိၣ်ကရၢတကပၤ တြီဆၢ၀ဲတန့ၫ်ဘၣ်အဂ့ၫ် မီၫ်သီအူကၠီၣ်မိထိတဲ၀ဲလီၤ.
လၢတကပၤ ကီၫ်ပယီၤပူၤ သုးကီၣ်ကးန့ၣ်ပှၤရိၣ်ဟ့ၣ်ကၠၣ်ဖိပာ်ဃုာ် ကီၫ်ပယီၤထံဖိကီၫ်ဖိကမျၢၫ်အဖီခိၣ် ကွီၫ်မ့ၣ်တၫ်မၤကမၣ်လၢ သုးကီၣ်ကးမၤကမၣ်၀ဲတပယူာ်ဃီအံၤ ထံဂုၤကီၫ်ဂၤတကပၤ ကဟုကယာ်ကမျၢၫ်ထံဖိကီၫ်ဖိအဂီၫ် လီၤတူာ်လီၤကာ်၀ဲအဂ့ၫ် မ့ၫ်တၫ်ပနီၣ်တခါလၢအိၣ်ဖျါ၀ဲလီၤန့ၣ်တဲ၀ဲလီၤ.
တၫ်န့ၣ်အဃိ တၫ်ဘံၣ်တၫ်ဘၢကီၣ်ကးအတၫ်လီၤတူာ်လီၤကာ်န့ၣ် ထံဖိကီၫ်ဖိကမျၢၫ်တူၫ်ဘၣ်၀ဲအၢအၢသီသီ၀ံၤ ဘီမုၫ် စၢဖှိၣ်ကရၢထံကီၫ်တကပၤ လၢ၂၀၀၅နံၣ် ဟ့ၣ်ဃာ်၀ဲR2P တၫ်အၢၣ်လီၤအသိး ကီၫ်ပယီၤအဖီခိၣ်ကတီဒီးအတၫ်အၢၣ်လီၤဒီးသူ၀ဲအဂီၫ် အူကၠီၣ်မိထိတဲဆီၣ်တခူထီၣ်၀ဲလီၤ.
