၇.၂.၂၀၂၄
ပယီၤသုးကီၣ်ကးတကပၤဃ့ထီၣ်၀ဲအဃိ (CI)တၫ်လီၫ်ခဲလၢာ်တၫ်ကကးတံာ်ကွံာ်အဂ့ၫ် ကၠီၣ်တဲၣ်ပှၤမၤတၫ်ဖိ၀ဲၤကျိၤဘိးဘၣ်ရၤလီၤ၀ဲလီၤ.ဖဲအပူၤကွံာ် လါယူၤ(၂၈)သီနံၤ ဘိးဘၣ်ရၤလီၤ၀ဲ၀ံၤ (CI)တၫ်လီၫ်ခဲလၢာ် ဖဲလါယူၤလံ(၇)သီအနံၤန့ၣ် တၫ်ကကးတံာ်ကွံာ်၀ဲခဲလၢာ်အဂ့ၫ် တၫ်ဘိးဘၣ်ရၤလီၤအပူၤပာ်ဖျါ၀ဲလီၤ.
“မ့ၫ်လီၤ. (CI)တၫ်လီၫ်ခဲလၢာ်တၫ်ကကးတံာ်ကွံာ်၀ဲလီၤ.တၫ်ကအိးထီၣ်တုၤဖဲတနွံအံၤ မုၫ်ယဲၫ်နံၤန့ၣ်လီၤ.ဘၣ်မနုၤအဃိ လဲၣ်န့ၣ် ပှၤဟဲမၤတအိၣ်အါအါလၢၤဘၣ်.ပှၤလၢတမၤဘၣ်ဒံးတဖၣ် ကဟဲမၤဘၣ်၀ဲလၢအဆိအချ့အဂီၫ် အဲၣ်ဒိးတဲ၀ဲလီၤအဂ့ၫ်” ပှၤလၢမၤန့ၫ် ကီၫ်ပယီၤခီကီၫ်ပှၤမၤတၫ်ဖိ Passport စဲစဲ(စိုင်းစိုင်း)တဲ၀ဲလီၤ.
ကီၫ်ပယီၤခီကီၫ်ပှၤမၤတၫ်ဖိလၢ ဟဲတုၤဆူကီၫ်ကၠီၣ်တဲၣ်တဖၣ်အဂီၫ် အပူၤကွံာ် ၂၀၂၃နံၣ် လါအီးကထိဘၢၣ်(၃)သီနံၤ ပယီၤ-ကၠီၣ်တဲၣ် ထံကီၫ်ခံဘ့ၣ်ပာ်ဖှိၣ်လိာ်သး၀ံၤ အိးထီၣ်န့ၫ်၀ဲ(CI) တၫ်လီၫ်(၈)တီၤန့ၣ်လီၤ.လၢကတီၫ်အံၤမ့ၫ်လၢ ပယီၤသုးကီၣ်ကးတကပၤဃ့ထီၣ်၀ဲအဃိ (CI)တၫ်လီၫ်ခဲလၢာ် တၫ်ကကးတံာ်ကွံာ်၀ဲအဂ့ၫ် ကၠီၣ်တဲၣ်ပှၤမၤတၫ်ဖိ၀ဲၤကျိၤ ဘိးဘၣ်ရၤလီၤ၀ဲလီၤ.
“ကးတံာ်ကွံာ်၀ဲဒ်သိးအံၤန့ၣ် ပှၤလၢအဲၣ်ဒိးမၤတဖၣ် မၤ၀ဲတန့ၫ်လၢၤဘၣ်.အ၀ဲသ့ၣ်မ့ၫ်က့ၤအိးထီၣ်ကဒါက့ၤ၀ဲမးဒီး တၫ်မၤ၀ဲကန့ၫ်လီၤအဂ့ၫ်” စဲစဲ(စိုင်းစိုင်း)တဲကဒီး၀ဲလီၤ.
တၫ်န့ၣ်အဃိ ကီၫ်ပယီၤခီကီၫ်ပှၤမၤတၫ်ဖိလၢ တမၤဘၣ်ဒံး(CI)တဖၣ်, ပှၤလၢတီၣ်ထီၣ်ဃာ်အမံၤအသၣ်တဖၣ် ကလဲၤမၤဘၣ်၀ဲလၢ Seven Eleven 7လၢအဆိအချ့အဂီၫ် ပှၤတ၀ၢတၫ်ကရၢကရိလၢ မၤန့ၫ်တၫ်လၢ ပှၤကီၫ်ပယီၤဖိ ဂ့ၫ်၀ီအဂီၫ်တဖၣ် တဲဆီၣ်တခူထီၣ်ဃာ်၀ဲလီၤ.
ref:Shan News
