၇.၂.၂၀၂၄
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်အပူၤ သုးကီၣ်ကးပညိၣ်ခးလီၤကျိဖးဒိၣ်ဆူ ကမျၢၫ်အိၣ်ဒူသ၀ီတဖၣ်ပူၤအဃိ ကမျၢၫ်(၄)ဂၤဘၣ်ဒိ၀ဲ, ဟံၣ်(၂)ဖျၢၣ်ဟးဂီၤကွံာ်၀ဲအသိး ကမျၢၫ်(၁)ဂၤစ့ၫ်ကီး ဘၣ်တၫ်ဖီၣ်န့ၫ်အီၤအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃၣ်၀ဲန့ၣ်လီၤ.
ဖဲလါယူၤ(၂၂)သီအနံၤန့ၣ် လၢၫ်ဒိၣ်ကီၫ်ဆၣ်, သဲကိသ၀ီဖိတဂၤလၢအမ့ၫ် ဒီၣ်မိမိ,သးနံၣ်(၅၃)နံၣ်အံၤ သုးကီၣ်ကးအသုး(ခမရ-၆၀)သုးရ့ၣ် ဖီၣ်န့ၫ်ဆူၣ်၀ဲဒီးက့ၤကိး၀ဲအဂ့ၫ်တၫ်သ့ၣ်ညါဘၣ်န့ၣ်လီၤ.
လါယူၤ(၂၅)သီအနံၤန့ၣ် သုးကီၣ်ကးအသုး(ခလရ-၂၆၄)သုးရ့ၣ် ခးလီၤ(၁၂၀-မမ)ကျိဖးဒိၣ်(၂)ဘျီအဃိ ကျိဖးဒိၣ်(၂)ဖျၢၣ် လဲၤလီၤတဲာ်ိပာ်ဖးထီၣ်၀ဲဒၣ်ဖဲ နိၣ်ထိးအ့ၣ်သ၀ီပူၤအဃိ သ၀ီဖိ(၃)ဂၤဘၣ်ဒိ၀ဲ၀ံၤ သ၀ီဖိဟံၣ်(၁)ဖျၢၣ်စ့ၫ်ကီးဟးဂီၤကွံာ်၀ဲန့ၣ်လီၤ.
လါယူၤ(၂၉)သီအနံၤ, ဟါ(၅)နၣ်ရံၣ်ဘျဲၣ်အဆၢကတီၫ် သုးကီၣ်ကးအသုး(ခလရ-၂၆၄)သုးရ့ၣ် ခးလီၤ(၁၂၂-မမ)ဟီၣ်၀့ၣ်စၣ်(၁)ဖျၢၣ်အံၤ လဲၤလီၤတဲာ်ပိာ်ဖးထီၣ်၀ဲဒၣ် ဖဲထိ၀ါဆဲးသ၀ီပူၤန့ၣ်လီၤ.
တနံၤဃီဖဲဟါ(၇း၃၀)အဆၢကတီၫ်, သုးကီၣ်ကးအသုး(ခလရ-၂၆၄)သုးရ့ၣ် ခးလီၤကဒီး၀ဲ(၁၂၂-မမ)ဟီၣ်၀့ၣ်စၣ်(၃)ဖျၢၣ်အဃိ လဲၤလီၤတဲာ်ပိာ်ဖးထီၣ်၀ဲဒၣ် ဖဲနိၣ်ထိးအ့ၣ်သ၀ီပူၤ၀ံၤ သ၀ီဖိ(၁)ဂၤ ဘၣ်ဒိကဒီး၀ဲစ့ၫ်ကီးန့ၣ်လီၤ.
