လါယူၤ(၅)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ဒူပျာ်ယာ်ကီၫ်ရ့ၣ်ဟီၣ်က၀ီၤ သုးကီၣ်ကးအသုး လၢအိၣ်ဖဲ၀့ၫ်ရၤမတံတဖၣ် တၫ်ကမၤပှဲၤသုးအဂံၫ်အဘါအဂီၫ် အီၣ်စ့ၣ်ယးသုးကျိၤ(အောင်ဇေယျစစ်ကြောင်း) လၢဟဲထီၣ်ယံာ်(၁)လါဘျဲၣ်အံၤတလဲၤတုၤဒံးလၢ ၀့ၫ်ရၤမတံ(မြဝတီမြို့) ဒံးဘၣ်ဒီး တၫ်လဲၤထီၣ်သုတန့ၫ်အဂီၫ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီး သုးပာ်ဖှိၣ်တဖၣ်ဒုးခီၣ်ဆၢမၤတံာ်တၫ်အီၤန့ၣ်လီၤ.
သုးကီၣ်ကးအသုးကျိၤ လၢအိၣ်ဖဲတီနီၫ်ကစၢၫ်အံၤ သုးက့နီၣ်ဂံၫ်(၆), ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)အစုတီဖီလာ် ခိၣ်ပရၣ်သုးကျိၤ(ကော်ပရာစစ်ကြောင်း), ဘီၣ်သိၣ်၀ါသုးကျိၤတဖၣ်(ကျားဖြူစစ်ကြောင်းများ), (NUG)အစုတီဖီလာ်သုးကျိၤတဖၣ် ခိးဒုးအီၤလၢစဲးပြဲးအဂ့ၫ် တၫ်သ့ၣ်ညါဘၣ်န့ၣ်လီၤ.
(၁)လါဘျဲၣ်အတီၫ်ပူၤ သုးကီၣ်ကးသုးကျိၤတပၤ ပှၤလၢအသံဒီးဘၣ်ဒိဘၣ်ထံးအိၣ်၀ဲ(၃၀)ဘျဲၣ်၀ံၤ ပှၤလၢဟဲဟ့ၣ်လီၤသးဃုာ်ဒီးစုက၀ဲၤတဖၣ်အိၣ်၀ဲ(၂၀)ဂၤအသိး တၫ်ပၢၫ်ဆၢသုးပာ်ဖှိၣ်တပၤစ့ၫ်ကီး တၫ်ဘၣ်ဒိဘၣ်ထံးအိၣ်၀ဲတနီၤအဂ့ၫ် ဂံၫ်ခီၣ်ထံးတၫ်ကစီၣ်စံး၀ဲန့ၣ်လီၤ.
ပှၤလၢဟဲဃ့ၫ်ဟးထီၣ်လၢ သုးကီၣ်ကးသုးကျိၤတဖၣ် အတၫ်တဲအဖီခိၣ် အီၣ်စ့ၣ်ယးသုးကျိၤအံၤ ဘၣ်ကွၫ်ဆၢၣ်မဲာ်ဘၣ် (KNLA)ဒီး သုးပာ်ဖှိၣ်တဖၣ် တၫ်လဲၤထုးအီၤလၢမ့ၣ်ပိၫ်ဒီး တၫ်ခးအီၤလၢစုပျဲကျိၤတဖၣ်အဂ့ၫ်စံးအါထီၣ်၀ဲန့ၣ်လီၤ.
အီၣ်စ့ၣ်ယးသုးကျိၤလၢဟဲထီၣ်အံၤ ဟဲထီၣ်၀ဲဒီး သိလ့ၣ်ထးတဖၣ်(သံချပ်ကာကားများ), ကျိဖးဒိၣ်တဖၣ်, သိလ့ၣ်တီၣ်မျိာ်သၣ်ယူၫ်လၢတၫ်ခးအီၤတပယူာ်ဃီတဖၣ်ခဲလၢာ် အဂံၫ်အဘါအိၣ်၀ဲ (၅၀၀)ဃၣ်ဃၣ်အဂ့ၫ် တၫ်ပၢၫ်ဆၢသုးတပၤ တယၣ်၀ဲန့ၣ်လီၤ.
တကးဒံးဘၣ် သုးကီၣ်ကးခိသုးကျိၤပာ်ဃုာ် ဒရိတဖၣ်စ့ၫ်ကီးပာ်ဃုာ်၀ံၤ သုးကီၣ်ကးတပၤ ဟဲကွၫ်ဟုၣ်ကွၫ်စုၣ်တၫ်လၢ ဒရိတဖၣ်, ဟဲတ့ၫ်လီၤမ့ၣ်ပိၫ်တဖၣ်, ဟဲတ့ၫ်လီၤမ့ၣ်ပိၫ်လၢ Y-12ကဘီယူၤတဖၣ်ဒ်သိး တၫ်ဟဲထီၣ်ဆူတၫ်မဲာ်ညါကန့ၫ်အဂီၫ် ဂုာ်ကျဲးစၢး၀ဲ အကျိၤအကျဲအကလုာ်ကလုာ်လီၤအဂ့ၫ် တၫ်သ့ၣ်ညါဘၣ်န့ၣ်လီၤ.
လၢကတီၫ်ခဲအံၤ ၀့ၫ်ရၤမတံအံၤ အိၣ်၀ဲဒၣ်လၢသုးကီၣ်ကးအစုပူၤ၀ံၤ ၀့ၫ်တၫ်ဘံၣ်တၫ်ဘၢအဂီၫ် သုးကီၣ်ကးအသုးဒီး ကညီသုးခိးကီၫ်ဆၢ (BGF)တဖၣ် ဟံးန့ၫ်ဃၣ်၀ဲမူဒါန့ၣ်လီၤ.
ref:myanmarnow
photo:cobra column
