လါယူၤ(၅)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၣ်ဂံၫ်(၅), ကီၫ်ရ့ၣ်မုၫ်တြီၫ်အပူၤကွံာ်လါမ့ၤ(၁)လါအတီၫ်ပူၤ သုးကီၣ်ကးတပၤ ဟဲတ့ၫ်လီၤမ့ၣ်ပိၫ်လၢကလံၤကျါ အိၣ်ထီၣ်တုၤအဖျၢၣ်(၁)ကထိဘျဲၣ်အဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲန့ၣ်လီၤ.
သုးကီၣ်ကးတပၤ ဟဲတ့ၫ်လီၤမ့ၣ်ပိၫ်အတယၢၤအိၣ်ပီၣ်(၅၀၀) (၁၂)ဖျၢၣ်၀ံၤ သူ၀ဲဒရိဒီး ဟဲတ့ၫ်လီၤမ့ၣ်ပိၫ်အဒိၣ်အဆံးခဲလၢာ်အိၣ်ထီၣ်၀ဲ(၁)ကထိဖျၢၣ်ဃၣ်ဃၣ်အဃိ လီၫ်က၀ီၤကမျၢၫ်အိၣ်ဟံၣ်(၁၆)ဖျၢၣ်, တၫ်ပာ်ကီၤဘူဒၢး(၁)ဖျၢၣ်(စပါးကျီ-(၁)လုံး), တၫ်သူၣ်တၫ်ဖျးကရၢၫ်အပူၤ တၫ်မုၫ်တၫ်ဘိတဖၣ်ဟးဂီၤကွံာ်၀ဲတကးဒံးဘၣ် ဆၣ်ဖိကီၫ်ဖိတဖၣ်စ့ၫ်ကီး သံ၀ဲအဂ့ၫ် ပာ်ဖျါဃာ်၀ဲန့ၣ်လီၤ.
ဒ်န့ၣ်အသိး လါမ့ၤ(၁)လါအတီၫ်ပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA), သုးပာ်ဖှိၣ်တဖၣ်ဒီး သုးကီၣ်ကးအသုးတဖၣ်အဘၢၣ်စၢၤ တၫ်ဒုးဖးဒိၣ်, တၫ်ဒုးအဆံး အိၣ်ထီၣ်၀ဲ (၁၀၇)ဘျီန့ၣ်လီၤ.
ခံခီယာ်ဘးတၫ်ဒုးတဖၣ်အပူၤ သုးကီၣ်ကးတပၤ သံဒီးဘၣ်ဒိဘၣ်ထံးအိၣ်ထီၣ်၀ဲ (၆၀)ဃၣ်ဃၣ်၀ံၤ တၫ်ပၢၫ်ဆၢသုးပာ်ဖှိၣ်တပၤစ့ၫ်ကီး တၫ်ဘၣ်ဒိဘၣ်ထံးအိၣ်၀ဲတနီၤအဂ့ၫ် တၫ်သ့ၣ်ညါဘၣ်န့ၣ်လီၤ. ဒ်န့ၣ်အသိး သုးကီၣ်ကးတပၤ ဟဲတ့ၫ်လီၤမ့ၣ်ပိၫ်လၢကဘီယူၤအဃိ လီၫ်က၀ီၤကမျၢၫ်လၢတၫ်ကမၣ်တအိၣ်(၈)ဂၤစ့ၫ်ကီး သံ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
လၢန့ၣ်အမဲာ်ညါ လါမ့ၤ(၁)လါအတီၫ်ပူၤ သုးကီၣ်ကးအသုးကလၢၤ(၅)ဖျၢၣ်လၢ အိၣ်ဆီလီၤအသး ဖဲကီၫ်ရ့ၣ်မုၫ်တြီၫ်, ဘူသိၣ်ကီၫ်ဆၣ်ဟီၣ်က၀ီၤပူၤတဖၣ် လၢအမ့ၫ် (ကၠီးညး-၀းလူၫ်-ခမရ-၄၃၄), (တၫ်ပူကၠိ-ခမရ-၄၃၄), (ပၣ်ဟဲး-ကဟံၣ်ကၠိ-ခမရ-၄၃၄), (လၢၫ်တိ-ခလရ-၁၉)ဒီး (နးတီၣ်-မီၣ်ဖိကၠိ-ခမရ-၃၄၁)သုးကလၢၤတဖၣ် ထုးကွံာ်အသးန့ၣ်လီၤ.
သုးကီၣ်ကးအသုးကလၢၤ လၢထုးကွံာ်အသးတဖၣ်အံၤ လဲၤပာ်ဖှိၣ်မၤပှဲၤအဂံၫ်အဘါဆူ ခီပူၣ်သုးကလၢၤ(ခေါပုတ်တပ်စခန်း)အဂ့ၫ် တၫ်သ့ၣ်ညါဘၣ်န့ၣ်လီၤ.
