လါမ့ၤ(၂၉)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်သူလ့ၤတၫ်ပၢဟီၣ်က၀ီၤ, ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်မူဒီး ကီၫ်ဆၣ်လၢၫ်ဒိၣ်တဖၣ်ပူၤ သုးကီၣ်ကးအသုးတဖၣ် ပညိၣ်ခးလီၤကျိဖးဒိၣ်လၢ ကမျၢၫ်အိၣ်ဆိးဒူသ၀ီဒီး တၫ်ဖံးအီၣ်မၤအီၣ်အလီၫ်ပူအဃိ ကမျၢၫ်ဘၣ်ဒိ(၂)ဂၤ, ဟံၣ်ဃီ(၄)ဖျၢၣ်ဒီး တၫ်သူၣ်ထီၣ်(၁)ဖျၢၣ်ဘၣ်ဟးဂီၤ၀ဲ, ကျီၫ်(၅)ဒုဘၣ်သံ၀ံၤ ဘၣ်ဒိဘၣ်ထံး၀ဲ(၁၃)ဒုအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲန့ၣ်လီၤ.
ခ့ၣ်အဲၣ်ယူၣ်-ကီၫ်ဆၣ်လၢၫ်ဒိၣ်တၫ်ပၢဟီၣ်က၀ီၤပူၤ ဖဲ၂၀၂၄နံၣ်, လါမ့ၤ(၂၃)သီနံၤ, ဂီၤ(၉း၄၈)နၣ်ရံၣ် အကတီၫ် သုးကီၣ်ကးအသုးတဖၣ်အိၣ်ဖဲ မုၫ်ဃါဘျီ၀ံၤ ခးစိဃီၤကျိဖးဒိၣ် (၁၂၀)မမ(၁)ဖျၢၣ်ဆူ ပီးကိသ၀ီ(ပေါက်ကုန်း ကျေးရွာ)ဒီး လီၤတဲာ်ပိၫ်ဖးအဃိ ရွှ့ၣ်တဲစူးသ၀ီဖိ အူကၠီၣ်စိ, သးနံၣ်(၆၂)နံၣ် လၢ ဟဲဟးဖဲသ၀ီအံၤ ဘၣ်ဒိ၀ဲအခီၣ်တကပၤန့ၣ်လီၤ.
ဖဲ၂၀၂၄နံၣ် လါမ့ၤ(၂၄)သီနံၤ, ဂီၤ(၈း၁၀)နၣ်ရံၣ်, အကတီၫ် သုးကီၣ်ကးအသုး ဟဲခးလီၤတၫ်လၢ ကဘီယူၤဒုးသုး(ဂျက်ဖိုက်တာ) ဖဲဟံဖိဒဲသ၀ီ(ဟီဖိုးဒဲကျေးရွာ)အကပၤ ကမျၢၫ်တၫ်ဖံးအီၣ်မၤအီၣ်အလီၫ်အဃိ သ၀ီဖိအကျီၫ်လၢပျၫ်လီၤ၀ဲဖဲန့ၣ် (၁၃)ဒုဘၣ်ဒိဘၣ်ထံး၀ဲလီၤ.
ဖဲ၂၀၂၄နံၣ်, လါမ့ၤ(၂၅)သီနံၤ ဟါ(၁၀)နၣ်ရံၣ်အကတီၫ် သုးကီၣ်ကးအသုး လၢအိၣ်ဆီလီၤအသးဖဲ ပ့စလိး(ပိန်းဇလုပ်) ခလရ-၂၆၄ သုးရ့ၣ် ခးလီၤကျိဖးဒိၣ်(၁၂၀)မမ (၁၀)ဖျၢၣ်ဒီး လီၤတဲာ်၀ဲဒၣ်ဖဲ ကၠီကိသ၀ီ (ကျောင်းကုန်းကျေးရွာ), ၂ဖျၢၣ်, ကီးမဲးသူၣ်သ၀ီ(ကောက်မဲ့သူ ကျေးရွာ)ပူၤ(၂)ဖျၢၣ်, ယီးသွါကိသ၀ီ (ယောက်သွားကုန်း ကျေးရွာ)ပူၤ(၄)ဖျၢၣ်ဒီး ကၠ့းကွ့သ၀ီ(ကြိတ်ကွင်း ကျေးရွာ)ပူၤ(၂)ဖျၢၣ်အဃိ စီၤကူငဲၣ်အကျီၫ်တဒုဘၣ်သံ၀ဲလီၤ.
ဖဲ၂၀၂၄နံၣ်, လါမ့ၤ(၂၄)သီနံၤ, ဂီၤ(၈း၁၀)နၣ်ရံၣ်အကတီၫ် လၢကီၫ်သူလ့ၤ-ကီၫ်ဆၣ်မူတၫ်ပၢဟီၣ်က၀ီၤ, ဖဲမိည့ဒဲသ၀ီ(မိုညှင်းဒဲကျေးရွာ)ဒီး ကွံဒိၣ်ဃီၤသ၀ီ(ကွီးဒိုခေါ် ကျေးရွာ)ပူၤ သုးကီၣ်ကးအကလံၤသုး ဟဲခးလီၤတၫ်အဃိ ကမျၢၫ်အိၣ်ဟံၣ်(၄)ဖျၢၣ်ဘၣ်ဟးဂီၤ၀ဲလီၤ. အလီၫ်ခံ ဖဲဂီၤခီ(၈း၁၅)နၣ်ရံၣ် အကတီၫ် ဟဲတ့ၫ်လီၤမ့ၣ်ပိၫ် လၢကီၫ်ဆၣ်မူ ကွံဒိၣ်ဃီၤသ၀ီ(ကွီးဒိုခေါ်) ဒီး မီနဲသ၀ီ(မောနဲရွာ)တဖၣ်ပူၤဒီး တၫ်ဘၣ်ဒိဘၣ်ထံးတအိၣ်ဘၣ်ဆၣ် ဖဲ(၈း၂၀)နၣ်ရံၣ် အကတီၫ် ဟဲတ့ၫ်လီၤကဒီးတၫ်ဖဲ မိည့ဒဲသ၀ီ(မိုညှင်းဒဲကျေးရွာ)အဃိ ကမျၢၫ်ဘၣ်ဒိ(၁)ဂၤဒီး တၫ်သူၣ်ထီၣ်ဘၣ်ဟးဂီၤ(၁)ဖျၢၣ် တကးဘၣ်ခးလီၤတၫ်လၢ(Helicopter )ကဘီယူၤဒုးသုးအိၣ်၀ဲန့ၣ်လီၤ.
photo:knu
