လါမ့ၤ(၂၉)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၣ်ဂံၫ်(၅), ကီၫ်ရ့ၣ်မုၫ်တြီၫ်ဟီၣ်က၀ီၤအပူၤ သုးကီၣ်ကးအပှၤသုးဖိလၢပာ်တ့ၫ်သုးကလၢၤတဖၣ်အံၤ လဲၤပာ်ဖှိၣ်ထီၣ်သးဆူခီပူၣ်သုးကလၢၤ(ခေါပုတ်တပ်စခန်း)အဂ့ၫ် ကီၫ်ရ့ၣ်မုၫ်တြီၫ်ပှၤကတိၤတၫ်ပၢ သုးခိၣ်ဒိၣ်ဂီၫ်ဂ့ၫ်စီၤကျၢၫ်ဒိၣ်တဲ၀ဲန့ၣ်လီၤ.
သုးက့(၅)ဟီၣ်က၀ီၤပူၤ သုးကလၢၤလၢသုးကီၣ်ကး အပှၤသုးဖိပာ်တ့ၫ်တဖၣ်မ့ၫ်၀ဲ ကဟံၣ်ကၠိ(ကဟီကျိုး), လၢၫ်တိ(လယ်တိုး), ကၠီးညး(၀းလူၫ်), မီၣ်ဖိကၠိသုးကလၢၤ(မော်ဖိုးကျိုးတပ်စခန်း)တဖၣ်အပူၤ၀ံၤ သုးအဂံၫ်အဘါကအိၣ်၀ဲလၢ(၁၀၀)ဘျဲၣ်ဒီး (၂၀၀)အဘၢၣ်စၢၤ၀ံၤ လဲၤပာ်ဖှိၣ်ထီၣ်သးဆူ ခီပူၣ်သုးကလၢၤ(ခေါပုတ်တပ်စခန်း)အဂ့ၫ်စံး၀ဲန့ၣ်လီၤ.
သုးကီၣ်ကးအသုးကလၢၤလၢအိၣ်ဖဲ သုးက့(၅)ဟီၣ်က၀ီၤပူၤတဖၣ်အံၤ KNLAဒီး သုးပာ်ဖှိၣ်တဖၣ်လဲၤဒုး၀ဲလၢ စဲးပြဲးတၫ်ဒုးကိးမုၫ်နံၤဃၣ်ဃၣ်ဒီး တၫ်ဒီၣ်တဲာ်ဃာ်ကျဲအကျိၤတဖၣ်, တၫ်အီၣ်တၫ်အီတဖၣ်အဃိ တၫ်ဟဲဆှၢန့ၫ်တၫ်အီၣ်တၫ်အီလၢကဘီယူၤလီၤအဂ့ၫ် သုးခိၣ်ဒိၣ်ဂီၫ်ဂ့ၫ်စီၤကျၢၫ်ဒိၣ်တဲ၀ဲန့ၣ်လီ.
“ခီဖျိလၢ သုးကီၣ်ကးအသုးကလၢၤတဖၣ် တၫ်လဲၤဒုးစဲးပြဲးကိးမုၫ်နံၤဃၣ်ဃၣ်, တၫ်ဒီၣ်တဲာ်ကွံာ်ကျဲဒီး တၫ်အီၣ်တၫ်အီတဖၣ်အဃိ အ၀ဲသ့ၣ်သုးက့ၤအသးဒီး က့ၤပာ်ဖှိၣ်ထီၣ်အသးဆူခီပူၣ်လီၤ.”
ကတီၫ်ခဲအံၤ သုးကီၣ်ကးအသုးကလၢၤလၢအိၣ်ဖဲ ၀့ၫ်ဖၣ်ပူၣ်ဒီး သုးကလၢၤလၢအဘူးဒီးဖဲန့ၣ်တဖၣ် တအိၣ်လၢၤနီတဖျၢၣ်လၢၤဘၣ်ဒီး က့ၤသုးက့ၤအသးဆူ ဖၣ်ပူၣ်အဆၢလာ်၀့ၫ်နီၫ်အဂ့ၫ် အ၀ဲစံး၀ဲန့ၣ်လီၤ.
“တၫ်လီၫ်လၢညါ ၀့ၫ်နီၫ်တၫ်လီၫ်န့ၣ်နီၫ် ပှၤကိးလၢကရ့ၣ်နံၣ်တၫ်လူၫ်ခိၣ်(ကရင်နီကုန်း)လီၤ. ပှၤဘှဲသ၀ီဖိအိၣ်တၫ်လီၫ်ဖဲန့ၣ်. အ၀ဲသ့ၣ်လဲၤဟံးန့ၫ်ဆူၣ်ဒီး က့ၤပာ်လီၤသုးတၫ်တိာ်ကူၣ်ခိၣ်သ့ၣ်ဖဲန့ၣ်လီၤ.သုးကလၢၤလၢအဘူးဒီးဖဲန့ၣ်တဖၣ်စ့ၫ်ကီး တၫ်လဲၤက၀ီၤခးတံာ်အီၤ ကိးမုၫ်နံၤဃၣ်ဃၣ်ဒီး ကဘီယူၤဟဲခးတၫ်မီၤနီၫ်.”
၁လါအံၤအတီၫ်ပူၤ သုးကီၣ်ကးတပၤ ဟဲခးလီၤတၫ်လၢကလံၤကျါမ့ၫ်ဂ့ၤ ခးကျိဖးဒိၣ်မ့ၫ်ဂ့ၤ ဟဲအိၣ်ထီၣ်အါထီၣ်၀ဲအဂ့ၫ်, လီၤဆီဒၣ်တၫ်တၫ်မ့ၫ်လဲၤဒုးအသုးကလၢၤတဖၣ်န့ၣ် ဟဲခးလီၤတၫ်ဒီတနံၤလီၤအဂ့ၫ် စံး၀ဲန့ၣ်လီၤ.
လၢန့ၣ်အမဲာ်ညါ ဖၣ်ပူၣ်၀့ၫ်ကမျၢၫ်တဖၣ်ဒီး ဒူသ၀ီလၢအဘူးဒီးဖဲန့ၣ်တဖၣ် အိၣ်၀ဲလၢဒူသ၀ီပူၤတဘူၣ်လၢၤဘၣ်ဒီး ဘၣ်လဲၤအိၣ်ကဒုလၢတၫ်လီၫ်လၢအပူၤဖျဲးအလီၫ်တဖၣ် ဒီးအဘူးတံၫ်တဖၣ်အအိၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
photo:mutraw
