လါမ့ၤ(၂၈)သီ, ၂၀၂၄နံၣ်
သုးကီၣ်ကးထုးထီၣ်ကမျၢၫ်တၫ်ဘၣ်ကဲသုးတၫ်ဘျၢ၀ံၤ, သၢလါဘျဲၣ်အတီၫ်ပူၤ ပှၤကီၫ်ပယီၤဖိလၢလံာ်တၫ်အုၣ်ကီၤတအိၣ်(၃၆၀၀)ဂၤ ဘၣ်တၫ်ဖီၣ်န့ၫ်၀ဲအဂ့ၫ် ပှၤလၢမၤစၢၤပှၤမၤတၫ်ဖိတဖၣ်တဲ၀ဲလီၤ.
တၫ်ဘျၢလၢ ဘၣ်တၫ်ကွဲးတ့ၫ်ဃာ်အီၤလၢ မီၤစိရိၤအခိၣ်လီၫ်လံၤ အူသါရွှ့ၣ်အစိၤအံၤ ဖဲ၂၀၂၄နံၣ် လါဖ့ၤဘြူၤအါရံၤ (၁၀)သီနံၤ သုးကီၣ်ကးအခိၣ် ပာ်ဂၢၫ်ပာ်ကျၢၤဒုးမူထီၣ်က့ၤ၀ဲလီၤ. တၫ်အဃိ သးစၫ်လၢဘျးဒီးတၫ်ဘျၢ၀ဲအံၤ တၫ်ထံၣ်ဘၣ်လၢ ဃ့ၫ်ဖျိးကွံာ်၀ဲလၢကျဲအကလုာ်ကလုာ်ပူၤလီၤ.
ပှၤလၢဟဲတုၤလၢကီၫ်ကၠီၣ်တဲၣ်ဒီး တၫ်အိၣ်ဆိးအဂီၫ်လံာ်အုၣ်ကီၤတအိၣ်အဃိ ပှၤလၢဘၣ်တၫ်ဖီၣ်အီၤ ဖဲလါဖ့ၤဘြူၤအါရံၤပူၤ (၉၀၀)ဂၤ, လါမးရှးပူၤ(၁၀၀၀)ဂၤ, လါအ့ဖြ့ၣ်ပူၤ(၁၁၀၀)ဂၤဒီး တုၤလါမ့ၤတ၀ာ် ပှၤဘၣ်တၫ်ဖီၣ်အီၤအိၣ်၀ဲ(၆၀၀)ဂၤအဃိ ခဲလၢာ်ပာ်ဖှိၣ်အိၣ်၀ဲ ၃၆၀၀ဂၤလံအဂ့ၫ် တဲ၀ဲလီၤ. နီၫ်ဂံၫ်နီၫ်ဒွးအံၤ မ့ၫ်ကၠီၣ်တဲၣ်ပဒိၣ်, ကၠီၣ်တဲၣ်စီၤပၤသုး, ကၠီၣ်တဲၣ်သုးခိးကီၫ်ဆၢ, ထံလီၫ်ကီၫ်ပူၤ၀ဲၤကျိၤဒီး ကၠီၣ်တဲၣ်တၫ်ကစီၣ်သန့တဖၣ် အတၫ်ပာ်ဖျါလီၤအဂ့ၫ် ပှၤလၢမၤစၢၤ ပှၤမၤတၫ်ဖိတဖၣ်တဲ၀ဲလီၤ.
ပှၤလၢဘၣ်တၫ်ဖီၣ်န့ၫ်တဖၣ်အကျါ ဖိသၣ်စ့ၫ်ကီးပာ်ဃုာ်၀ဲအဂ့ၫ် ကီၫ်ပယီၤဂ့ၫ်၀ီ တၫ်ပာ်ဖှိၣ်ဟူးဂဲၤကမံတံာ် ပှၤပၢၤလီၫ်ဆ့ၣ်နီၤ အူမိကၠိတဲ၀ဲလီၤ.
“သၢလါဘျဲၣ်အတီၫ်ပူၤ ပှၤကီၫ်ပယီၤဖိခီနုာ်ကီၫ်ဆၢ လၢတဖိးသဲစးအိၣ်၀ဲ (၃၆၀၀)ဂၤဃၣ်ဃၣ်လီၤ. အ၀ဲသ့ၣ်တဖၣ် ဖဲပှၤဘၣ်မူဘၣ်ဒါတဖၣ်သံကွၫ်အီၤအကတီၫ် စံးဆၢ၀ဲလၢ ပျံၤ၀ဲကီၫ်ပယီၤကမျၢၫ်တၫ်ဘၣ်ကဲသုးတၫ်ဘျၢ အဂ့ၫ်န့ၣ်လီၤ. အလီၫ်ခံ ဟဲခီနုာ်ဃုာ်ဒီး ဖိသၣ်တဖၣ်စ့ၫ်ကီးအိၣ်၀ဲလီၤ.”
သုးကီၣ်ကးအစုတီၤဖီလာ် တၫ်ဘိးဘၣ်ရၤလီၤ၀ဲၤကျိၤ အတဲၣ်လံၣ်ကရၣ်ခၠၣ်နဲၣ်(တယ်လီဂရမ်ချန်နယ်)တခီ ကမျၢၫ်တၫ်ဘၣ်ကဲသုးတၫ်ဘျၢအဃိ သးစၫ်တဖၣ်ဟးထီၣ်ဆူ ကီၫ်ဆၢဒီးထံဂုၤကီၫ်ဂၤန့ၣ် မ့ၫ်တၫ်ကစီၣ်လၢ တမ့ၫ်တတီဘၣ်အဂ့ၫ် ဖဲလါမ့ၤ(၂၀)သီနံၤ ပာ်ဖျါ၀ဲလီၤ.
ဖဲအပူၤကွံာ် လါမ့ၤ(၁၃)သီနံၤစ့ၫ်ကီး လၢကီၫ်ကၠီၣ်တဲၣ်, ၀့ၫ်ကံၫ်မဲ(ချင်းမိုင်မြို့) ပှၤကီၫ်ပယီၤဖိလၢအိၣ်ဆိးလၢတအိၣ်ဒီး လံာ်တၫ်အုၣ်ကီၤ(၂၇)ဂၤ ဘၣ်တၫ်ဖီၣ်ဃာ်၀ဲအဂ့ၫ် ကီၫ်ရ့ၣ်ကံၫ်မဲထံလီၫ်ကီၫ်ပူၤ၀ဲၤကျိၤ(ချင်းမိုင်ခရိုင်ပြည်ထဲရေးဌာန) ဘိးဘၣ်ပာ်ဖျါဃာ်၀ဲလီၤ.
ref:rfa
