လါမ့ၤ(၂၈)သီ, ၂၀၂၄နံၣ်
ဖဲ၂၀၂၄နံၣ်, လါမ့ၤ(၂၇)သီအနံၤ, ဂီၤအဆၢကတီၫ် သုးကီၣ်ကးလဲၤတ့ၫ်လီၤမ့ၣ်ပိၫ် ဖဲခၠီကီၫ်စဲၣ်(ချင်းပြည်နယ်), တံတ့ၣ်၀့ၫ်(တီးတိန်မြို့)အဃိ တံတ့ၣ်၀့ၫ်ကမျၢၫ်(၅)ကထိဃၣ်ဃၣ် ဘၣ်ဃ့ၫ်ပူၤဖျဲးသးလၢ တၫ်လီၫ်လၢပူၤဖျဲးအလီၫ်အဂ့ၫ် ပှၤလၢဃ့ၫ်ပူၤဖျဲးသးတဖၣ် တဲ၀ဲန့ၣ်လီၤ.
တံတ့ၣ်၀့ၫ်ပူၤ လီၫ်က၀ီၤတၫ်ဒီသဒၢသုး(ဒေသကာကွယ်ရေးတပ်)(PDF Zoland)ပာ်ဃုာ် ခၠီသိၣ်မှံသုးပာ်ဖှိၣ်ဒီး သုးကီၣ်ကးအသုးတဖၣ်အဘၢၣ်စၢၤ ဖဲလါမ့ၤ(၂၆)သီအနံၤ, စးထီၣ်လၢဟါ(၁၀)နၣ်ရံၣ်အဆၢကတီၫ်ဒီး တုၤလၢလါမ့ၤ(၂၇)သီအနံၤဂီၤအဆၢကတီၫ် တၫ်ဒုးတဖၣ်ကဲထီၣ်သး၀ံၤအလီၫ်ခံ သုးကီၣ်ကးတပၤ ဟဲတ့ၫ်လီၤမ့ၣ်ပိၫ်ဒ်အံၤလီၤအဂ့ၫ် စံး၀ဲန့ၣ်လီၤ.
တချုးလၢတၫ်ဒုးကဲထီၣ်သးကတီၫ် ပှၤလၢဃ့ၫ်ပူၤဖျဲးဆိသးတဖၣ်အိၣ်၀ဲအသိး လီၫ်က၀ီၤကမျၢၫ်လၢအိၣ်တ့ၫ်တဖၣ်စ့ၫ်ကီးအိၣ်၀ဲအဂ့ၫ် ပှၤလၢတအဲၣ်ဒိးပာ်ဖျါထီၣ်သးတဂၤစံး၀ဲန့ၣ်လီၤ.
“တချုးလၢတၫ်ဒုးကဲထီၣ်သး တနွံကတီၫ် ပှၤတနီၤဃ့ၫ်ပူၤဖျဲးသးလံ. ပှၤလၢအိၣ်ဖဲစကီလၣ်က၀ီၤဒ့(စကောလာရပ်ကွက်)တနီၤ ဃ့ၫ်ပူၤဖျဲးဆိသးလံ. ပှၤတနီၤစ့ၫ်ကီး အိၣ်တ့ၫ်ဒံးလၢ ၀့ၫ်တံတ့ၣ်န့ၣ်လီၤ. ပှၤကညီတ၀ၣ်န့ၣ် ကဃ့ၫ်ပူၤဖျဲးသးလီၤခဲအံၤစ့ၫ်ကီး ဃ့ၫ်ပူၤဖျဲးအဖၢမုၫ်န့ၣ်လီၤ.”
လီၫ်က၀ီၤကမျၢၫ်တဖၣ်အံၤ လဲၤဃ့ၫ်ပူၤဖျဲးသးဆူ စကဲကီၫ်ခီ, ကလ့၀့ၫ်(ကလေးမြို့)အချၢအဂ့ၫ် စံး၀ဲန့ၣ်လီၤ. သုးကီၣ်ကး လဲၤတ့ၫ်လီၤမ့ၣ်ပိၫ်အဃိ လီၫ်က၀ီၤကမျၢၫ်တဖၣ် တၫ်ဘၣ်ဒိဘၣ်ထံးဒီး ဟံၣ်ဃီတၫ်သူၣ်ထီၣ် တၫ်ဟးဂုၤဟးဂီၤတဖၣ်အိၣ်၀ဲဘၣ်ဆၣ် အနီၣ်ဂံၫ်နီၫ်ဒွးတခီ တၫ်မၤလီၤတံၫ်အီၤတန့ၫ်ဒံးဘၣ်အဂ့ၫ် လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
ဖဲလါမ့ၤ(၂၆)သီအနံၤစ့ၫ်ကီး သုးကီၣ်ကး လဲၤတ့ၫ်လီၤမ့ၣ်ပိၫ်လၢကလံၤကျါ ဖဲတံတ့ၣ်ကီၫ်ဆၣ်, မီၣ်ဘ့သ၀ီဒီး ဘၣ်တဲသ၀ီပူၤအဃိ လီၫ်က၀ီၤကမျၢၫ်(၂)ဂၤသံ၀ဲ၀ံၤ ပှၤတနီၤတၫ်ဘၣ်ဒိဘၣ်ထံးအိၣ်၀ဲအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.
ဘၣ်ထွဲခိၣ်ဃၢၤန့ဆၢၣ် တၫ်လီၤဘၣ်ယိၣ် တၫ်ပၢဆှၢရဲၣ်ကျဲၤတၫ်ဖံးတၫ်မၤ တၫ်တိာ်ကျဲၤအဖီခိၣ် ဖဲ၂၀၁၆နံၣ် တၫ်ထၢဖှိၣ်စရီအဖီခိၣ် တံတ့ၣ်၀့ၫ်ပူၤ ပှၤနီၣ်ဂံၫ်(၁)ကလးဃၣ်ဃၣ် အိၣ်ဆိး၀ဲန့ၣ်လီၤ.
ref:rfa
