လါမ့ၤ(၂၈)သီ, ၂၀၂၄နံၣ်
လၢကီၫ်ဘ့ကလါဒ့းရှ်(ဘင်္ဂလားဒေ့ရှ်) ကလံၤမုၫ်လၢအဂံၫ်ဆူၣ်ကနုာ်လီၤအူတၫ်အိၣ်အဃိ ပီၣ်လဲၣ်နံၤသ၀ီလီၫ်က၀ီၤကမျၢၫ် လၢအကထိတဖၣ် သုးလီၫ်သုးကျဲဆူ တၫ်လီၫ်ထီၣ်ထီတကပၤ ဖဲလါမ့ၤ(၂၆)သီနံၤန့ၣ်လီၤ.
ဆဲၣ်ကလိ(ဆိုင်ကလုန်း) Remal လၢကနုာ်လီၤအူ ကီၫ်ဘ့ကလါဒ့းရှ်(ဘင်္ဂလားဒေ့ရှ်နိုင်ငံ)ဒီး ကီၫ်အ့ဒံယါ(အိန္ဒိယ)အံၤ တနၣ်ရံၣ်အတီၫ်ပူၤ အူတၫ်အသဟီၣ်ကအိၣ်၀ဲ (၁၃၀)ကံၣ်လိၣ်မံထၢၣ်အဂ့ၫ် ဘ့ကလါဒ့းရှ် မူခိၣ်ကလံၤသီၣ်ဂီၤ၀ဲၤကျိၤ တယာ်ဃာ်၀ဲလီၤ.
ကီၫ်ဘ့ကလါဒ့းရှ် လၢအိၣ်လၢတၫ်လီၫ်လီၤဘံအလီၫ်အံၤ ဆဲၣ်ကလိကလံၤမုၫ်အဃိ ဖဲအပူၤကွံာ် အနံၣ်စှၤဆံ အတီၫ်ပူၤစ့ၫ်ကီး ပှၤဘၣ်သံလၢအကထိဂၤညါလီၤ. ဘၣ်ဆၣ်သနာ်က့ ပီၣ်လဲၣ်နံၤဟီၣ်က၀ီၤ လၢပှၤအိၣ်အါအံၤ ဖဲတယံာ်ဒံးဘၣ်အပူၤ မူခိၣ်ကလံၤသီၣ်ဂီၤ ဆီတလဲသးအဃိ ကလံၤနုၫ်လၢအူတၫ်အသဟီၣ်ဆူၣ် တနံၣ်န့ၣ် ဟဲနုာ်လီၤအူတၫ် အိၣ်၀ဲခံဘျီ, သၢဘျီညါအဂ့ၫ်တဲ၀ဲလီၤ.
ဆဲၣ်ကလိ Remal အံၤ အူတၫ်အသဟီၣ်ကဆူၣ်အဃိ ဘၣ်မူဘၣ်ဒါတဖၣ် ဟ့ၣ်ပလီၫ်ကလံၤမုၫ်တၫ်ပလီၫ်၀ံၤ ပှၤမၤညၣ်ဖိလၢပီၣ်လဲၣ်ပူၤတဖၣ်စ့ၫ်ကီး သုတလဲၤဖီၣ်ညၣ်အဂီၫ် တၫ်တြီဃာ်အ၀ဲသ့ၣ်န့ၣ်လီၤ.
ပှၤရိၣ်ဟ့ၣ်ကၠၣ်ဖိ(၃၆၀၀၀)ဂၤ လၢအိၣ်ကဒုလၢတၫ်လီၫ်လီၤဘံ ဖဲ Bhashan Char ကီး စ့ၫ်ကီး တၫ်တ့န့ၫ်ဃာ် တၫ်အိၣ်ကဒုလီၫ်(၅၇)ခါ၀ံၤလံအဂ့ၫ် ဘၣ်ထွဲပှၤဘၣ်ကီဘၣ်ခဲ ပှၤဘၣ်မူဘၣ်ဒါခံဂၤတဂၤ Mohammad Rafiqul Haque တဲ၀ဲလီၤ. ကီၫ်ဘ့ကလါဒ့းရှ် အ၀့ၫ်ဒိၣ်ကတၢၫ် သၢ၀့ၫ်တ၀့ၫ်လၢအမ့ၫ် ၀့ၫ်စံးတကီ(စစ်တကောင်းမြို့) အကဘီသန့ဒီး ကဘီယူၤသန့တဖၣ်စ့ၫ်ကီး ဘၣ်တၫ်ကးတံာ်ဃာ်၀ဲအဂ့ၫ် ဘၣ်မူဘၣ်ဒါတဖၣ်တဲ၀ဲလီၤ.
ref:voa
