လါမ့ၤ(၂၇)သီ, ၂၀၂၄နံၣ်
ဖဲ၂၀၂၄နံၣ်, လါမ့ၤ(၂၄)သီအနံၤ, သုးကီၣ်ကးအပှၤသုးဖိတဖၣ်လဲၤနုာ်လီၤဖဲ မကွ့ကီၫ်ခီ, စလ့ကီၫ်ဆၣ်(စလင်းမြို့နယ်), ကိခၠါသ၀ီ၀ံၤ ဒွဲၣ်အူမၤဟးဂီၤကွံာ် ကမျၢၫ်အိၣ်ဟံၣ်ဃီ(၈၀)ဘျဲၣ်အဂ့ၫ် လီၫ်က၀ီၤကမျၢၫ်တဖၣ် တဲ၀ဲဖဲ လါမ့ၤ(၂၆)သီအနံၤန့ၣ်လီၤ.
သုးကီၣ်ကးအသုးလၢ လဲၤနုာ်လီၤဒွဲၣ်အူမၤဟးဂီၤကွံာ် ကမျၢၫ်အိၣ်ဟံၣ်ဃီန့ၣ် မ့ၫ်ၡီးပ့ၣ်အ့သ၀ီ(ရှောက်ပင်အင်းရွာ)အကပၤ တၫ်ထုးထီၣ်တၫ်ဒီသဒၢတၫ်ပီးတၫ်လီစဲးဖီကဟၣ်(ကာကွယ်ရေးပစ္စည်းထုတ်စက်ရုံ) ကပစ(၂၁)သုးကျိၤအဂံၫ်အဘါ(၆၀)အိၣ်သုးကျိၤအဂ့ၫ် စံး၀ဲန့ၣ်လီၤ.
တၫ်ဖီၣ်န့ၫ်ဆူၣ် လီၫ်က၀ီၤကမျၢၫ်တအိၣ်၀ဲဘၣ်ဆၣ် ဟံၣ်ဃီတဖၣ်ဒီး တၫ်ပာ်ကီၤဘူဒၢး(စပါးသိုလှောင်ထားတဲ့အိမ်)တဖၣ်မ့ၣ်အူအီၣ်ဟးဂီၤကွံာ်၀ဲအဂ့ၫ် စလ့လီၫ်က၀ီၤဖိတဂၤလၢ တအဲၣ်ဒိးပာ်ဖျါအမံၤတဂၤ တဲ၀ဲန့ၣ်လီၤ.
“နုာ်လီၤလၢသ၀ီပူၤ ယံၤဒၣ်(၂)နၣ်ရံၣ်ဃၣ်ဃၣ်လီၤ. အ၀ဲသ့ၣ်နုာ်လီၤလၢသ၀ီပူၤလံန့ၣ် ခးကျိဖးဒိၣ်တဘျီဃီလီၤ. ဟံၣ်ဃီလၢထံၣ်၀ဲန့ၣ် ဒွဲၣ်အူကွံာ်ခဲလၢာ်လီၤ. ဟံၣ်ဃီတဖၣ်အိၣ်ဘူးလိာ်သးအသိး ကလံၤအကျိၤဒၢးဘၣ်အဃိ မ့ၣ်အူစိာ်ခီ၀ံၤအီၣ်ကွံာ်၀ဲခဲလၢာ်န့ၣ်လီၤ.”
ကိခၠါသ၀ီအံၤ ဟံၣ်ဃီအိၣ်၀ဲဘူးထီၣ်အဖျၢၣ်(၂၀၀)ဒီး ပှၤနီၣ်ဂံၫ်အိၣ်၀ဲ(၉)ကယၤဘျဲၣ်၀ံၤ သုးကီၣ်ကးသုးကျိၤတဖၣ် က့ၤဟးထီၣ်၀ဲအဃိ ဖဲလါမ့ၤ(၂၆)သီအနံၤလံၤလံၤ က့ၤနုာ်လီၤအိၣ်ဆိး၀ဲလၢသ၀ီပူၤအဂ့ၫ် စံး၀ဲန့ၣ်လီၤ.
မ့မ့ၫ်လၢသုးကီၣ်ကး တၫ်ကစီၣ်ဒီး တၫ်ဘိးဘၣ်ရၤလီၤကိတိာ်၀ဲၤကျိၤ(စစ်ကောင်စီပြန်ကြားရေးဝန်ကြီးဌာန)တပၤတခီ ဖဲလၢကီၫ်ဆၣ်စလ့, ကိခၠါသ၀ီအပူၤ သုးကီၣ်ကးအပှၤသုးဖိတဖၣ် နုာ်လီၤဒွဲၣ်အူတၫ်တအိၣ်၀ဲဘၣ်ဒီး တၫ်ကစီၣ်သန့တဖၣ် ကွဲးပာ်ဖျါထီၣ်တဖၣ်န့ၣ် မ့ၫ်ဒၣ်တၫ်ကစီၣ်အကမၣ်လီၤအဂ့ၫ် ပာ်ဖျါဃာ်၀ဲဖဲလါမ့ၤ(၂၅)သီအနံၤန့ၣ်လီၤ.
ကိခၠါဒူသ၀ီကမျၢၫ်ဖိတဖၣ်တခီ ဖဲလၢအ၀ဲသ့ၣ်သ၀ီအကပၤ PDF သုးကလၢၤတဖၣ်တအိၣ်၀ဲအသိး ကမျၢၫ်တၫ်ဒီသဒၢသုးတပၤ ဒုးယၤရဲၣ်ကျဲၤတၫ်ဟူးတၫ်ဂဲၤတဖၣ်စ့ၫ်ကီးတအိၣ်၀ဲဘၣ်အဂ့ၫ် ဂ့ၫ်လိာ်ဃာ်၀ဲန့ၣ်လီၤ.
ref:rfa
