လါမ့ၤ(၂၇)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူပျာ်ယာ်, ကီၫ်ဆၣ်ကီးတရံး, ဖိခၠံၣ်မုၣ်(ဖူ့ချိမူ)သုးကလၢၤတၫ်ဒုးအပူၤတၫ်ဖီၣ်န့ၫ်မူဒံး သုးကီၣ်ကးအပှၤသုးဖိ(၄၈)ဂၤ၀ံၤ တၫ်မၤန့ၫ်စ့ၫ်ကီးစုက၀ဲၤ(၅၀)ဘျဲၣ်အဂ့ၫ် ကမျၢၫ်တၫ်ဒီသဒၢသုး, ဒုးယၤရဲၣ်ကျဲၤလီၤဆီသုး(SOF) ထုးထီၣ်ပာ်ဖျါဃာ်၀ဲန့ၣ်လီၤ.
ဖဲလါမ့ၤ(၁၈)သီအနံၤန့ၣ် ကညီဒီကလုာ်တၫ်ထူၣ်ဖျဲၣ်သုးမုၫ်ဒိၣ် (KNLA), (SOF) ဒီးသုးပာ်ဖှိၣ်တဖၣ် စးထီၣ် ထီၣ်ဒုး၀ဲဖိခၠံၣ်မုၣ်သုးကလၢၤ(ဖူ့ချိမူစခန်း)အံၤ ဒီးဖဲလါမ့ၤ(၁၉)သီအနံၤန့ၣ် တၫ်ထီၣ်ဒုးမၤန့ၫ်၀ဲန့ၣ်လီၤ.
ကီၫ်ပယီၤ-ကီၫ်ကၠီၣ်တဲၣ်ကီၫ်ဆၢအိၣ် ဖိခၠံၣ်မုၣ်သုးကလၢၤအံၤ အိၣ်၀ဲဒၣ်ဖဲ နီၣ်ဂံၫ်(၁၃)ဒုးယၤရဲၣ်ကျဲၤတၫ်ပၢဆှၢရဲၣ်ကျဲၤသုး၀ဲၤလီၫ်ခိၣ်သ့ၣ် အဖီလာ်(အမှတ် ၁၃ စစ် ဆင်ရေး ကွပ်ကဲမှုဌာနချုပ်လက်အောက်ခံ) ခီၣ်ချ့သုးရ့ၣ်(၅၅၇), ခီၣ်ချ့သုးရ့ၣ်(၅၆၁)ဒီး ကျိဖဒိၣ်သုး(၃၉၉)တဖၣ်အပူၤ သုးအဂံၫ်အဘါတနီၤတၫ်ထုးထီၣ်ပာ်ဖှိၣ်၀ံၤ အိၣ်ဆီလီၤပာ်သးသုးကလၢၤတဖျၢၣ်ဒီး တၫ်ဒုးတဖၣ်အပူၤ သုးကီၣ်ကးအပှၤသုးဖိသံ၀ဲ(၂၀)ဂၤဒီး (၂၆)ဂၤလဲၤဃ့ၫ်နုာ်လီၤဆူ ကၠီၣ်တဲၣ်တပၤအဂ့ၫ် SOFစံး၀ဲန့ၣ်လီၤ.
သုးကီၣ်ကးအပှၤသုးဖိတနီၤ လၢဃ့ၫ်ပူၤဖျဲးသးတဖၣ်အံၤ ဖဲလၢဃ့ၫ်ပူၤဖျဲးသးကျဲကတီၫ် ခးသံ၀ဲစ့ၫ်ကီး မိၫ်ဒၢ(ကိုယ်ဝန်ဆောင်မိခင်) (၁)ဂၤ ဒီးကမျၢၫ်ပိာ်ခွါ(၃)ဂၤအဂ့ၫ် ပာ်ဖျါဃာ်၀ဲန့ၣ်လီၤ.
ဖိခၠံၣ်မုၣ်သုးကလၢၤအံၤ မ့ၫ်သုးကလၢၤတဖျၢၣ်လၢ အိၣ်ဆီလီပာ်သးဖဲ ကီၫ်ဆၣ်ကီးတရံးဟီၣ်က၀ီၤ ကၠီၣ်တဲၣ်-ပယီၤကီၫ်ဆၢဒီတကျိၤအပူၤ သုးကလၢၤလၢအိၣ်တ့ၫ်အကျါ မ့ၫ်လီၫ်ခံကတၢၫ်သုးကလၢၤတဖျၢၣ်၀ံၤ KNLA၊ SOFဒီး သုးပာ်ဖှိၣ်တဖၣ် ပၢဆှၢဃာ်၀ဲ ကီၫ်ဆၢဟီၣ်က၀ီၤလၢလၢပှဲၤပှဲၤလီၤအဂ့ၫ် SOF စံး၀ဲန့ၣ်လီၤ.
တချုးလၢတၫ်ထီၣ်ဒုးမၤန့ၫ် ဖိခၠံၣ်မုၣ်သုးကလၢၤဒံးဘၣ်န့ၣ် ကီၫ်ဆၢဟီၣ်က၀ီၤအပူၤ သုးကီၣ်ကးအသုးကလၢၤ လၢအိၣ်ဆီလီၤပာ်သးတဖၣ်လၢအမ့ၫ် ယ့ၣ်သယီးသုးကလၢၤ(ရေသလျောက်တပ်စခန်း), မဲၫ်သရီထၣ်သုးကလၢၤ(မယ်သရောထတပ်စခန်း)ဒီး ကွံလိၣ်တဲၣ်သုးကလၢၤ(ကွီးလုံတိုင်တပ်စခန်း)တဖၣ် KNLA ဒီးသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲန့ၣ်လီၤ.
photo:SOF
