လါမ့ၤ(၂၇)သီ, ၂၀၂၄နံၣ်
ကီၫ်စဲၣ်ရခၢၣ်ပူၤ မူၤစလ့ၣ်ဖိပာ်ဃုာ် ဘၣ်ထွဲဒီးကမျၢၫ်တၫ်အိၣ်သးတဖၣ် အမဲရကၤ, ယူရပၤထံကီၫ်စၢဖှိၣ်ပာ်ဃုာ် ထံကီၫ်(၁၀)ဘ့ၣ်, ဘီမုၫ်စၢဖှိၣ်ကရၢ IIMMဒီး ဘၣ်ထွဲကီၫ်ပယီၤ တၫ်ဟ့ၣ်ကူၣ်တၫ်လီၤဆီကီၣ်ကး(မြန်မာနိုင်ငံဆိုင်ရာ အထူးအကြံပေး ကောင်စီ) ဘၣ်ယိၣ်၀ဲအဂ့ၫ် ထုးထီၣ်သကိးတၫ်ဘိးဘၣ်ရၤလီၤစုာ်စုာ်န့ၣ်လီၤ.
အမဲရကၤ, ယူရပၤကီၫ်စၢဖှိၣ်, အီးစထြ့လယါ(သြစတြေးလျ), ခဲနဒၣ်(ကနေဒါ), ကလံၤထံးခိၣ်ရံယါ(ကိုရီးယားသမ္မတနိုင်ငံ), မီၣ်တၣ်(မော်တာ), နယူစံၣ်လၣ်(နယူးဇီလန်), နီၣ်၀့(နော်ဝေ), စွံးစလၣ်(ဆွစ်ဇာလန်), ယူၣ်ခ့ၣ်(ယူကေ)ထံကီၫ်တဖၣ် တဲ၀ဲလၢ ကီၫ်ပယီၤပူၤ တၫ်သဘံၣ်သဘုၣ်လၢ ဟဲအိၣ်အါထီၣ်ဒီး ထံကီၫ်ဒီတဘ့ၣ် ပှၤဂ့ၫ်၀ီခွဲးယာ်လၢလီၤပျံၤလီၤဖုးဒီး ဟီၣ်ခိၣ်ဖိတၫ်မၤစၢၤတၫ်ဃံးတၫ်စ့ၤတဖၣ်အဂီၫ် ဘၣ်ယိၣ်၀ဲအဂ့ၫ် ဘိးဘၣ်ရၤလီၤ၀ဲလီၤ.
ကီၫ်စဲၣ်ရခၢၣ်ပူၤ တၫ်အိၣ်သးန့ၣ် ရခၢၣ်, မူၤစလ့ၣ်ဒီး ကလုာ်ဒူၣ်အဂၤပာ်ဃုာ် ထံဖိကီၫ်ဖိကမျၢၫ်အဂီၫ် တၫ်လီၤဘၣ်ယိၣ်အိၣ်အါထီၣ်အဂ့ၫ်, တၫ်ကရၢကရိလၢမူဒါအိၣ်တဖၣ် ကဘၣ်ဒီသဒၢန့ၫ် တၫ်လၢကမျၢၫ်အဂီၫ် တၫ်ဘိးဘၣ်ရၤလီၤပူၤပာ်ဖျါ၀ဲလီၤ.
ကီၫ်ပယီၤပူၤ တၫ်မၤအၢမၤသီတဖၣ်အဂီၫ် တၫ်ဟံးန့ၫ်မူဒါကဘၣ်အိၣ်၀ဲအဂ့ၫ်, တၫ်သုတဆါန့ၫ် ကီၫ်ပယီၤသုး ကဘီယူၤသိပာ်ဃုာ် တၫ်စုက၀ဲၤတဖၣ် တၫ်တြီဃာ်ကန့ၫ်အဂီၫ် တဲဆီၣ်တခူထီၣ်ဃာ်၀ဲ ထံဂုၤကီၫ်ဂၤတဖၣ်န့ၣ်လီၤ.
ပှၤလၢဘၣ်တၫ်ဖီၣ်န့ၫ်ဆူၣ်အီၤလၢ တဖိးမံဒီးတၫ်ဘျၢတဖၣ် တၫ်ကပျၫ်ကွံာ်အီၤအဂီၫ်, အၣ်စံၣ်ယၣ်ကရၢ အတၫ်အၢၣ်လီၤ(၅)ထံၣ် တၫ်ကဒုးအိၣ်ထီၣ်ဘၣ် အမိၫ်လံၤမိၫ်ပှၫ်အဂီၫ် သုးကီၣ်ကး ကဘၣ်မၤထွဲ၀ဲအဂ့ၫ် တဲ၀ဲလီၤ. တၫ်ဒုးအိၣ်ထီၣ်ကဒါက့ၤ ဒံၣ်မိၣ်ကရ့ၣ်စံၣ်ကန့ၫ်အဂီၫ် ပှၤအါဂၤပာ်ဃုာ် တၫ်ထံၣ်လိာ်တဲသကိးတဖၣ် တၫ်ကဒုးအိၣ်ထီၣ်အဂီၫ် ဃ့ထီၣ်ဃာ်၀ဲ တၫ်ကရၢကရိ လၢဘၣ်ထွဲခဲလၢာ်န့ၣ်လီၤ.
ကီၫ်ပယီၤထံဖိကီၫ်ဖိကမျၢၫ်တဖၣ်အဂီၫ် ပှၤခဲလၢာ်ပာ်ဃုာ်၀ံၤ ဒံၣ်မိၣ်ကရ့ၣ်စံၣ် ကအိၣ်ထီၣ်အဂီၫ် ကဖီၣ်လိာ်စုမၤသကိးတၫ်အဂ့ၫ် အမဲရကၤပာ်ဃုာ် ထံကီၫ်(၁၀)ဘ့ၣ် ပာ်ဖျါ၀ဲလီၤ.
တကးဘၣ် ကီၫ်စဲၣ်ရခၢၣ်ပူၤ တၫ်ဒုးတၫ်ယၤလၢဆူၣ်ထီၣ်တဖၣ် အိၣ်ခိးကွၫ်၀ဲ၀ံၤ ဟီၣ်ခိၣ်ဖိစၢၤသွဲၣ်အဖီခိၣ် ကွီၫ်မ့ၣ်တၫ်မၤကမၣ်တဖၣ်, သုးကွီၫ်မ့ၣ်တၫ်မၤကမၣ်အိၣ်တအိၣ် သမံသမိး၀ဲအဂ့ၫ် ဘၣ်ထွဲကီၫ်ပယီၤ တၫ်ဃုထံၣ်သ့ၣ်ညါကရၢသဘျ့(IIMM) ပှၤဘၣ်မူဘၣ်ဒါ Nicholas Koumjian ဘိးဘၣ်ရၤလီၤ၀ဲဖဲလါမ့ၤ(၂၃)သီနံၤန့ၣ်လီၤ.
ကီၫ်ဆၣ်ဘူသံတီၣ်ပူၤ တၫ်မၤအၢမၤသီဒီး တၫ်ဒွဲၣ်အူထီၣ်ဟံၣ်ဃီတဖၣ်အဃိ ပှၤမူၤစလ့ၣ်ဖိကမျၢၫ်လၢအကထိ ဘၣ်သုးလီၫ်သုးကျဲတၫ်ဂ့ၫ်တဖၣ် ပာ်ဃုာ်၀ဲလီၤ.
တၫ်ဒုးတဘျီအံၤ ရခၢၣ်ဒီး ဟ့ၣ်ဒူၣ်ကမျၢၫ်တဖၣ်စ့ၫ်ကီး ဘၣ်ဒိဘၣ်ထံဃုာ်၀ဲအဂ့ၫ်, တၫ်သဘံၣ်သဘုၣ် တဖၣ်ကဲထီၣ်လၢထံကီၫ်ဒီတဘ့ၣ်အပူၤတပယူာ်ဃီအသိး, ကီၫ်ပယီၤပူၤ တၫ်လီၫ်လၢအဂၤတဖၣ်စ့ၫ်ကီး တၫ်မၤကမၣ်လၢတၫ်ပာ်ပနီၣ်အီၤသ့ဒ် ထံဂုၤကီၫ်ဂၤကွီၫ်မ့ၣ်တၫ်မၤကမၣ် တၫ်ဂ့ၫ်တၫ်ကျိၤတၫ်အုၣ်ကီၤတဖၣ် တၫ်ထၢဖှိၣ်အီၤအိၣ်၀ဲအဂ့ၫ် (IIMM) ပှၤဘၣ်မူဘၣ်ဒါ Nicholas Koumjianတဲ၀ဲလီၤ.
ဘၣ်ထွဲကီၫ်ပယီၤ ပှၤဟ့ၣ်ကူၣ်တၫ်လီၤဆီကီၣ်ကး SAC-M စ့ၫ်ကီးတဲ၀ဲလၢ ကီၫ်စဲၣ်ရခၢၣ်ပူၤ ပှၤမူၤစလ့ၣ်ဖိတဖၣ် ကွၫ်ဆၢၣ်မဲာ်ဘၣ်ကဒီး တၫ်မၤသံလီၤတူာ်ကလုာ်ဒူၣ်စၢၤသွဲၣ် (လူမျိုးတုန်း သတ်ဖြတ်မှု အန္တရာယ်) တၫ်ဘၣ်ယိၣ်ဘၣ်ဘှီတဖၣ်လီၤ. ဘီမုၫ်စၢဖှိၣ်ကရၢ ပှၤဂ့ၫ်၀ီခွဲးယာ်တကပၤ ကီၫ်ပယီၤပူၤ ပှၤဂ့ၫ်၀ီခွဲးယာ်လၢဟဲအၢထီၣ်အံၤ ဂ့ၫ်ဂီၫ်အူတၫ်ဘှါဆှဲအီၤကန့ၫ်အဂီၫ်, တၫ်ကမၤန့ၫ်ဘၣ် ဂ့ၫ်ဂီၫ်အူတၫ်အိၣ်ဖှိၣ်တတီၤအဂီၫ် ဖဲလါမ့ၤ(၁၉)သီနံၤန့ၣ် ဃ့ထီၣ်ဃာ်၀ဲလီၤ.
ref:westrennews
