လါမ့ၤ(၂၄)သီ, ၂၀၂၄နံၣ်
တနီသရံၣ်ကီၫ်ခီအပူၤ တၫ်ပၢၫ်ဆၢသုးအဖု(၈၀)ဘျဲၣ် သုးဂ့ၫ်၀ီကပာ်ဖှိၣ်မၤသကိးတၫ်အဂီၫ် ပာ်ဖှိၣ်ဃာ်၀ဲအဂ့ၫ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) အသုးရ့ၣ်ခိၣ်သဃဲၤ စီၤမူဂ့ၤတဲ၀ဲလီၤ. တၫ်ပၢၫ်ဆၢသုးတဖၣ်န့ၣ် မ့ၫ်ပှၤတဖၣ်လၢ အိၣ်ဖဲဘျံးဒ၀ဲၫ်တၫ်လီၫ်တဖၣ်အပူၤ၀ံၤ တၫ်ပာ်ဖှိၣ်အီၤ ကယီကယီ၀ံၤအလီၫ်ခံ အိၣ်ထီၣ်၀ဲအဖု(၈၀)ဘျဲၣ်အဂ့ၫ် KNLA သုးရ့ၣ်-၁၂, သုးက့နီၫ်ဂံၫ်(၄)ဒီး သုးရ့ၣ်-၂၇, သုးက့နီၫ်ဂံၫ်-၆ အသုးရ့ၣ်ခိၣ်သဃဲၤ စီၤမူဂ့ၤတဲ၀ဲလီၤ.
တၫ်ပၢၫ်ဆၢသုးပာ်ဖှိၣ်အပူၤ ကညီဒီကလုာ်စၢဖှိၣ်ကရၢ-KNU, သုးက့နီၫ်ဂံၫ်(၄)ဒီး သုးက့နီၫ်ဂံၫ်(၆) KNLAသုးရ့ၣ်, သုးဖိတဖၣ်, ကီၫ်သူလ့ၤသုးမုၫ်ဒိၣ်(KTLA)သုးတဖၣ်, NUGအစုတီၤဖီလာ် ကမျၢၫ်တၫ်ဒီသဒၢသုးတဖၣ်, ကီၫ်ဆၣ် (ပကဖ)ကရၢ ကမျၢၫ်တၫ်ဒီသဒၢသုး, Local PDFဒီး ဒရိသုးတဖၣ် ပာ်ဃုာ်၀ဲန့ၣ်လီၤ. လၢဒုးယၤဂ့ၫ်၀ီတၫ်ပာ် ဖှိၣ်မၤသကိးတၫ်အဂီၫ်တခီ KNLA သုးရ့ၣ်-၁၂, သုးက့နီၫ်ဂံၫ်(၄)ဒီး သုးရ့ၣ်-၂၇, သုးက့နီၫ်ဂံၫ်-၆ အသုးရ့ၣ်ခိၣ်သဃဲၤ စီၤမူဂ့ၤ ကတီခိၣ်ရိၣ်မဲ၀ဲလီၤ.
ဒုးယၤဂ့ၫ်၀ီတၫ်ရဲၣ်တၫ်ကျဲၤ တၫ်ပာ်ဖှိၣ်မၤသဃဲၤအီၤအပူၤ မၤ၀ဲဒ် KNLA အသုးဂ့ၫ်၀ီတၫ်တီခိၣ်ရိၣ်မဲအိၣ်အသိး, မၤလီၤဆီ၀ဲအိၣ်၀ဲန့ၣ်လီၤ. ဒ၀ဲၫ်(ထား၀ယ်)ဒီး ကီၫ်ဆၣ်လိလိၣ်(လောင်းလုံးမြို့နယ်)တဖၣ်အပူၤ ကမျၢၫ်တၫ်ဒီသဒၢသုး တဖၣ်တခီ ကီၫ်ရ့ၣ်ဒ၀ဲၫ်(ထားဝယ်ခရိုင်)ပူၤ ကီၫ်ဆၣ်(၄)ဘ့ၣ် ကမျၢၫ်တၫ်ဒီသဒၢသုးခဲလၢာ်ဃာ်ဃာ် ပာ်ဖှိၣ်မၤသကိး ဒုးယၤဂ့ၫ်၀ီဃုာ်ဒီး KNLA အိၣ်၀ဲအဂ့ၫ်တဲ၀ဲလီၤ.
သုးပာ်ဖှိၣ်တဖၣ်အံၤ လၢတနံၣ်အံၤ(၅)လါအတီၫ်ပူၤ ထီၣ်ဒုးမၤန့ၫ်ဃာ်၀ဲ ကၠီးထူးသုးကလၢၤ(ကျောက်ထုစစ်ကောင်စီ စခန်း), မီထၣ်သုးကလၢၤ, ယီမီၣ်သ၀ီ(ရောင်းမော်ရွာ)သုးကီၣ်ကးအသုးကလၢၤ, ပဲးဒဲး(ပဲဒက်)သ၀ီသုးကီၣ်ကး သုးကလၢၤဒီး ကၠီးဆဲၣ်သ၀ီ(ကျောက်ဆည်ရွာ)ပၠူၣ်စီထံသုးကလၢၤတဖၣ်န့ၣ်လီၤ.
တၫ်အိၣ်သးဒ်သိးအံၤအဃိ သုးကီၣ်ကးအသုးတဖၣ်စ့ၫ်ကီး လၢတနံၣ်အံၤ ဟဲခးလီၤအါထီၣ်တၫ်လၢ ကလံၤကျါ, ထံကျါ၀ံၤ သုးကီၣ်ကးအသုးတဖၣ် ဂုၫ်ကျဲးစၢးမၤန့ၫ်က့ၤ၀ဲ ပဲဒဲးသုးကလၢၤ(ပဲဒက်စခန်း)အဂ့ၫ် တၫ်ပၢၫ်ဆၢသုးတဖၣ်တဲ၀ဲလီၤ.
ref:The Tanintharyi Times
