လါမ့ၤ(၂၄)သီ, ၂၀၂၄နံၣ်
၀့ၫ်တကူၣ်-မီၣ်လမၠဲၣ်ကျဲမုၫ်(ရန်ကုန်-မော်လမြိုင်လမ်း), ဘံလ့-ကၠဲးကီၫ်အဘၢၣ်စၢၤ, တီၣ်ကလ့သ၀ီအကပၤ မစီတိၤ(မစောတံတား) တၫ်ထုးမၤဟးဂီၤကွံာ်အီၤလၢမ့ၣ်ပိၫ်၀ံၤ ပှၤသံ(၁)ဂၤ ဒီးဘၣ်ဒိ၀ဲ(၃)ဂၤအဂ့ၫ် တၫ်သ့ၣ်ညါဘၣ်န့ၣ်လီၤ.
မစီတိၤအံၤ ဖဲမဟါလါမ့ၤ(၂၃)သီအနံၤ ဂီၤ(၂)နၣ်ရံၣ်ဃၣ်ဃၣ်အဆၢကတီၫ် တၫ်လဲၤထုးအီၤလၢမ့ၣ်ပိၫ်အဃိ ကၫ်ကွံာ်ခံကဒါအဂ့ၫ်, တိၤဟးဂီၤကွံာ်၀ံၤအလီၫ်ခံ ဖဲလၢဂီၤအဆၢကတီၫ် မီၣ်တီၣ်တုာ်(၃)ခိၣ်တၫ်နီၣ်အီၤချ့တလၢအဃိ လဲၤလီၤတဲာ်၀ဲဖဲတိၤအဖီလၣ်၀ံၤ သံ၀ဲ(၁)ဂၤဒီးဘၣ်ဒိ၀ဲ(၃)ဂၤအဂ့ၫ် တၫ်သ့ၣ်ညါဘၣ်န့ၣ်လီၤ.
“ဟါ(၂)နၣ်ရံၣ်ဘျဲၣ်ဃၣ်ဃၣ်အဆၢကတီၫ် တိၤကၤကွံာ်၀ဲ, ပှၤလၢတသ့ၣ်ညါတိၤကၤတဖၣ် နီၣ်၀ဲမီၣ်တီၣ်တုာ်ဒီး ပတုာ်၀ဲတန့ၫ်ဘၣ်ဘျီ လီၤတဲာ်လၢတိၤဖီလာ်လီၤ. သံ(၁)ဂၤ, ပှၤဘၣ်ဒိတဖၣ်အိၣ်၀ဲဒီး ပှၤလၢသံတဖၣ်စ့ၫ်ကီးအိၣ်၀ဲလီၤ. ပာ်ဖှိၣ်ခဲလၢာ်(၄)ဂၤန့ၣ်လီၤ. ပကိဒီးမိၣ်ပလ့ၣ်တပၤလီၤ.” အဂ့ၫ် ၀့ၫ်တီၣ်ပူၤ(ဘီးလင်း) တၫ်မၤစၢၤပှၤတ၀ၢကရၢ ပှၤဘၣ်မူဘၣ်ဒါတဂၤစံး၀ဲန့ၣ်လီၤ.
ပှၤလၢလီၤတဲာ်သံဖဲတိၤဟးဂီၤအဖီလာ်န့ၣ် မ့ၫ်ပိာ်ခွါ၀ံၤ ပှၤလၢဘၣ်ဒိဘၣ်ထံးတဖၣ်အကျါ ပိာ်မုၣ်(၁)ဂၤဒီး ပိာ်ခွါ(၂)ဂၤပာ်ဃုာ်၀ဲအဂ့ၫ်, ကတီၫ်ခဲအံၤ တၫ်ဆှၢပာ်အ၀ဲသ့ၣ်ဆူ ၀့ၫ်တီၣ်ပူၤတၫ်ဆါဟံၣ်န့ၣ်လီၤ.
မစိၤတိၤအံၤအိၣ်၀ဲဒၣ်ဖဲ ၀့ၫ်တကူၣ်-မီၣ်လမၠဲၣ်သိလ့ၣ်ကျဲမုၫ်အဖီခိၣ်အဃိ ကတီၫ်ခဲအံၤသိလ့ၣ်တဖၣ် လ့ၤလိၤဟးထီၣ်၀ဲတန့ၫ်လၢၤဘၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲအပူၤကွံာ်လါအ့ဖြ့ၣ်(၁၁)သီအနံၤစ့ၫ်ကီး ၀့ၫ်တကူၣ်-မီၣ်လမၠဲၣ်ကျဲမုၫ်အဖီခိၣ် တပျဲကျိၤတိၤ(ကျုံအိတ်တံတား) တၫ်ထုးမၤဟးဂီၤကွံာ်လၢမ့ၣ်ပိၫ်၀ံၤ သိလ့ၣ်တဖၣ်လ့ၤလိၤဟးထီၣ်၀ဲတန့ၫ်လၢၤဘၣ်အဃိ တၫ်တ့န့ၫ်ဃာ်၀ဲဟီၣ်ခိၣ်ကပံာ်ကျဲအဂ့ၫ် တၫ်သ့ၣ်ညါဘၣ်န့ၣ်လီၤ.
ref:vom
