လါမ့ၤ(၂၄)သီ, ၂၀၂၄နံၣ်
ဖဲ ၂၀၂၄နံၣ်, လါမ့ၤ(၁၈)သီအနံၤဒီး(၁၉)သီအနံၤ (၂)သီအတီၫ်ပူၤ တၫ်မၤ၀ဲကညီကလုာ်စၢၤသွဲၣ်ခိၣ်နၫ်တဆီဘၣ်တဆီ တၫ်တီခိၣ်ရိၣ်မဲတၫ်အိၣ်ဖှိၣ်ဖးဒိၣ် တၫ်ရဲၣ်တၫ်ကျဲၤတခါအဂ့ၫ် (Karen Intergenerational Leadership Conference-KILC) Facebook လံာ်ကဘျံးပၤအပူၤ ပာ်ဖျါဃာ်၀ဲန့ၣ်လီၤ.
တၫ်မၤ၀ဲတၫ်အိၣ်ဖှိၣ်ဖးဒိၣ်အမူးတၫ်ရဲၣ်တၫ်ကျဲၤအံၤ “တၫ်ပညိၣ်၀ဲလၢ ကညီကလုာ်စၢၤသွဲၣ်ခိၣ်နၫ်တဖၣ်အဘၢၣ်စၢၤ တၫ်ပာ်ဖှိၣ်မၤသကိး, တၫ်ဟ့ၣ်ဂံၫ်ဟ့ၣ်ဘါပှၤသးစၫ်တဖၣ်ဒီး ခါဆူညါကီၫ်သူလ့ၤအဂီၫ် တၫ်မၤဂ့ၤထီၣ်ခီၣ်တဃၣ်ဂၢၫ်ကျၢၫ်အံၤအဃိ တၫ်အိၣ်ဖှိၣ်အံၤအပူၤ ကတီၫ်ခဲအံၤတၫ်တၤတၫ်တဖၣ်လၢ ဘၣ်ကွၫ်ဆၢၣ်မဲာ်တၫ်တဖၣ်ဒီး တၫ်ကဒိးန့ၫ်ဘၣ် ကညီကမျၢၫ်တၫ်မုၫ်လၫ်ကွၫ်စိပာ်ဖှိၣ်အဂီၫ် တၫ်ဂုာ်ကျဲးစၢးတဖၣ် တၫ်ကထံၣ်ဘၣ်အဂီၫ်န့ၣ်လီၤ.”
တကးဒံးဘၣ် တၫ်ဂုာ်ကျဲးစၢးသူၣ်ထီၣ်န့ၫ်၀ဲစ့ၫ်ကီး ပှၤလၢကတီခိၣ်ရိၣ်မဲတၫ်တဂၤစုာ်စုာ်အကံၫ်အစီ, တၫ်သူၣ်ဆူၣ်သးဂဲၤဒီး တၫ်ကွၫ်စိတဖၣ်အဖီခိၣ် တၫ်နၫ်ပၢၫ်လိာ်သးကဒဲကဒဲကအိၣ်အဂီၫ်, တၫ်ပျဲတီခိၣ်ရိၣ်မဲအံၤအကါဒိၣ်၀ဲဒီး နီၫ်တဂၤစုာ်စုာ်အကံၫ်အစီလီၤဆီတဖၣ်အဖီခိၣ်န့ၣ်လီၤ. မ့ၫ်စ့ၫ်ကီးကညီကလုာ်စၢၤသွဲၣ်ခိၣ်နၫ်ကိးဂၤဒဲး ကပာ်ဃုာ်၀ဲလၢ ကညီနီၫ်ကစၫ်တၫ်စံၣ်ညီၣ်ပၢလီၤသးတၫ်ဒုးအပူၤ၀ံၤ တၫ်လဲၤထီၣ်လဲၤထီၣ်အဂီၫ် တၫ်ကတိစၢၤမၤစၢၤအဂီၫ်န့ၣ်လီၤ.
တၫ်အိၣ်ဖှိၣ်ဖးဒိၣ်အံၤ ကညီခိၣ်နၫ်လၢတၫ်လဲၤခီဖျိအိၣ်တဖၣ်ဒီး အကံၫ်အစီအိၣ်ကညီစၢၤသွဲၣ်ခိၣ်နၫ်တဖၣ်အဘၢၣ်စၢၤ တၫ်ဟ့ၣ်ခီဟ့ၣ်နီၤလိာ်သးတၫ်ထံၣ်တဖၣ်, တၫ်တၢၣ်ပီၣ်တဲသကိးတၫ်တၤတၫ်တဖၣ်ဒီး တၫ်ကသူၣ်ထီၣ်တၫ်ဆဲးကျိးလၢအိၣ်ဂၢၫ်ဆိးကျၢၫ်တခါအဂီၫ် ကဲထီၣ်၀ဲ (Platform) တခါစ့ၫ်ကီးန့ၣ်လီၤ.
အဆိကတၢၫ်ခီၣ်ခါတခါအံၤ တၫ်ကခီဂာ်ကတီၫ်ခဲအံၤတၫ်တၤတၫ်တဖၣ်၀ံၤ တၫ်ကတုၤဆူ ခါဆူညါတၫ်အီၣ်ကုးအီၣ်ပှဲၤအဂီၫ် တၫ်ကနဲၣ်န့ၫ်ကညီပှၤတ၀ၢဆူ တၫ်တီခိၣ်ရိၣ်မဲကျဲတခါအဂီၫ် မ့ၫ်ခီၣ်ခါလၢအကါဒိၣ်တခါအသိးအဂ့ၫ် စံး၀ဲန့ၣ်လီၤ.
(၂)သီအတီၫ်ပူၤ တၫ်မၤ၀ဲကညီကလုာ်စၢၤသွဲၣ်ခိၣ်နၫ်တဆီဘၣ်တဆီ တၫ်တီခိၣ်ရိၣ်မဲတၫ်အိၣ်ဖှိၣ်ဖးဒိၣ် တၫ်ရဲၣ်တၫ်ကျဲၤအပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကရၢခိၣ်ပဒိၣ်စီၤကွဲၤထူ၀့, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ နဲၣ်ရွၣ်ခိၣ်ကျၢၫ်ပဒိၣ်စီၤတၫ်ဒိၣ်မူ, SGPA ပှၤနဲၣ်တၫ်ဒီး ခ့ၣ်အဲၣ်ယူၣ်တၫ်မၤဂ့ၤထီၣ်တၫ်ပၢတၫ်ပြးအကံၫ်အစီကမံးတံာ်နဲၣ်ရွဲၣ်-သရၣ်စီၤကပံာ်ပာ်ဃုာ် ကညီခိၣ်နၫ်လၢ တၫ်လဲၤခီဖျိအိၣ်တဖၣ်တကးဒံးဘၣ် ကညီခိၣ်နၫ်သီခဲလၢာ်ပာ်ဖှိၣ်(၁၂၀)ဂၤလဲၤထီၣ်၀ဲအဂ့ၫ် ကွဲးဖျါဃာ်၀ဲန့ၣ်လီၤ.
photo:KILC
