ကမျၢၫ်တဖၣ်တၫ်ဃံးတၫ်စ့ၤဟဲဒိၣ်ထီၣ်ဒီး တၫ်ဒိးန့ၫ်လီမ့ၣ်အူၣ်လီၤစှၤအဃိ လၢ၀့ၫ်တကူၣ်တၫ်ပာ်ဖျါထီၣ်တၫ်ပာ်သး

လါမ့ၤ(၂၃)သီ, ၂၀၂၄နံၣ်

လၢ၀့ၫ်တကူၣ် တၫ်ဒိးန့ၫ်လီမ့ၣ်အူလီၤစှၤလီၤတၫ်တဖၣ်, ကမျၢၫ်တဖၣ်တၫ်ဃံးတၫ်စ့ၤတဖၣ်ဟဲဒိၣ်ထီၣ်အဃိ ၀့ၫ်တကူၣ်အိၣ်သူၣ်လီၤ သးစၫ်တၫ်ပာ်ဖျါတၫ်ပာ်သးဂံၫ်ဘါကရူၫ် ပာ်ဖျါထီၣ်တၫ်ပာ်သးဆူ သုးကီၣ်ကးအအိၣ် ဖဲလါမ့ၤ(၂၂)သီအနံၤန့ၣ်လီၤ.

ကမျၢၫ်ထံဖိကီၫ်ဖိတဖၣ် ဘၣ်ကွၫ်ဆၢၣ်မဲာ်ဘၣ်၀ဲဒီး တၫ်လုၫ်အီၣ်သးသမူအပူၤ တၫ်ဃံးတၫ်စ့ၤတဖၣ်ဟဲဒိၣ်ထီၣ်အဃိ ၀့ၫ်တကူၣ်တၫ်ထီဒါသုးမီၤစိရိၤဂံၫ်ဘါကရူၫ် (AJAY) ဒီး ရွ့ၣ်ပၠံၣ်သၣ်တၫ်ပာ်ဖျါတၫ်ပာ်သးကမံးတံာ်ပာ်ဃုာ် သးစၫ်တၫ်ပၢၫ်ဆၢကရၢတဖၣ် ပာ်ဖှိၣ်ပာ်ဖျါထီၣ်၀ဲတၫ်ပာ်သးန့ၣ်လီၤ.

လီမ့ၣ်အူၣ်ဒီၣ်တဲာ်ကွံာ်နးနးကျံးကျံးအဃိ ကမျၢၫ်တဖၣ်တၫ်ဃံးတၫ်စ့ၤတဖၣ်ဟဲဒိၣ်ထီၣ်အဃိ တၫ်ကထီဒါအီၤအဂီၫ် တၫ်ပာ်ဖျါတၫ်ပာ်သးဂံၫ်ဘါကရူၫ်တဖၣ် ဆီၣ်တခူထီၣ်၀ဲအဂ့ၫ် ၀့ၫ်တကူၣ် တၫ်ထီဒါသုးမီၤစိရိၤဂံၫ်ဘါကရူၫ် (AJAY) ကိၣ်နါလ့ (ကိုနန်းလင်း) တဲ၀ဲန့ၣ်လီၤ.

“လီမ့ၣ်အူတဟဲဘၣ်အဃိ တၫ်ကိၫ်ဒိၣ်မးလီၤ. မုၫ်နၤခီအဆၢကတီၫ် တၫ်မံတၫ်ဂဲၤအပူၤမံတန့ၫ်ဂဲၤတန့ၫ်အိၣ်ထီၣ်၀ဲလီၤ. တၫ်ဘံၣ်တၫ်ဘၢစ့ၫ်ကီးတအိၣ်ဘၣ်. တၫ်ဃံးတၫ်စ့ၫ်နးနးကျံးကျံးလၢဟဲဒိၣ်ထီၣ်တဖၣ် ကမျၢၫ်တဖၣ်ဘၣ်ကွၫ်ဆၢၣ်မဲာ်အါထီၣ်ဘၣ်ကိးမုၫ်နံၤလီၤ. ဆူမဲာ်ညါစ့ၫ်ကီး တၫ်ကဘၣ်ကွၫ်ဆၢၣ်မဲာ်အါထီၣ်၀ဲလီၤ. အဃိပ၀ဲတခီ ပကတူၫ်သံပသးဒီးပကဟ့ၣ်အဃၣ်ဧါ မ့တမ့ၫ် ပကဒုးလၢပနီၫ်ကစၫ်တၫ်ထူၣ်ဖျဲးအဂီၫ်ဧါမီၤ. ကမျၢၫ်တဖၣ်မ့ၫ်တထူၣ်ဖျဲးထီၣ်လၢ သုးမီၤစိရိၤအဖီလာ်ဘၣ်န့ၣ် ကမျၢၫ်တဖၣ်ကကွၫ်ဆၢၣ်မဲာ်ဘၣ် တၫ်ကီတၫ်ခဲသ့ၣ်တဖၣ်လီၤ” အဂ့ၫ် စံး၀ဲန့ၣ်လီၤ.

တကးဒံးဘၣ် သုးကီၣ်ကးကမျၢၫ်တၫ်ဘၣ်ကဲသုးတၫ်ဘျၢအဃိ ပှၤသးစၫ်တဖၣ်လၢတၫ်ဘၣ်ထၢန့ၫ်ဆူၣ်အီၤတဖၣ် ဟဲအါထီၣ်၀ဲအဃိ သုတတုၤဆူသုးမီၤစိရိၤအဖီလာ်အဂီၫ် တၫ်ကထီဒါအီၤလၢကမျၢၫ်ဂံၫ်ဘါအဂီၫ် တၫ်ပာ်ဖျါတၫ်ပာ်သးပှၤဟူးဂဲၤ(သပိတ်လှုပ်ရှားမှုအဖွဲ့)တဖၣ် ဃ့ထီၣ်ဆီၣ်တခူထီၣ်ဃာ်၀ဲန့ၣ်လီၤ.

ref:rfa