လါမ့ၤ(၁၅)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်တီအူ, ကီၫ်ဆၣ်ထီတထူၣ်(ထန်းတပင်မြို့နယ်), ယွၣ်လ့ကိသ၀ီ(ရွာလေးကုန်းရွာ), ဖဲလါမ့ၤ(၁၃)သီနံၤ သုးကီၣ်ကး ခးလီၤကျိဖးဒိၣ်အဃိ ကမျၢၫ်(၄)ဂၤဘၣ်သံ၀ံၤ (၃)ဂၤဘၣ်ဒိဘၣ်ထံး၀ဲအဂ့ၫ် ကညီဒီက လုာ်စၢဖှိၣ်ကရၢ-KNU ဘိးဘၣ်ပာ်ဖျါ၀ဲလီၤ.
သုးကီၣ်ကးအသုး ခလရ-၇၃ လၢအိၣ်ဆီလီၤအသးဖဲ စယးကၠံသ၀ီ(ဇရပ်ကြီးရွာ) ခးလီၤကျိ ဖးဒိၣ်ဒီး လီၤတဲာ်ပိၫ်ဖး၀ဲဒၣ် ဖဲယွၣ်လ့ကိသ၀ီ(ရွာလေးကုန်းရွာ)အဃိ ကမျၢၫ်ဘၣ်ဒိဘၣ်ထံး ဘၣ်သံဘၣ်ပှၫ်အဂ့ၫ် KNU တဲ၀ဲလီၤ.
ပှၤလၢဘၣ်သံတဖၣ် သးနံၣ်(၈၄)နံၣ် အူကၠီၣ်စ့ၣ်(ဦးကျော်စိန်), သးနံၣ်(၅၂)နံၣ် ဒီၣ်ထ့ယံၣ်(ဒေါ်ဌေးရီ), သးနံၣ်(၄၉)နံၣ် အူထ့နဲၣ်(ဦးဌေးနိုင်) ဒီး သးနံၣ်(၁၈)နံၣ် မအိဖူသီၣ်(မအိဖူးသော်)တဖၣ်၀ံၤ သ၀ီဖိအဂၤ(၃)ဂၤဘၣ်ဒိဘၣ်ထံး၀ဲအဂ့ၫ် တဲ၀ဲလီၤ.
လၢလါမ့ၤ(၅)သီလံၤလံၤ ကီၫ်ရ့ၣ်တီအူ,ကီၫ်ဆၣ်ဒီၣ်ဖးခိၣ် (သံတောင်ကြီးမြို့နယ်), ကမျၢၫ် အိၣ်ဒူသ၀ီတဖၣ်အပူၤ သုးကီၣ်ကးအသုး(စစ်ကောင်စီတပ်) ခးလီၤလၢကလံၤကျါ (လေကြောင်း )ဒီးကျိဖးဒိၣ် (လက်နက်ကြီး)အဃိ ဖိသၣ်ဘၣ်သံ(၁)ဂၤ၀ံၤ ဘၣ်ဒိဘၣ်ထံး၀ဲ (၃)ဂၤအဂ့ၫ် KNUဘိးဘၣ်ပာ်ဖျါ၀ဲလီၤ.
