ဃိၣ်သၢဖျၢၣ်တၫ်ဒုးတဖၣ်အဃိ ပယီၤ-ကၠီၣ်တဲၣ်ကီၫ်ဆၢ တၫ်ကပၢဆှၢရဲၣ်ကျဲၤအဂီၫ် ကၠီၣ်တဲၣ်ကိတိာ်ခိၣ်ကျၢၫ်တဲလီၤ၀ဲ

လါမ့ၤ(၁၃)သီ, ၂၀၂၄နံၣ်

ကညီကီၫ်စဲၣ်, ကီၫ်ဆၣ်နိၣ်တကီ, ၀့ၫ်ဃိၣ်သၢဖျၢၣ်ပူၤ တၫ်ဒုးကဲထီၣ်အဃိ ပယီၤ-ကၠီၣ်တဲၣ်ကီၫ်ဆၢတဖၣ် တၫ်ကပၢဆှၢဃာ်အဂီၫ် ကၠီၣ်တဲၣ်ကိတိာ်ခိၣ်ကျၢၫ် Srettha Thavision တဲလီၤ၀ဲလီၤ.

ဖဲလါမ့ၤ(၁၀)သီနံၤ, ဂီၤခီ(၈)နၣ်ရံၣ်အကတီၫ် လၢ၀့ၫ်ဃိၣ်သၢဖျၢၣ် မ့ၣ်ပိၫ်ပိၫ်ဖးအကလုၫ်တဖၣ်, တၫ်ခးကျိဖးဒိၣ်ကျိဖိ အကလုၫ်တဖၣ်သီၣ်ထီၣ်၀ဲ, BGFသုးဖိတနီၤဒီး KNLAသုးဖိတဖၣ်အဘၢၣ်စၢၤ တၫ်ခးလိာ်သးကဲထီၣ်အဂ့ၫ်, တၫ်ခးလိာ်သး၀ံၤအလီၫ်ခံ ဖဲလါမ့ၤ(၁၁)သီနံၤန့ၣ် ကၠီၣ်တဲၣ်ကိတိာ်ခိၣ်ကျၢၫ် Srettha Thavision ဟဲဆူ ၀့ၫ်ဃိၣ်သၢဖျၢၣ်အကပၤ ကၣ်ခၠးနၣ်ပူၣ်ရံၣ်(ကန်ချနပူရီ)၀ံၤ ဟဲသမံသမိးတၫ်အိၣ်သးတဖၣ်အဂ့ၫ် တၫ်သ့ၣ်ညါဘၣ်လီၤ.

ကီၫ်ကၠီၣ်တဲၣ်တကပၤ လၢတၫ်ကဒီသဒၢလီၤ ဒီကလုာ်တၫ်ဘံၣ်တၫ်ဘၢအဂီၫ်, တၫ်ကမၤဂ့ၤထီၣ် သုးဖိအကံၫ်အစီအဂီၫ်ဒီး ကီၫ်ပယီၤပူၤ တၫ်သဘံၣ်သဘုၣ်အကျါ တၫ်ကဟ့ၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤအဂီၫ် အိၣ်ကတီၤသးအဂ့ၫ်, လၢကတီၫ်အံၤ ကီၫ်ကၠီၣ်တဲၣ်တကပၤ တူၫ်လိာ်ပှၤလီၫ်အိၣ်ကမှံဖိန့ၫ် တုၤလၢ(၅,၀၀၀)ဂၤသ့အဂ့ၫ် ကၠီၣ်တဲၣ်ကိတိာ်ခိၣ်ကျၢၫ်တဲ၀ဲလီၤ.

ဖဲလါမ့ၤ(၁၁)သီနံၤ ကၠီၣ်တဲၣ်ကိတိာ်ခိၣ်ကျၢၫ် ဟဲတုၤ၀ဲ ဖဲကီၫ်ရ့ၣ်ကၣ်ခၠးနးပူၣ်ရံၤ(ကန်ချနပူရီခရိုင်), နီၫ်ဂံၫ်(၉ )ခီၣ်ချ့ သုးရ့ၣ်၀ံၤ ဘၣ်ထွဲဒီးကီၫ်ပယီၤပူၤ တၫ်သဘံၣ်သဘုၣ်တဖၣ် အဖီခိၣ် တဲ၀ဲလၢ တၫ်ကကးတံာ်ကွံာ်ကီၫ်ဆၢအဂီၫ် မ့ၫ်တၫ်လၢအရ့ဒိၣ်အဂ့ၫ်, ဒိးန့ၫ်ဘၣ်၀ဲ သုးခိးကီၣ်ဆၢဒီး လီၫ်က၀ီၤသုးခိၣ်နၫ် ဘၣ်မူဘၣ်ဒါတဖၣ် အတၫ်ဃ့ထီၣ်လၢ တၫ်ကကးတံာ်ကွံာ် ကီၫ်ဆၢတြဲၤအဂီၫ်ဒီး တၫ်ကမၤအါထီၣ် ကီၫ်ဆၢတၫ်ဘံၣ်တၫ်ဘၢအဂီၫ်တဖၣ်န့ၣ်လီၤ.

ref:khitthit