လါမ့ၤ(၁၃)သီ, ၂၀၂၄နံၣ်
အီၣ်စ့ၣ်ယး(အောင်ဇေယျ)သုးကျိၤ လၢကဟဲထီၣ်ဆူ ၀့ၫ်ရၤမတံဒီး KNLA, PDF သိၣ်မှံၤသုးပာ်ဖှိၣ်တဖၣ်အဘၢၣ်စၢၤ တၫ်ဒုးဆူၣ်ထီၣ်ကဒီး၀ံၤ သုးကီၣ်ကးတကပၤ မၤပှဲၤအါထီၣ်သုးဂံၫ်ဘါဒီး သိလ့ၣ်ဒုးသုးတဖၣ်အဂ့ၫ် တၫ်သ့ၣ်ညါဘၣ်လၢ တၫ်ပၢၫ်ဆၢသုးဂ့ၫ်၀ီ ဂံၫ်ခီၣ်ထံးတၫ်ကစီၣ်အိၣ်န့ၣ်လီၤ.
အီၣ်စ့ၣ်ယးသုးကျိၤ လၢကဟဲထီၣ်ဆူ ၀့ၫ်ရၤမတံအံၤ သံ, ဘၣ်ဒိအါအါဂီၫ်ဂီၫ်၀ံၤ ဟဲတုၤဒၣ်ဒံးဖဲ အ့ရှၢၣ်ကျဲမုၫ်, တီနီၣ်အကပိာ်ကပၤလီၤအဂ့ၫ် တၫ်သ့ၣ်ညါဘၣ်လီၤ. သုးကီၣ်ကးတကပၤ ဘၣ်ဒိဘၣ်ထံးအါဒီး ဟဲထီၣ်ဆူ တၫ်မဲာ်ညါတန့ၫ်ဘၣ်အဃိ ဆှၢထီၣ်၀ဲ သုးတြိၤ – ၇၇, ၂၂, ၄၄, ၅၅, စကခ-၁၂ လီၫ်က၀ီၤသုးဒီး သိလ့ၣ်ဒုးသုးတဖၣ်အဂ့ၫ် တၫ်သ့ၣ်ညါဘၣ်လီၤ. သုးတြိၤ-၇၇, ဒီးသုးတြိၤ(၅၅) အစုတီၤဖီလာ် (ရပခ ဒီး တပခ ) ခီၣ်ချ့သုးရ့ၣ် တဖၣ်စ့ၫ်ကီး မၤပှဲၤအါထီၣ်ဂံၫ်ဘါ ခီဖျိလၢသိလ့ၣ်ဒုးသုးတဖၣ်လီၤ.
ကညီကီၫ်စဲၣ် တၫ်ဒုးတၫ်ယၤတဖၣ်အပူၤ သုးကီၣ်ကးတကပၤ လၢကျဲအကလုာ်ကလုာ် ဆှၢအါထီၣ် သုးဂံၫ်ဘါဒီး စုက၀ဲၤတၫ်ဖိတၫ်လံၤတဖၣ်ခီဖျိလၢ ကမျၢၫ်အက့ၫ်အဂီၤအသိးဒီး သူ၀ဲသိလ့ၣ်တီၣ်ပနံာ်တဖၣ်အဃိ KNU သုးက့နီၫ်ဂံၫ်(၁) တၫ်ပၢၫ်ဆၢသုးတကပၤ ဖဲလါမ့ၤ(၁၁)သီနံၤန့ၣ် မၤပိၫ်ဖးဟးဂီၤကွံာ် ၀့ၫ်တကူၣ်-မီၣ်လမၠဲၣ်ကျဲမုၫ်ဖးဒိၣ် ကၠိၣ်အ့းတိၤ (ကျုံအိတ်တံတား) လၢအိၣ်ဖဲ ကီၫ်ဆၣ်ဘံလ့ ရွှ့ၣ်ယီၣ်ပၠး(ရွှေရောင်ပြ) အကပၤန့ၣ်လီၤ.
