လါအ့ဖြ့ၣ်(၂၉)သီ, ၂၀၂၄နံၣ်
ဖဲ ၂၀၂၄နံၣ်, လါအ့ဖြ့ၣ်(၂၇)သီအနံၤ, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၁), ကီၫ်ရ့ၣ်ဒူသထူၣ်, ကီၫ်ဆၣ်သထူၣ်ဟီၣ်က၀ီၤအပူၤ သုးကီၣ်ကးအစုတီၤဖီလာ်(အမတ-၄၀၂)သုးကလၢၤ ခးလီၤကျိဖးဒိၣ်တဖၣ်အဃိ လီၫ်က၀ီၤကမျၢၫ်(၁)ဂၤသံ၀ဲ၀ံၤ လီၫ်က၀ီၤကမျၢၫ်ဖံးအီၣ်မၤအီၣ်လီၫ်ကျဲလၢအမ့ၫ် ရီဘၢၣ်ကျီး(၁၅)အ့ကၢၫ်မ့ၣ်အူအီၣ်ဟးဂီၤကွံာ်၀ဲအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲန့ၣ်လီၤ.
ဖဲ လါအ့ဖြ့ၣ်(၂၇)သီအနံၤ, ဟါ(၉း၅၀)နၣ်ရံၣ်အဆၢကတီၫ် သုးကီၣ်ကး(အမတ-၄၀၂)ခးလီၤကျိဖးဒိၣ်(၂)ဖျၢၣ်ဆူ ကီၫ်ဆၣ်သထူၣ်ဟီၣ်က၀ီၤပူၤအဃိ လဲၤလီၤတဲာ်၀ဲဒၣ်ဖဲ တနူးလီၫ်က၀ီၤ(ဓနုကျေးနယ်), ဒါယိသ၀ီ(ဓါးရိုးရွာ)အကပၤ, ကမျၢၫ်ဖံးအီၣ်မၤအီၣ်လီၫ်ကျဲ၀ံၤ နီၫ်ဘိၣ်သ၀ီဖိ(နောင်ဘိုရွာသား) တံယိ, သးနံၣ်(၆၇)နံၣ် ကျိဖးဒိၣ်အက့အခီဘၣ်အီၤဒီးသံ၀ဲန့ၣ်လီၤ.
တနံၤဃီဖဲမုၫ်ဃ့ၫ်လီၤ(၁း၃၀)နၣ်ရံၣ်အဆၢကတီၫ်, သုးကီၣ်ကး(အမတ-၄၀၂)ခးလီၤကျိဖးဒိၣ်(၂)ဖျၢၣ်ဆူ ကီၫ်ဆၣ်သထူၣ်, ကီးလဲလီၫ်က၀ီၤ(ကော့လှိုင်းဒေသ), ကီးလဲသ၀ီမုၫ်နုာ် လီၫ်က၀ီၤကိး(ဃိးဖိကီၫ်လူၫ်), ကမျၢၫ်ဖံးအီၣ်မၤအီၣ်လီၫ်ကျဲပူၤအဃိ ကျိဖးဒိၣ်လဲၤလီၤတဲာ်ပိာ်ဖး၀ံၤ ဃိးဖိကီၫ်လူၫ်(ကီးလဲ)သ၀ီဖိ တံကံၣ်လံး(တီးဂီလိ), ရီဘၢၣ်ကျီး(၁၀)အ့ကၢၫ်ဒီး စီၤမီၣ်ကသဲ(စောမောင်ကသဲ), ရီဘၢၣ်ကျီး(၅)အ့ကၢၫ် မ့ၣ်အူအီၣ်ဟးဂီၤကွံာ်၀ဲန့ၣ်လီၤ.
ဒ်န့ၣ်အသိး တနံၤဃီဖဲ ဂီၤ(၁၁း၂၀)နၣ်ရံၣ်ဃၣ်ဃၣ်အဆၢကတီၫ်စ့ၫ်ကီး သုးကီၣ်ကး(ခမရ-၉)သုးကလၢၤ ခးလီၤကျိဖးဒိၣ်(၂)ဖျၢၣ်အဂ့ၫ် ခ့ၣ်အဲၣ်ယူၣ်-ကီၫ်ဆၣ်သထူၣ် တၫ်ကစီၣ်ပှၤဘၣ်မူဘၣ်ဒါ(သတင်းတာဝန်ခံ)စံး၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤသုးကီၣ်ကး (အမတ-၄၀၂) ကျိဖးဒိၣ်သုးရ့ၣ်၀ဲၤလီၫ်ခိၣ်သ့ၣ်အံၤ အိၣ်ဆီလီၤအသး ဖဲခ့ၣ်အဲၣ်ယူၣ်-ကီၫ်ဆၣ်သထူၣ်, အ့ရှ့ၣ်သ၀ီ(အင်းရှည်ရွာ)အပူၤန့ၣ်လီၤ.
