လါအ့ဖြ့ၣ်(၂၂)သီ, ၂၀၂၄နံၣ်
သုးကီၣ်ကးအသုး ခလရ-၂၇၅လၢက့ၤဂုၤက့ၤအခံ ဖဲ၀့ၫ်ရၤမတံ(မြ၀တီ) ကၠီၣ်တဲၣ်-ပယီၤတၫ်ရ့လိာ်မုာ်လိာ်တိၤနီၫ်ဂံၫ်-၂ တဖၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်-KNLAဒီး သုးပာ်ဖှိၣ်တဖၣ် နုာ်လီၤခးအီၤ၀ံၤ သုးပာ်ဖှိၣ်တဖၣ် ဂုၤက့ၤအခံလံအဂ့ၫ်တၫ်သ့ၣ်ညါဘၣ်လီၤ.
သုးပာ်ဖှိၣ်တဖၣ် ဖဲလါအ့ဖြ့ၣ်အသီ(၂၀)အနံၤန့ၣ် စးထီၣ်ဒုး၀ဲလဒရိ(ဒရုန်း)တဖၣ်၀ံၤ သုးကီၣ်ကးတကပၤ ဟဲခးဆၢက့ၤ၀ဲလၢကဘီယူၤဒုးသုးတဖၣ်လီၤ. တုၤလၢအသီ(၂၀)ဟါဒီတနၤ သုးကီၣ်ကးတကပၤ ဟဲခးလီၤတၫ်လၢကလံၤကျါလီၤ. ဖဲလါအ့ဖြ့ၣ်(၂၁)သီနံၤ ဂီၤ(၉)နၣ်ရံၣ်ဃၣ်ဃၣ်န့ၣ် ခံကပၤတၫ်ခးလိာ်သးပတုာ်ကွံာ်၀ဲ၀ံၤ သုးပာ်ဖှိၣ်တဖၣ် ဂုၤက့ၤအခံလီၤ.
ကညီဒီကလုာ်တၫ်ထူၣ်ဖျဲးသုးမုၫ်ဒိၣ်-KNLAဒီး သုးပာ်ဖှိၣ်တဖၣ်န့ၣ် သ့ၣ်ခါညံၣ်နီၣ် ဒုးယၤသုးကလၢၤဒီး သုးရ့ၣ်(၃)ခါ ဖဲတယံာ်ဒံးဘၣ် ထီၣ်ဒုးမၤန့ၫ်၀ဲ၀ံၤအလီၫ်ခံ ထီၣ်ပၢဆှၢဃာ်၀ဲ ရၤမတံကပၤ ခလရ-၂၇၅န့ၣ်လီၤ. အလီၫ်ခံ ခလရ-၂၇၅န့ၣ် က့ၤဃီၤဆူရၤမတံ တိၤနီၫ်ဂံၫ်(၂)လၢကခီၣ်ဆၢက့ၤတၫ်အဂီၫ်န့ၣ်လီၤ.
သုးကီၣ်ကးတကပၤစ့ၫ်ကီး ရၤမတံ သုတလီၤတဂ့ၤအဂီၫ် မၤ၀ဲအီၣ်စ့ၣ်ယး ဒုးယၤတၫ်ရဲၣ်တၫ်ကျဲၤ(အောင်ဇေယျ စစ်ဆင်ရေး)၀ံၤ ဟဲထီၣ်လၢသုးကျိၤ(၃)ဘိဒီး တၫ်ဒုးကဲထီၣ်၀ဲဒၣ်ဒီး သုးပာ်ဖှိၣ်တဖၣ် ဖဲ၀့ၫ်ကီးတရံး(ကော့ကရိတ်)န့ၣ်လီၤ.
လၢကတီၫ်အံၤ သုးပာ်ဖှိၣ်တဖၣ် ဂုၤက့ၤအခံတစိၤတလီၫ်လၢ ၀့ၫ်ကီးတရံးန့ၣ်လီၤ. တၫ်ဒုးအဃိ ခံကပၤလၢာ်ပှၤလၢဘၣ်ဒိဘၣ်ထံးတဖၣ် ဟဲဒိးကူစါယါဘျါသးလၢ ၀့ၫ်မဲဆီးတၫ်ဆါဟံၣ်(မဲဆောက်ဆေးရုံ)အဂ့ၫ် တၫ်သ့ၣ်ညါဘၣ်လီၤ.
photo: Reuters
