လါမးရှး(၂၆)သီ, ၂၀၂၄နံၣ်
ဒီလၣ်(၁၂၀)ကကွဲၫ်ဘျဲၣ်ပာ်ဃုာ် လၢတၫ်ကမၤစၢၤကီၫ်ပယီၤ, အမဲရကၤပဒိၣ်စ့တၫ်လၢာ်ဘူၣ်လၢာ်စ့ၤတၫ်ဘျၢ (အမေရိကန်အစိုးရအသုံးစရိတ်ဥပဒေ)န့ၣ် ဘျီၣ်ဒိၣ်ခံတီၤလၢာ် ပာ်ဂၢၫ်ပာ်ကျၢၤ၀ဲ၀ံၤအလီၫ်ခံ ဖဲလါမးရှး(၂၃)သီနံၤန့ၣ် အမဲရကၤကီၫ်ခိၣ် Joe Biden ဆဲးလီၤစုမုၫ်ကျၢၫ်အဂ့ၫ် ဟံၣ်၀ါတကပၤ ပာ်ဖျါ၀ဲလီၤ.
အမဲရကၤပဒိၣ်တၫ်လၢာ်ဘူၣ်လၢာ်စ့ၤ(အမေရိကန်အစိုးရအသုံးစရိတ်)အဂီၫ် ကသူ၀ဲစ့ဒီလၣ်(၁.၂)ထရံၣ်လံၣ်ယၣ်၀ံၤ ကီၫ်ပယီၤအဂီၫ် မုာ်ကျိၤ၀ဲၤကွာ်တၫ်ကဲဘျုးစ့ပာ်ကီၤ (Economic Support Fund) တၫ်ဂ့ၫ်ခိၣ်တီဖီလာ် ကသူ၀ဲဒီလၣ်(၁၂၁)ကကွဲၫ်အဂ့ၫ်တၫ်သ့ၣ်ညါဘၣ်လီၤ.
Burma Act တၫ်ဘျၢသဲစး(ဥပဒေ)အဖီခိၣ် တၫ်မၤစၢၤလၢ အမဲရကၤကဟ့ၣ်လီၤတဖၣ်န့ၣ် ကီၫ်ပယီၤပူၤဘၣ်ထွဲဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်(လူသားချင်းစာနာမှုဆိုင်ရာ အကူအညီများ), တၫ်ဒုးဒီးတၫ်သဘံၣ်သဘုၣ်တဖၣ်အဃိ ပှၤလၢဘၣ်ကီဘၣ်ခဲ(ဘေးဒုက္ခရောက်နေသူများ)တဖၣ်, ကလုာ်ဒူၣ်ဖီၣ်စုက၀ဲၤတၫ်ကရၢကရိတဖၣ်(တိုင်းရင်းသားလက်နက်ကိုင်အဖွဲ့များ), ကမျၢၫ်တၫ်ဒီသဒၢသုးတဖၣ်(ပြည်သူ့ကာကွယ်ရေးတပ်များ)ဒီး တၫ်ကရၢကရိလၢ ဟူးဂဲၤလၢဒံၣ်မိၣ်ကရ့ၣ်စံၣ်ဂ့ၫ်၀ီတဖၣ်(ဒီမိုကရေစီအရေး လှုပ်ရှားသည့်အဖွဲ့အစည်းများ) ကမၤစၢၤ၀ဲအဂ့ၫ် တၫ်သ့ၣ်ညါဘၣ်လီၤ.
၀ၣ်ရှ့ၣ်ထၢၣ်န့ၣ် ကီၫ်ပယီၤပူၤတၫ်ကဒိးန့ၫ် ဖဲၣ်ဒရၢၣ်ဒံၣ်မိၣ်ကရ့ၣ်စံၣ်(ဖက်ဒရယ်ဒီမိုကရေစီ)အဂီၫ် ဂံၫ်ဘါကရၢလၢမၤတၫ်တဖၣ် ကဆီၣ်ထွဲမၤစၢၤ၀ဲအဂီၫ်, တၫ်ခီဂာ်ကီၫ်ဆၢ ဟ့ၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤအဂီၫ် (လူသားချင်းစာနာမှုဆိုင်ရာအကူအညီ), တၫ်ဟံးန့ၫ်ဂ့ၫ်၀ီတဖၣ်(ပစ်မှတ်ထားအရေးယူရေး), ပှၤဖီၣ်စုက၀ဲၤဂံၫ်ဘါကရၢတဖၣ် လၢတမ့ၫ်တၫ်စုက၀ဲၤ တၫ်မၤစၢၤတဖၣ်ကဟ့ၣ်၀ဲအဂီၫ် Burma Act တၫ်ဘျၢသဲစး(ဥပဒေ)စ့ၫ်ကီး ဖဲ၂၀၂၃နံၣ် လါဒံၣ်စဲဘၢၣ်အပူၤ ပာ်ဂၢၫ်ပာ်ကျၢၤဃာ်၀ဲလီၤ.
Ref: The Irrawaddy
