လါမးရှး(၂၆)သီ, ၂၀၂၄နံၣ်
ကညီကီၫ်စဲၣ်, သုးကီၣ်ကးတၫ်တိာ်ကူၣ်ကျဲၤသုးကလၢၤ(စစ်ကောင်စီဗျူဟာ) လၢအိၣ်ဖဲကီၫ်ဆၣ်လူၫ်ပျဲၫ် (လှိုင်းဘွဲမြို့နယ်)န့ၣ် ပညိၣ်လီၤဃာ်ကျိဖးဒိၣ်လၢ ၀့ၫ်လူၫ်ပျဲၫ်(လှိုင်းဘွဲမြို့)ပူၤအဂ့ၫ် Salweeen Press တၫ်ကစီၣ်သန့ ပာ်ဖျါ၀ဲလီၤ.
အ၀ဲသ့ၣ်တဖၣ် ပညိၣ်ဃီၤကျိဖးဒိၣ်ဆူ ကမျၢၫ်အိၣ်တၫ်အဃိ သုးကီၣ်ကးသုးတဖၣ် မ့ၫ်ပျုၫ်လံဧါ တသ့ၣ်ညါလၢၤဘၣ်. တၫ်မ့ၫ်ကဲထီၣ်အသးန့ၣ် လီၤဂာ်လၢကခးလီၤတၫ်ဆူ ၀့ၫ်ပူၤန့ၣ်လီၤ. ၀့ၫ်ဖၣ်အၣ်(ဘားအံမြို့)ပူၤ ကမျၢၫ်တဖၣ်စ့ၫ်ကီး ဘၣ်ယိၣ်ဘၣ်ဘှီတၫ်ဒိၣ်မးလၢ ၀့ၫ်ပူၤတၫ်ဒုးကကဲထီၣ် ဘၣ်ဖုးန့ၣ်လီၤ.
ဒ်လဲၣ်ဂ့ၤန့ၣ် တၫ်တဘျီအံၤ သုးကီၣ်ကးတဖၣ် မ့ၫ်တအိၣ်လၢၤဘၣ်န့ၣ်န့ၫ်လီၤ. တၫ်မ့ၫ်ကဲထီၣ်သးန့ၣ် ဘၣ်တူၫ်လိာ်လီၤ. ပပျံၤလၢတၫ်ဒုးကကဲထီၣ်ဘၣ်ဆၣ် သုးကီၣ်ကးအဂံၫ်မ့ၫ်တဲာ်န့ၣ်ဘၣ်လီၤအဂ့ၫ် တၫ်ကစီၣ်လၢတအဲၣ်ဒိးပာ်ဖျါအမံၤတခါတဲ၀ဲလီၤ.
လၢကတီၫ်အံၤ ဖၣ်ပူၣ်ပာ်ဃုာ် KNU သုးက့နီၫ်ဂံၫ်(၅)ဟီၣ်က၀ီၤ(တပ်မဟာ-၅)ပူၤ တၫ်လီၫ်လၢကမျၢၫ်ဟးထီၣ်က့ၤလီၤဒီး ဒူသ၀ီတဖၣ် သုးကီၣ်ကးတဖၣ်ပညိၣ်ဒုး၀ဲ၀ံၤ လၢ၀့ၫ်ဖၣ်ပူၣ်(ဖာပွန်မြို့)ပူၤ တ့ၫ်လီၤမ့ၣ်ပိၫ်အဃိ ဟံၣ်ဃီတဖၣ် ဟးဂီၤ၀ဲအိၣ်အဂ့ၫ် တၫ်ဒိးန့ၫ်တၫ်ကစီၣ်လီၤ.
သုးကီၣ်ကးအစုတီၤဖီလာ်တဖၣ် လၢအိၣ်ဖဲ၀့ၫ်ဖၣ်အၣ်(ဘားအံမြို့)ပူၤတခီ တၫ်ဘၣ်ယိၣ်ဘၣ်ဘှီ တအိၣ်ဘၣ်ဒီး တၫ်ပၢၫ်ဆၢသုးတဖၣ် ကနုာ်လီၤလၢ၀့ၫ်ပူၤတမ့ၫ်တၫ်လၢညီဘၣ်အဂ့ၫ် တဲ၀ဲလီၤ. မ့ၫ်ဟဲန့ၣ် ကတုၤလၢ ၀့ၫ်ပူၤ အဂီၫ်ယံၤဒိၣ်မးလီၤ. ဟဲမ့ၫ်တုၤဒၣ်လဲၣ် ကဘၣ်ခီဂာ်၀ဲအပတီၫ်အိၣ် တဆီဘၣ်တဆီလီၤ. ကခီဂာ် ၀့ၫ်တၫ်ဘံၣ် တၫ်ဘၢအပတီၫ်န့ၣ် တမ့ၫ်တၫ်လၢညီဘၣ်အဂ့ၫ် သုးကီၣ်ကး အစုတီၤဖီလာ်တဖၣ်တဲ၀ဲအဖီခိၣ် ပာ်ဖျါ၀ဲလီၤ.
Ref:SalweenPress
