လါမးရှး(၂၅)သီ, ၂၀၂၄နံၣ်
သုးကီၣ်ကး ဘိးဘၣ်ရၤလီၤလၢ ကမျၢၫ်တၫ်ဘၣ်ကဲသုးတၫ်ဘျၢသဲစး(စစ်မှုထမ်းဥပဒေ) အသးမူထီၣ်လၢ စးထီၣ်လၢဖဲလါမးၡး(၁၀)သီအနံၤ ဒီးတုၤ(၂၂)သီအနံၤ (၁)လါဘျဲၣ်ကတီၫ် ထံကီၫ်ဒီတဘ့ၣ် ကီၫ်ဆၣ်(၁၇၂)ဘ့ၣ်ပူၤတၫ်စးထီၣ်မၤဖျါထီၣ်အမိၫ်လံမိၫ်ပှၫ်(အကောင်အထည်ဖော်)လံအဂ့ၫ် တၫ်မၤတၫ်ဃုထံၣ်သ့ၣ်ညါလၢ တၫ်သဘျ့ပူၤကရၢတခါလၢအမ့ၫ် Data for Myanmar ထုးထီၣ်ပာ်ဖျါဃာ်၀ဲဖဲလါးမးၡး(၂၃)သီအနံၤန့ၣ်လီၤ.
Data for Myanmar အတၫ်မၤနီၣ်စရီအဖီခိၣ် ကီၫ်ဆၣ်(၁၇၂)ဘ့ၣ်အပူၤ တၫ်ကမၤဖျါထီၣ် ကမျၢၫ်တၫ်ဘၣ်ကဲသုးတၫ်ဘျၢသဲစး(စစ်မှုထမ်းဥပဒေ)အမိၫ်လံမိၫ်ပှၫ်အဂီၫ် တၫ်ထၢစရီတဖၣ်, တၫ်ထုးတၫ်ဖးတဖၣ်, တၫ်ထၢနုာ်ခိၣ်ဂီၤစရီလၢတၫ်ကဘၣ်ကဲသုးအဂီၫ်တဖၣ် တၫ်စးထီၣ်မၤလံအဂ့ၫ် စံး၀ဲန့ၣ်လီၤ.
ပှၤနီၫ်ဂံၫ်အါလၢအမ့ၫ် အ့ၣ်ယၣ်၀တံၣ်ကီၫ်ခီ(ဧရာဝတီတိုင်း), ၀့ၫ်တကူၣ်ကီၫ်ခီ(ရန်ကုန်တိုင်း), န့ၣ်ပၠံၣ်တီၣ်ကီၣ်ကး (နေပြည်တော်ကောင်စီ)ကီၫ်စဲၣ်တဖၣ်အပူၤ ထၢန့ၫ်၀ဲအအါကတၢၫ်ဒီး ကီၫ်ခီဒီးကီၫ်စဲၣ်အဂၤ ကီၫ်ဆၣ်တဖၣ်အပူၤစ့ၫ်ကီးတၫ်းစးထီၣ်မၤဖျါထီၣ် အမိၫ်လံမိၫ်ပှၫ်လံအဂ့ၫ်စံး၀ဲန့ၣ်လီၤ.
တၫ်ဒုးကဲထီၣ်သးကီၫ်ဆၣ်တဖၣ်အပူၤတခီ ၀့ၫ်ပူၤက၀ီၤဒ့တဖၣ်ဒီး သ၀ီလၢအဘူးတဖၣ်အပူၤ ပညိၣ်မၤ၀ဲအဂ့ၫ်ပာ်ဖျါဃာ်၀ဲန့ၣ်လီၤ. တၫ်ဘျၢသဲစးအံၤပိာ်ခွါကိးဂၤလၢ သးနံၣ်အိၣ်(၁၈)နံၣ် တုၤ(၃၅)နံၣ်အပူၤဒီး ပိာ်မုၣ်ခဲလၢာ်လၢ သးနံၣ်အိၣ်(၁၈)နံၣ် တုၤ(၂၇)နံၣ်တဖၣ်ကဘၣ်ကဲသုးအဂ့ၫ်ပာ်ဖျါဃာ်၀ဲန့ၣ်လီၤ.
ကမျၢၫ်တၫ်ဘၣ်ကဲသုးတၫ်ဘျၢသဲစး(စစ်မှုထမ်းဥပဒေ)အဃိ ကမျၢၫ်ထံဖိကီၫ်ဖိတဖၣ် လဲၤဃ့ၫ်ဟးထီၣ်ဆူထံချၢကီၫ်ချၢတဖၣ်အိၣ်အသိး အနီၫ်ကစၫ်အကျိၤအကျဲဒၣ်၀ဲအဖီခိၣ် ပှၤလၢဃ့ၫ်ပူၤဖျဲးသးတဖၣ်အိၣ်ဒီး ပှၤလၢထီဒါတဖၣ် အိၣ်၀ဲန့ၣ်လီၤ.
လၢတပၤစ့ၫ်ကီး သုးကီၣ်ကး တဲပျံၤတဲဖုးမၤပျံၤမၤဖုး၀ဲ ဟံၣ်ဖိဃီဖိလၢအိၣ်တ့ၫ်တဖၣ်န့ၣ်လီၤ. တၫ်ကရၢကရိတဖၣ်, ကီၫ်ပူၤကီၫ်ချၢပှၤဟီၣ်ခိၣ်ဖိခွဲးယာ်တၫ်ကရၢကရိ(လူ့အခွင့်အရေးအဖွဲ့)တဖၣ်ဒီး ကလုာ်ဒူၣ်ပှၤဖီၣ်စုက၀ဲၤကရၢတဖၣ်စ့ၫ်ကီးထီဒါဃာ်၀ဲ တၫ်ဘျၢသဲစးအံၤန့ၣ်လီၤ.
ကမျၢၫ်တၫ်ဒီသဒၢသုး(PDF)ကရၢတဖၣ်စ့ၫ်ကီး ပှၤလၢအမၤဖျါထီၣ် သုးကီၣ်ကးကမျၢၫ်တၫ်ဘၣ်ကဲသုး တၫ်ဘျၢသဲစးတဖၣ် တၫ်ကဟံးန့ၫ်အရ့အဂီၫ်, တၫ်ကဆဲးကျိးပာ်ဖှိၣ်မၤသကိးတၫ်ဒီး တၫ်ဒီသဒၢသုးတဖၣ်အဂ့ၫ် ဒုးသ့ၣ်ညါဃာ်၀ဲန့ၣ်လီၤ.
တကတီၫ်ဃီ စကဲ(စစ်ကိုင်း), မကွ့ (မကွေး), မါတလ့(မန္တလေး)ဒီး ပကိ(ပဲခူး)ကီၫ်ခီတဖၣ်အပူၤ တၫ်ကကဲသုးအဂီၫ် ပၢပြးခိၣ်နၫ်တဖၣ်ဒီး, ၀ဲၤဒၢးပှၤမၤတၫ်ဖိ, ဟံၣ်အဖျၢၣ်(၁၀၀)အခိၣ်တနီၤစ့ၫ်ကီး တၫ်မၤသံအီၤအိၣ်ထီၣ်၀ဲန့ၣ်လီၤ.
photo: (Photo: Yangon Revolution Force – YRF)
