လါမးရှး(၂၂)သီ, ၂၀၂၄နံၣ်
ဖဲလါမးရှး(၁၆)သီနံၤ လီၤဘၣ်(၆၆)၀ီတ၀ီ ကညီလုၫ်လၫ်တၫ်အီၣ်တၤသၣ်ဆိမူးန့ၣ် ဘၣ်တၫ်မၤ၀ဲ ဖဲခ့ၣ်အဲၣ်ယူၣ် -တၫ်ပၢဟီၣ်က၀ီၤ, သုးက့နီၫ်ဂံၫ်(၆), ကီၫ်ဆၣ်၀ီၫ်ရီ(၀င်းရေးမြို့နယ်), ဒဲၣ်လိးသ၀ီ(ဒိုင်လွတ်ရွာ)အဂ့ၫ် တီနီၣ် FM တၫ်ကစီၣ်သန့ ပာ်ဖျါ၀ဲလီၤ.
ဟံၣ်ခိၣ်အိၣ်(၁၂၀)ဖျၢၣ်ဘျဲၣ်သ၀ီအံၤအပူၤ ပှၤဘူးဒးဖိတၫ်ဘါဒီး ပှၤဘူၣ်ပှၤဘါ ကညီပှိၫ်၀ဲရှၣ်(ကရင်ဖလုံဝဲရှာ), (ကိး) အရံးယးတၫ်ဘါ(အရိယဘာသာဝင်)တဖၣ် အိၣ်သကိးဃုာ်တပူၤဃီလီၤ. အါတက့ၫ်န့ၣ်မ့ၫ် ပှၤဘူၣ်ပှၤဘါ ကညီပှိၫ်၀ဲရှၣ်(ကရင်ဖလုံဝဲရှာ), (ကိး) အရံးယးတၫ်ဘါ(အရိယဘာသာဝင်)တဖၣ်န့ၣ်လီၤ.
ကညီကလုာ်အကျါပှၤဘူၣ်ပှၤဘါကညီပှိၫ်၀ဲရှၣ်(ကရင်ဖလုံဝဲရှာ), (ကိး)အရံးယးတၫ်ဘါ(အရိယဘာသာဝင်)အိၣ်စှၤဂၤလီၤ. အရံးယးတၫ်ဘါ(အရိယဘာသာ)န့ၣ် လၢညါဘၣ်တၫ်ကိးအီၤလၢ လဲၫ်ကဲတၫ်ဘါ(လဲကယ်ဘာသာ)ဒီး လၢခံဖဲ၂၀၂၄နံၣ်န့ၣ်ဘၣ်တၫ်ဆီတလဲကိးက့ၤအီၤလၢ အရံးယးတၫ်ဘါ(အရိယဘာသာ)အဂ့ၫ်ဖၣ်အၣ်ကီၣ်ဆၣ်, ကီးပရးသ၀ီ(ကော့ပရံရွာ) အရံးယးတၫ်ဘါခိၣ်(အရိယဘာသာရေးခေါင်းဆာင်) ဖုလိယိၣ်(ဖူ့လုံးယုံ)တဲ၀ဲလီၤ.
ကညီပှိၫ်၀ဲရှၣ် (ကရင်ဖလုံဝဲရှာ), (ကိး) အရံးယးတၫ်ဘါ(အရိယဘာသာဝင်)ကရၢန့ၣ် မၤဘူၣ်မၤဘါတၫ်ကိးမုၫ်နံၣ်၀ံၤ (၃)လါတဘျီဒီး တနံၣ်(၄)ဘျီမၤ၀ဲမူးပွဲတဖၣ်န့ၣ်လီၤ.
အဆိကတၢၫ်တဘျီန့ၣ် မၤ၀ဲနံၣ်ထီၣ်သီ, ခံဘျီတဘျီန့ၣ် မၤ၀ဲကစၫ်ဖံဖုယီၫ်(ဖီးဘူးယော်) တၫ်အီၣ်တၤသၣ်ဆိအမူး, သၢဘျီတဘျီန့ၣ်မၤ၀ဲတၫ်စူၤလီၤသီတၫ်ထူစံာ်အမူး, လွံၫ်ဘျီတဘျီန့ၣ် မၤ၀ဲတၫ်ဒုၣ်တၫ်အီၣ်ဃ့ဘါထုကဖၣ်သၣ်ကမဲၤန့ၫ်တၫ်လၢတၫ်သးသမူခဲလၢာ်အမူးန့ၣ်လီၤ.
လၢမူးတဖၣ်အကျါ ကစၫ်ဖံဖုယီၫ်(ဖီးဘူးယော်) တၫ်အီၣ်တၤသၣ်ဆိအမူးမ့ၫ်၀ဲခံ၀ီတ၀ီ တၫ်မၤမူးမၤပွဲန့ၣ်လီၤ. ကညီပှိၫ်၀ဲရှၣ်(ကရင်ဖလုံဝဲရှာ) တၫ်အီၣ်တၤသၣ်ဆိမူးန့ၣ် တဒ်သိးလိာ်သးဒီး ကညီအဂၤတဖၣ် လုၫ်လၢ်တၫ်အီၣ်တၤသၣ်ဆိဘၣ်. တၫ်အံၤမ့ၫ်လုၫ်လၫ်ဒီး မ့ၫ်စ့ၫ်ကီးတၫ်ဘူၣ်တၫ်ဘါတခါအဃိ တၫ်ဖိတၫ်လံၤတၫ်ပီးတၫ်လီလၢပာ်ဃုာ်တဖၣ် တဒ်သိးလိာ်သးဘၣ်အဂ့ၫ် ဖၣ်အၣ်ကီၣ်ဆၣ်, ကီးပရးသ၀ီ(ကော့ပရံရွာ) အရံးယးတၫ်ဘါခိၣ်(အရိယဘာသာရေးခေါင်းဆာင်)ဖုလိယိၣ်(ဖူ့လုံးယုံ)တဲ၀ဲလီၤအဂ့ၫ် ပာ်ဖျါ၀ဲလီၤ.
ကညီပှိၫ်၀ဲရှၣ်(ကရင်ဖလုံဝဲရှာ)န့ၣ် ပာ်လုၫ်ပာ်ပှ့ၤမုၫ်ဃုနံၤအဃိ မူးပွဲတဖၣ်န့ၣ်မၤ၀ဲဖဲ မုၫ်ဃုနံၤအနံၤန့ၣ်လီၤ. မ့ၫ်တုၤမုၫ်ဃုနံၤ(မုၫ်ဘူၣ်)န့ၣ် အစှၤကတၢၫ်ဟံၣ်ဖိဃီဖိတဂၤ ကိးနွံဒဲးလဲၤဆူတၫ်ဘါလီၫ်၀ံၤ အီၣ်တၫ်အီၣ်တၫ်အီလၢအသးသမူတအိၣ်ဘၣ်(သားသတ်လွတ်)တဖၣ်လီၤ.
လၢအခဲအံၤ ဒဲၣ်လိးသ၀ီ(ဒိုင်လွတ်ရွာ)တၫ်မၤ၀ဲ တၫ်အီၣ်(ဖီးဘူးယော်)တၤသၣ်ဆိမူးန့ၣ် ဂီၤ(၆)နၣ်ရံၣ်န့ၣ် ဆီထူၣ်ထီၣ် ပှိၫ်၀ဲရှၣ်အနီၫ်တယၫ်၀ံၤ သး၀ံၣ်ဖံဘုယီၫ်တၫ်အီၣ်တၤသၣ်ဆိ(ကောက်သစ်စားပွဲ)တၫ်သး၀ံၣ်, မုၫ်ဆါ(၁၁)နၣ်ရံၣ်န့ၣ်စံးဘျုးစံးဖှိၣ်ကစၫ်ယွၤ, (၁၂)နၣ်ရံၣ်န့ၣ်ဘူၣ်တၫ်ဘါတၫ်, ဖဲမုၫ်နၤခီအကတီၫ်န့ၣ် ဘူၣ်ထူဘါယွၤဒီး မၤတၫ်သူၣ်ဖှံသးညီတဖၣ်န့ၣ်လီၤ.
Source: Taw Naw FM
