လၢကၠဲၣ်ခ့(ကြံခင်း) ပိာ်ခွါတဂၤတဲ၀ဲလၢအသးတမံလၢတၫ်ဘၣ်ကဲသုးအဖီခိၣ် ဘၣ်တၫ်ဖီၣ်အီၤ၀ံၤ စှၤနၣ်ရံၣ်အတီၣ်ပူၤ တၫ်မၢဟဲထုးထီၣ်အစိၣ်

လါမးရှး(၂၂)သီ, ၂၀၂၄နံၣ်

အ့ၣ်ယၣ်၀တံၣ်ကီၫ်ခီ(ဧရာဝတီတိုင်း), လၢ၀့ၫ်ကၠဲၣ်ခ့(ကြံခင်း) ဘၣ်ထွဲတၫ်ဘၣ်ကဲသုးအဂီၫ် သုးကီၣ်ကးအစုတီၤဖီလာ်ပှၤတဖၣ် ဟးလူၤထၢဟံၣ်နီၫ်ဂံၫ်အကတီၫ် ပိာ်ခွါတဂၤလၢ တဲ၀ဲလၢအသးတမံဘၣ်အဃိ ဘၣ်တၫ်က့ၤဖီၣ်အီၤ၀ံၤအလီၫ်ခံ စှၤနၣ်ရံၣ်အတီၫ်ပူၤ တၫ်မၢဟဲထုးထီၣ်အစိၣ်အဂ့ၫ် အ့ၣ်ယၣ်၀တံၣ်ထဲ (Ayeyarwaddy Times)တၫ်ကစီၣ်သန့ ပာ်ဖျါ၀ဲလီၤ.

ပှၤလၢဘၣ်တၫ်မၤသံအီၤန့ၣ် မ့ၫ်ကိၣ်သါထိအ့(ကိုသန်းထွန်းအေး)၀ံၤ ကိၣ်နဲၣ်(ကိုနိုင်)လၢဟ့ၣ်တၫ်ကစီၣ်ဆူ သုးကီၣ်ကးအိၣ် လဲၤတၢၣ်အီၤအဃိ သုးကီၣ်ကးအသုးတဖၣ်ဟဲ၀ံၤ ဖဲလါမးရှး(၂၀)သီနံၤ ဂီၤ(၉)နၣ်ရံၣ် အကတီၫ်ဘၣ်တၫ်က့ၤဖီၣ်အီၤ၀ံၤ ဖဲ(၁၁)နၣ်ရံၣ်န့ၣ် ဘၣ်သံ၀ဲန့ၣ်လီၤ.

ဘၣ်ထွဲတၫ်ဘၣ်ကဲသုးတၫ်ဂ့ၫ်န့ၣ် ကိၣ်နဲၣ်(ကိုနိုင်)ဒီး အပှၤတဖၣ်ဟးလူၤထၢစရီလၢက၀ီၤဒ့အပူၤလီၤ. ဖဲန့ၣ်အ၀ဲတဲ၀ဲလၢသးတမံဘၣ်အဃိ ကိၣ်နဲၣ်(ကိုနိုင်)လဲၤတၢၣ်အီၤလီၤ. ဖဲန့ၣ်သုးဒီးပၢၤကီၫ်တဖၣ်ဟဲဒီး က့ၤဖီၣ်အီၤလီၤ. တယံာ်ဘၣ်ဒီး တၫ်နၫ်ဟူအကစီၣ်လၢ သံ၀ဲအဂ့ၫ် လီၫ်က၀ီၤဖိဖဲန့ၣ်တဂၤတဲ၀ဲလီၤ. ကိၣ်သါအ့(ကိုသန်းထွန်းအေး)လၢဘၣ်တၫ်မၤသံအီၤန့ၣ် အိၣ်ဖဲရွှ့ၣ်တီၣ်စူးက၀ီၤဒ့ (ရွှေတောင်စုရပ်ကွက်), ကျဲနီၫ်ဂံၫ်(၇)၀ံၤ မ့ၫ်ပှၤတဂၤလၢလုၫ်အီၣ်နီၣ်ခိသးသမူ ခီဖျိယီၫ်လ့ၣ်ယီၫ်(၃)ပၣ်(ဆိုက်ကား) န့ၣ်လီၤ.

ကိၣ်နဲၣ်(ကိုနိုင်)အံၤ လၢ၀့ၫ်ကၠဲၣ်ခ့န့ၣ် ပှၤလၢဟူးဂဲၤလၢ ထံရူၫ်ကီၫ်သဲးတကပၤတဖၣ် ကဘၣ်တၫ်ဖီၣ်အီၤအဂီၫ် မ့ၫ်ပှၤတဂၤလၢဟ့ၣ်သုးတၫ်ကစီၣ်အဂ့ၫ် ပှၤ၀့ၫ်ဖိဖဲန့ၣ်တဖၣ်တဲ၀ဲလီၤ. လၢစှၤနၣ်ရံၣ်အတီၫ်ပူၤ သုးကီၣ်ကးအတၫ်မၤသံတၫ်ဒ်အံၤန့ၣ်  လၢ၀့ၫ်ကၠဲၣ်ခ့(ကြံခင်း)မ့ၫ်တၫ်အဆိကတၢၫ်တဘျီ ပှၤ၀့ၫ်ဖိလၢ ထံၣ်ဒီးသ့ၣ်ညါ၀ဲတဖၣ် ပျံၤတၫ်ဖုးတၫ်အဂ့ၫ် တၫ်သ့ၣ်ညါဘၣ်လီၤ.

Ref : AyeyarwaddyTimes