လါမးရှး(၂၀)သီ, ၂၀၂၄နံၣ်
အ့ၣ်ယၣ်၀တံၣ်ကီၫ်ခီ, ဖၠၣ်ပိၣ်ကီၫ်ဆၣ် ကမျၢၫ်တၫ်ဘၣ်ကဲသုအဖီခိၣ် ပှၤလၢဖီၣ်တၫ်ဖးဘၣ်တၫ်ဃုထၢထီၣ်အီၤတဖၣ် တအဲၣ်ဒိးကဲသုးဘၣ်အဃိ ပဒ့ၣ်ဟးဆှဲးသးအဖီခိၣ် တဲပျံၤတဲဖုး၀ဲလၢ ကဖီၣ်ဟံးန့ၫ် ဟံၣ်ဖိဃီဖိဂ့ၫ်၀ီအဂ့ၫ် RFA တၫ်ကစီၣ်သန့ ပာ်ဖျါ၀ဲလီၤ.
ဖဲလါမးရှး(၁၇)သီနံၤ လၢဖၠၣ်ပိၣ်ကီၫ်ဆၣ်, အီၣ်သၣ်ယၣ်သ၀ီ(အောင်သာယာရွာ)န့ၣ် တၫ်ကကဲသုးအဂီၫ် သးနံၣ်(၂၄)နံၣ်တုၤ(၃၅)နံၣ် ပိာ်ခွါတဖၣ်အကျါ (၄)ဂၤန့ၣ် တၫ်ဖီၣ်တၫ်ဖးဃုထၢအီၤ၀ံၤ (၂)ဂၤန့ၣ်တၫ်ကကိးအီၤလၢ အဆိကတၢၫ်တ၀ီဒီး အိၣ်တ့ၫ်(၂)ဂၤန့ၣ် တၫ်ကကိးကဒါက့ၤအီၤလၢခံတ၀ီန့ၣ်လီၤ. ပှၤ(၂)ဂၤလၢတၫ်ကကိးအီၤ အဆိကတၢၫ်တဘျီအကျါ တဂၤန့ၣ် ဃ့ၫ်ဖျိးကွံာ်အဃိ ဖဲလါမးရှးအသီ(၂၀)နံၤအလီၫ်ခံ မ့ၫ်တဟဲက့ၤန့ၣ် တဲပျံၤတဲဖုး၀ဲလၢ ကဟံးန့ၫ်ဟံၣ်ဖိဃီဖိဂ့ၫ်၀ီန့ၣ် တၫ်ဘံၣ်တၫ်ဘၢအဖီခိၣ် လီၫ်က၀ီၤဖိလၢတအဲၣ်ဒိးပာ်ဖျါအမံၤတဂၤ တဲ၀ဲအဂ့ၫ် ပာ်ဖျါ၀ဲလီၤ.
မၠီမၠး(မြောင်းမြ), ဖၠၣ်ပိၣ်(ဖျာပုံ), ကၣ်ကၠံဒီး(ကန်ကြီးထောင့်), လးပိးတၣ်(လပွတ္တာ), ဟ့သဒး(ဟင်္သာတ) ကီၫ်ဆၣ်တဖၣ်ပူၤ စးထီၣ်ဖဲလါမးရှး(၃)နွံတနွံအပူၤန့ၣ် လီၫ်က၀ီၤသးစၫ်တဖၣ် တၫ်မၢဖီၣ်တၫ်ဖးလၢကဘၣ်ကဲသုး အိၣ်၀ဲတပယူာ်ဃီအဂ့ၫ် လီၫ်က၀ီၤဖိတဖၣ်တဲ၀ဲလီၤ.
လၢဟ့သဒး၀့ၫ် (ဟင်္သာတမြို့)စ့ၫ်ကီး စးထီၣ်ဖဲလါမးရှး(၁၆)သီနံၤန့ၣ် ကၠိဖိဒီးပဒိၣ်ပှၤမၤတၫ်ဖိ (အစိုးရဝန်ထမ်း)တပာ်ဃုာ် သးနံၣ်(၂၀)နံၣ်တုၤ(၃၀)နံၣ် ပိာ်ခွါတဖၣ် ကကဲသုးအဂီၫ် တၫ်မၢဖီၣ်တၫ်ဖးအိၣ်၀ဲအဂ့ၫ် သးစၫ်လၢဘၣ်ဖီၣ်တၫ်ဖးတဂၤတဲ၀ဲလီၤ. တၫ်ဖီၣ်တၫ်ဖးမ့ၫ်ဘၣ်ဒီးတၫ်မ့ၫ်ဃ့ၫ်ဖျိးန့ၣ် တဲပျံၤတဲဖုး၀ဲလၢ ကဟံးန့ၫ်ဟံၣ်ဖိဃီဖိဂ့ၫ်၀ီအဃိ ကဲထီၣ်တၫ်ကီတၫ်ခဲအဂ့ၫ် ပှၤဟ့သဒး(ဟင်္သာတ)သးစၫ်လၢ ဘၣ်ဖီၣ်တၫ်ဖးတဂၤတဲ၀ဲလီၤ.
ဖီၣ်တၫ်ဖးမ့ၫ်ဘၣ်လၢကဘၣ်ကဲသုးန့ၣ် ဆိကမိၣ်ဃာ်လၢ ပကဃ့ၫ်ဖျိးလီၤ.သုးပူၤဒုပတနုာ်လီၤဘၣ် .သးတအိၣ်နုာ်လီၤဘၣ်အဃိ ပိာ်အခံတကဲဘၣ်. ဘၣ်ဆၣ်သနာ်က့ မ့ၫ်ဃ့ၫ်ဖျိးဒီး ဟံၣ်ဖိဃီဖိလၢအိၣ်တ့ၫ်လၢတၫ်လီၫ်ခံတဖၣ် ကမၤ၀ဲဒ်အံၤဒ်န့ၣ်စ့ၫ်ကီး တဲ၀ဲလီၤ.
လၢ(နအဖ)ပဒိၣ် အူသါရွ့ၣ် ပၢတၫ်အစိၤ ဖဲ၂၀၁၀နံၣ် လါနိၣ်၀့ဘၢၣ်(၄)သီနံၤ ကမျၢၫ်တၫ်ဘၣ်ကဲသုးတၫ်ဘျၢ (ပြည်သူ့စစ်မှုထမ်းဥပဒေ)စးလၢကွဲးလီၤဃာ်၀ဲအံၤ သုးကီၣ်ကး(စစ်ကောင်စီ)န့ၣ် ဖဲ၂၀၂၄နံၣ် လါဖ့ၤဘြူၤအါရံၣ်(၁၀)သီနံၤန့ၣ် ပာ်ဂၢၫ်ပာ်ကျၢၤ၀ဲလီၤ. တၫ်ဘျၢအံၤအဖီခိၣ် သးနံၣ်(၁၈)နံၣ်တုၤ (၃၅)နံၣ် ပိာ်ခွါတဖၣ်ဒီး သးနံၣ်(၁၈)နံၣ်တုၤ (၂၇)နံၣ် ပိာ်မုာ်တဖၣ် ကဘၣ်ကဲသုးအဂ့ၫ် ပာ်ဃုာ်၀ဲန့ၣ်လီၤ.
