လါမးရှး(၂၀)သီ, ၂၀၂၄နံၣ်
ဖဲ၂၀၂၄နံၣ်, လါမးၡး(၁၉)သီအနံၤ, KNLA တီခိၣ်ရိၣ်မဲတၫ်ပၢၫ်ဆၢသုးပာ်ဖှိၣ်တဖၣ် လဲၤထီၣ်ဒုးမၤန့ၫ်၀ဲ သုးကီၣ်ကးအသုးကလၢၤလၢအိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ကီၫ်ဆၣ်ကၠဲးဒိ, မဲၫ်သရီထၣ်သုးကလၢၤ၀ံၤ တၫ်မၤန့ၫ်စ့ၫ်ကီးကျိချံပှာ်သၣ်တဖၣ်အဂ့ၫ် SOF ပာ်ဖျါဃာ်၀ဲန့ၣ်လီၤ.
သုးကီၣ်ကးအသုး စကခ(၁၉)အစုတီၤဖီလာ် (ခမရ- ၅၅၇/၅၅၈) အပှၤသုးဖိတဖၣ်အိၣ်ဆီလီၤသး မဲၫ်သရီထၣ်သုးကလၢၤအံၤ တၫ်စးထီၣ်ကးတံာ်ဒုးအီၤဖဲ လါမးၡး(၁၅)သီအနံၤ၀ံၤ ဟါ(၁၀း၃၀)မံးနံးအဆၢကတီၫ် သုးစကီၤသဲးနၢၤအူ(တပ်ကြပ်ကြီးသက်နိုင်ဉီး) ဟဲဟ့ၣ်လီၤအသးဃုာ်ဒီးစုက၀ဲၤတဖၣ်န့ၣ်လီၤ.
ဖဲလါးမးၡး(၁၈)သီအနံၤ KNLA ဒီး SOFသုးပာ်ဖှိၣ်တဖၣ် ထီၣ်ဒုးမၤၡဲပျီကွံာ်သုးကီၣ်ကးအသုးကလၢၤကတီၫ် သုးကီၣ်ကးအပှၤသုးဖိတဖၣ် ပာ်တ့ၫ်သုးကလၢၤဃ့ၫ်ဖျိးကွံာ်အဃိ တၫ်ဒွဲၣ်အူမၤၡဲပျီကွံာ်သုးကလၢၤန့ၣ်လီၤ.
တကးဘၣ်ဖဲလါမးၡး(၁၉)သီအနံၤ တၫ်ထီၣ်ဒုးစ့ၫ်ကီးသုးကီၣ်ကးအသုးလၢ ဟဲအိၣ်ဆီၤလီၤအသးဖဲ ကၠိဖၠူၣ်တၫ်သမံတၫ်မိးကစၢၫ်လူၫ်(ဂျိုးဖြူချက်ပွိုင့်တောင်ကုန်း)အဃိ တၫ်ဒုးဆူၣ်၀ဲဒီတနံၤ၀ံၤ ဟါ(၄း၁၅)မံးနံးအဆၢကတီၫ် တၫ်ထီၣ်ဒုးမၤန့ၫ်သုးကလၢၤန့ၣ်လီၤ.
လၢတၫ်ဒုးအပူၤ သုးကီၣ်ကး အပှၤသုးဖိသံ၀ဲ(၅)ဂၤဒီး တၫ်မၤန့ၫ်စ့ၫ်ကီးကျိဖးဒိၣ် ကျိဆံးခဲလၢာ်(၆၁)ခိၣ်န့ၣ်လီၤ. သုးကီၣ်ကး အပှၤသုးဖိ(၅၀)ဂၤဃၣ်ဃၣ်လၢအိၣ်တ့ၫ်တဖၣ်စ့ၫ်ကီး လဲၤဃ့ၫ်ဖျိးဆူ ကီၫ်ကၠီၫ်တဲၣ်, ပဲၫ်ခလဲၫ်သ၀ီတပၤန့ၣ်လီၤ.
မ့မ့ၫ်လၢ KNLA ဒီး SOFသုးပာ်ဖှိၣ်တဖၣ်တပၤ တၫ်ဘၣ်ဒိဘၣ်ထံး တၫ်သံတၫ်ပှၫ်တအိၣ်၀ဲဘၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
လါမးရှးအတီၫ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်ဟီၣ်က၀ီၤအပူၤ KNLA တီခိၣ်ရိၣ်မဲ တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲ သုးကီၣ်ကး အသုးကလၢၤတဖျၢၣ်၀ံၤတဖျၢၣ်အသိး သုးကီၣ်ကးတပၤစ့ၫ်ကီး ဟဲခးလီၤတၫ်လၢကလံၤကျါအိၣ်ထီၣ်၀ဲကိးမုၫ်နံၤန့ၣ်လီၤ.
