လါမးရှး(၂၀)သီ, ၂၀၂၄နံၣ်
တၫ်တနုာ်လီၤသုးတသ့ တၫ်ဘၣ်ကဲသုးတၫ်ဘျၢ(မြန်မာ့စစ်မှုထမ်းဥပဒေ)အဃိ တၫ်ဘၣ်ယိၣ်လၢကဟဲအိၣ်ထီၣ်တဖၣ် ကဟံးထီၣ်ဖီၣ်ထီၣ်၀ဲအဂ့ၤကတၢၫ်ဒ်လဲၣ်န့ၣ် ဘီမုၫ်စၢဖှိၣ်ကရၢဟီၣ်ခိၣ်ဖိခွဲးယာ်ဂ့ၫ်၀ီကီၣ်ကး(၅၅)၀ီတ၀ီ တၫ်အိၣ်ဖှိၣ်ပူၤ ဘၣ်ထွဲကီၫ်ပယီၤ ဘီမုၫ်စၢဖှိၣ်ကရၢဟီၣ်ခိၣ်ဖိခွဲးယာ်ဂ့ၫ်၀ီခၢၣ်စးလီၤဆီ(မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေး အထူးသံတမန်)ဒီး ထံကီၫ်လၢဟဲထီၣ်တဖၣ်န့ၣ် UK တကပၤထုးထီၣ်တၫ်သံကွၫ်အဂ့ၫ် VOA တၫ်ကစီၣ်သန့ ပာ်ဖျါ၀ဲလီၤ.
တၫ်ဘျၢအံၤအဃိ ကီၫ်ပယီၤထံဖိကီၫ်ဖိကမျၢၫ်တဖၣ် ကသူၣ်ကိၫ်သးဂီၤအဃိ ဘၣ်ယိၣ်ဘၣ်ဘှီတၫ်ဒိၣ်မးအဂ့ၫ် UK ဘိးဘၣ်ပာ်ဖျါ၀ဲလီၤ. ကီၫ်ပယီၤပူၤ ပှၤ(၁၈)ကကွဲၫ်ဘျဲၣ် လိၣ်ဘၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤ(လူသားချင်းစာနာထောက်ထားမှု အကူအညီ)တဖၣ်၀ံၤ ထံလီၫ်ကီၫ်ပူၤပှၤဘၣ်ဃ့ၫ်သုး ဘၣ်သုးလီၫ်သုးကျဲအိၣ်(၂.၆)ကကွဲၫ်ဘျဲၣ်အဃိ ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ် ကလဲၤတုၤဆူ ပှၤလိၣ်ဘၣ်တၫ်အိၣ် လၢတအိၣ်ဒီး တၫ်တြီမၤတံာ်တာ်အဂီၫ် ဂ့ၫ်ဂီၫ်အူလိာ်ဘၣ်၀ဲအဂ့ၫ်စ့ၫ်ကီး တၫ်ဘိးဘၣ်ပာ်ဖျါအပူၤ ပာ်ဖျါ၀ဲလီၤ.
ရိၣ်ဟ့ၣ်ကၠၣ်ကလုာ်(ရိုဟင်ဂျာလူမျိုး)န့ၣ် အိၣ်ကးတံာ်အသးလၢ သုးကီၣ်ကးဒီး ရခၢၣ်သုးမုၫ်ဒိၣ်(ရခိုင့်တပ်တော်) တၫ်ဒုးတဖၣ်အဘၢၣ်စၢၤ၀ံၤ မ့ၫ်ပှၤတဖၣ်လၢ ဘၣ်တၫ်နီၤဖးအဒူၣ်အဆၢ(ခွဲခြားဆက်ဆံခံရ) လၢနံၣ်တဖၣ်အပူၤအဃိ မ့ၫ်ပှၤတဖၣ်လၢ ဘၣ်ဒိဘၣ်ထံးသ့ အဒိၣ်ကတၢၫ်စ့ၫ်ကီး UK တဲ၀ဲလီၤ. ကီၫ်ပယီၤဂ့ၫ်၀ီပူၤ လိၣ်ဘၣ်တၫ်တူၫ်မူတူၫ်ဒါ၀ံၤ တၫ်တဟ့ၣ်တၫ်ကမၣ်ဘၣ်အမဲာ်ညါ တၫ်ပျဲပူၤတၫ်ဒ်သိးအံၤကကတၢၫ်ကွံာ်အဂီၫ် လိၣ်၀ဲအဂ့ၫ် UK တဲ၀ဲလီၤ. တၫ်န့ၣ်အဃိ တၫ်စုက၀ဲၤ, စ့ဟဲနုာ်ဒီး တၫ်ဖိတၫ်လံၤတဖၣ် သုးကီၣ်ကး သုတဒိးန့ၫ်တဂ့ၤအဂီၫ် UK ကးတံာ်ဃာ်၀ဲအဂ့ၫ် တၫ်ဘိးဘၣ်ပာ်ဖျါအပူၤ ပာ်ဖျါ၀ဲလီၤ.
