ကၠီၣ်တဲၣ်-ပယီၤကီၫ်ဆၢပူၤ တၫ်ကသူၣ်ထီၣ်တၫ်ဘံၣ်တၫ်ဘၢဟီၣ်က၀ီၤဒိၣ်တခါအဂီၫ် တၫ်ဘံၣ်တၫ်ဘၢဘၣ်ထွဲပှၤကူၣ်သ့ကူၣ်ဘၣ်တဲဆီတခူထီၣ်

လါမးရှး(၈)သီ, ၂၀၂၄နံၣ်

ကီၫ်ကၠီၣ်တဲၣ်, ကီၫ်ရ့ၣ်တး(Tak), အဘူးဒီး၀့ၫ်မဲးဆီးအကပၤ ကီၫ်ပယီၤကီၫ်ဆၢဟီၣ်က၀ီၤပူၤ တၫ်ကသူၣ်ထီၣ် တၫ်ဘံၣ်တၫ်ဘၢဟီၣ်က၀ီၤဒိၣ် (မ့တမ့ၫ်) ပှၤဟီၣ်ခိၣ်ဖိတၫ်ဒိသူၣ်ဒိသးတၫ်လီၫ်တခါအဂီၫ် ကီၫ်ကၠီၣ်တဲၣ်, ၀့ၫ်ဘီကီာ်(ဘန်ကောက်မြို့) ခၠူၣ်လၣ်လီၣ်ကိဖၠၣ်စိမိၤ(ချူလာလောင်ကွန်းတက္ကသိုလ်) အထံရူၫ်ကီၫ်သဲးစဲအ့ၣ်၀ဲၤကျိၤသရၣ်ဒိၣ်စိသဃၢၤဒီး တၫ်ဘံၣ်တၫ်ဘၢဘၣ်ထွဲပှၤကူၣ်သ့ကူၣ်ဘၣ် ပၣ်နံးထၣ်၀ဲးထနၣ်ယၣ်ကိၣ်(ပါနိထန် ဝပ်ထနာယာဂွန်) (Panitan Wattanayagorn)တဲ၀ဲန့ၣ်လီၤ.

ဖဲလၢလါမးၡးဒီးလါအ့ဖြ့ၣ်အတီၫ်ပူၤ တၫ်ဒုးတဖၣ်ဟဲဆူၣ်ထီၣ်သ့အဃိ ကီၫ်ပယီၤပှၤဘၣ်ကီဘၣ်ခဲတဖၣ် ဟဲနုာ်လီၤသ့အါအါဂီၫ်ဂီၫ်အဂ့ၫ် ပၣ်နံးထၣ် ၀ဲးထနၣ်ယၣ်ကိၣ်(ပါနိထန် ဝပ်ထနာယာဂွန်) တဲလီၤ၀ဲဆူ Thai PBSတၫ်ကစီၣ်သန့ ဖဲလါမးၡး(၇)သီအနံၤန့ၣ်လီၤ.

ကၠီၣ်တဲၣ်ပဒိၣ်တခီ တၫ်ကဖီၣ်ဘှါၡဲကီၫ်ပယီၤတၫ်အိၣ်သးအဂီၫ် တၫ်ကတဲာ်ကတီၤတအိၣ်ဒံးဘၣ်အဂ့ၫ် တၫ်ဘံၣ်တၫ်ဘၢပှၤကူၣ်သ့ကူၣ်ဘၣ်တဲ၀ဲ၀ံၤ တၫ်ကသူၣ်ထီၣ်ဘၣ်တၫ်ဘံၣ်တၫ်ဘၢဟီၣ်က၀ီၤဒိၣ်(ဘေးကင်းလုံခြုံရေးဇုန်)တခါအဂီၫ် သုးမုၫ်ဒိၣ်ဒီး ထံလီၫ်ကီၫ်ပူၤကိတိာ်၀ဲၤကျိၤတဖၣ် တၫ်ထိၣ်ဃူးမၤသကိးတၫ်အဂီၫ် ကၠီၣ်တဲၣ်ပဒိၣ်တခီ ကြၢးကရၢကရိဒုးအိၣ်ထီၣ် ကမံးတံာ်လီၤဆီတခါအဂ့ၫ် ပၣ်နံးထၣ်(ပါနိထန်) တဲဒုးနဲၣ်ဖျါဃာ်၀ဲန့ၣ်လီၤ.

မ့မ့ၫ်လၢကၠီၣ်တဲၣ်ပဒိၣ်တခီ ကၠီၣ်တဲၣ်-ပယီၤထံကီၫ်(၂)ဘ့ၣ်အဘၢၣ်စၢၤ ကသူၣ်ထီၣ်၀ဲတၫ်ဘံၣ်တၫ်ဘၢဟီၣ်က၀ီၤဒိၣ်(ဘေးကင်းလုံခြုံရေးဇုန်)တခါ၀ံၤ တၫ်ကဆှၢန့ၫ်တၫ်အီၣ်တၫ်အီဒီး ကသံၣ်ကသီတဖၣ်ဆူ ကီၫ်ပယီၤပှၤဃ့ၫ်သုးပှၤလီၫ်အိၣ်ကမှံကမျၢၫ်(စစ်ဘေးရှောင်)တဖၣ်အဂီၫ် တၫ်ကသူ၀ဲ ခီဖျိရၤမတံ-မဲဆီးကျဲကျိၤတဆီဒီး ကၠီၣ်တဲၣ်-ပယီၤတၫ်ပနီၣ်ဂီၤကရၢတဖၣ် ကပာ်ဖှိၣ်ထီၣ်သး၀ံၤ တၫ်ကဆှၢန့ၫ်အဂီၫ် ကၠီၣ်တဲၣ်ပဒိၣ်တီၣ်ထီၣ်ဆူ အၣ်စံၣ်ယၣ်(အာဆီယံ)အဖီခိၣ် ဖဲအပူၤကွံာ်လါဖ့ၤဘြူၤအါရံၤ, တၫ်မၤ၀ဲ အၣ်စံၣ်ယၣ်ထံဂုၤကီၫ်ဂၤကိတိာ်(အာဆီယံ နိုင်ငံခြားရေးဝန်ကြီး)တဖၣ် တၫ်အိၣ်ဖှိၣ်အပူၤ တူၫ်လိာ်ဆီၣ်ထွဲ၀ဲန့ၣ်လီၤ.

ကၠီၣ်တဲၣ်ပဒိၣ် အတၫ်တီၣ်ဖျါထီၣ်လၢ ကျဲလၢကသူ၀ဲ တၫ်ကဟ့ၣ်တၫ်မၤစၢၤတဖၣ်အါကတ့ၫ်န့ၣ် အိၣ်၀ဲဒၣ်လၢသုးကီၣ်ကးအတၫ်ပၢဆှၢအဖီလာ်၀ံၤ, တၫ်ဟ့ၣ်တၫ်မၤစၢၤအပူၤ ကီၫ်ပယီၤတၫ်ပနီၣ်ဂီၤ(ကြက်ခြေနီ)လၢဟံးန့ၫ်မူဒါတအိၣ်အံၤ တၫ်ကဟ့ၣ်တၫ်ပျဲလၢ တၫ်ကလဲၤဆူ ပှၤဘၣ်ကီဘၣ်ခဲကမျၢၫ်တဖၣ်အအိၣ်န့ၣ် တလီၤတံၫ်ဘၣ်အဃိ တၫ်ပဲာ်အၢပဲာ်သီတဖၣ်အိၣ်ထီၣ်၀ဲန့ၣ်လီၤ.

သုးကီၣ်ကးပာ်လီၤကမျၢၫ်တၫ်ဘၣ်ကဲသုးတၫ်ဘျၢသဲစးဒီး တၫ်ဒုးတဖၣ်ဟဲဆူၣ်ထီၣ်အဃိ ပှၤကီၫ်ပယီၤဖိ(၁)ကလးဃၣ်ဃၣ် ဟဲနုာ်လီၤအိၣ်ကဒုလၢကီၫ်ကၠီၣ်တဲၣ်ပူၤအဂ့ၫ်ဒီး ပှၤအါဒၣ်တက့ၫ်န့ၣ်ခီဖျိလၢ ကမျၢၫ်တၫ်ဘၣ်ကဲသုးတၫ်ဘျၢသဲစးအဃိ ဃ့ၫ်ဟးထီၣ်၀ံၤ မ့မ့ၫ်ပှၤကီၫ်ပယီၤဖိလၢအကဲဒိၣ်တဖၣ်တခီ ပှ့ၤပာ်၀ဲဟံၣ်ဒၢးဒွဲ(ကွန်ဒိုတိုက်ခန်း)တဖၣ် ဖဲ၀့ၫ်ဘီကီာ်ဒီး ကီၫ်စဲၣ်အဂၤတဖၣ်အပူၤဒီး အ၀ဲသ့ၣ်အဖိမုၣ်ဖိခွါတဖၣ်စ့ၫ်ကီး လဲၤဖံးမၤလိတၫ်ဖဲ ကီၫ်ကၠီၣ်တဲၣ်, ထံဂုၤကီၫ်ဂၤကၠိတဖၣ်အဂ့ၫ် ပၣ်နံးထၣ်(ပါနိထန်) တဲ၀ဲန့ၣ်လီၤ.