လါမးရှး(၈)သီ, ၂၀၂၄နံၣ်
ကညီကီၫ်စဲၣ်, သုးကီၣ်ကးအသုးလၢအိၣ်ဖဲ၀့ၫ်ရၤမတံအကပၤ သ့ၣ်ခါညံၣ်နီၣ်(သင်္ဃန်းညီနောင်)သ၀ီတဖၣ် ဖဲမဟါ လါမးၡး(၇)သီအနံၤန့ၣ် ကညီဒီကလုာ်စၢဖှိၣ်ကရၢ-KNUတီခိၣ်ရိၣ်မဲ တၫ်ပၢၫ်ဆၢသုးပာ်ဖှိၣ်တဖၣ် နုာ်လီၤဒုး၀ဲအဂ့ၫ် Myanmar Now တၫ်ကစီၣ်သန့ ပာ်ဖျါ၀ဲလီၤ.
သ့ၣ်ခါညံၣ်နီၣ်သ၀ီပူၤ သုးကီၣ်ကးအသုးတၫ်တိာ်ကူၣ်ကျဲၤ (စဗခ)အိၣ်၀ဲတတီၤ၀ံၤ ခမရ-၃၅၅, ၃၅၆ဒီး ၃၅၇ သုးရ့ၣ်တဖၣ်အိၣ်ဆီလီၤအသးလီၤ.
ဖဲဟါ(၃)နၣ်ရံၣ်ဃၣ်ဃၣ်အကတီၫ်န့ၣ် သုးကီၣ်ကး အကဘီယူၤဒုးသုးတခိၣ် တ့ၫ်လီၤမ့ၣ်ပိၫ်(၁)ဘျီ ဖဲတၫ်လီၫ်လၢ တယာ်၀ဲလၢ တၫ်ပၢၫ်ဆၢသုးပာ်ဖှိၣ်တဖၣ်အိၣ်န့ၣ်လီၤ. အလီၫ်ခံ ဒုးယၤကဘီယူၤတခိၣ် ယူၤ၀့ၤ၀ီၤလၢမူကပိာ်အဂ့ၫ် တဲ၀ဲလီၤ.
သုးကီၣ်ကးအသုး လၢအိၣ်ဖဲသ့ၣ်ခါညံၣ်နီၣ်(သင်္ဃန်းညီနောင်)တဖၣ် KNLA သုးက့နီၫ်ဂံၫ်(၆)လဲၤခးအီၤတလီၫ်လီၫ်လီၤ.
ဖဲအပူၤကွံာ် လါယနူၤအါရံၤ(၂၉)သီအနံၤစ့ၫ်ကီး ကဘီယူၤဟဲၣ်လံၣ်ခီၣ်ပံၣ်ထၢၣ်(Helicopter)တခိၣ်လၢ ဟဲဖဲသုးကီၣ်ကးအသုး ခီၣ်ချ့သုးရ့ၣ်(၃၅၆) သ့ၣ်ခါညံၣ်နီၣ်(သင်္ဃန်းညီနောင်)အကတီၫ် ဘၣ်တၫ်အိၣ်ခိးခးအီၤလၢ KNLA သုးက့နီၫ်ဂံၫ်(၆) အစုတီၤဖီလာ် ခီၣ်ဘရၣ်သုးကျိၤ(ကော်ဘရာစစ်ကြောင်း)အဃိ ဘၣ်လီၤတဲာ်ဟးဂီၤ၀ဲလီၤ. ကဘီယူၤ၀ဲအံၤ ဟဲဆှၢ၀ဲ သုးခိၣ်ကျၢၫ်ဖိအ့မ့နီၣ်လၢကဟံးထီၣ်မူဒါဒ် နီၫ်ဂံၫ်(၄၄)သုးတြိၤခိၣ်သီအဂီၫ်န့ၣ်လီၤ. ကဘီယူၤလီၤတဲာ်ဟးဂီၤအဃိ သုးတြိၤခိၣ်အသီ သုးခိၣ်ကျၢၫ်ဖိအ့မ့နီၣ်တကးဘၣ် သုးခိၣ်ဒိၣ်ဖိ(၂)ဂၤဒီးသုးခိၣ်စိ(၂)ဂၤစ့ၫ်ကီးဘၣ်သံ၀ဲအဂ့ၫ် တၫ်ကစီၣ်သန့တဖၣ် ကွဲးဖျါ၀ဲလီၤ.
photo:ipmsdl
