တၫ်မၤ၀ဲ (၆)၀ီတ၀ီ ဒီးကထၢၣ်ထံၣ်သၣ်ပၠၣ်ခရံာ်ဖိဖၠၣ်စိမိၤ(TCI) ကၠိပျၫ်အမူးတၫ်ရဲၣ်တၫ်ကျဲၤ ၀ံၤ၀ဲဂ့ၤဂ့ၤ

March 7, 2024
7 months ago

လါမးရှး(၇)သီ, ၂၀၂၄နံၣ်

ဖဲ၂၀၂၄နံၣ်, စးထီၣ်ဖဲ လါမးၡး(၃)သီအနံၤတုၤ(၅)သီအနံၤ, (၃)သီအတီၫ်ပူၤ, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅), မုၫ်တြီၫ်ကီၫ်ရ့ၣ်, ဘုသိၣ်ကီၫ်ဆၣ်, အူဒါထၣ်(အူးဒါးထာ)ဟီၣ်က၀ီၤပူၤ တၫ်မၤ၀ဲ(၆)၀ီတ၀ီ ဒီးကထၢၣ်ထံၣ်သၣ်ပၠၣ်ခရံာ်ဖိဖၠၣ်စိမိၤ(TCI) ကၠိပျၫ်အမူးတၫ်ရဲၣ်တၫ်ကျဲၤ၀ံၤ၀ဲဂ့ၤဂ့ၤအဂ့ၫ် တၫ်သ့ၣ်ညါဘၣ်န့ၣ်လီၤ.

(၃)သီအတီၫ်ပူၤ ဒီးကထၢၣ်ထံၣ်သၣ်ပၠၣ်ခရံာ်ဖိဖၠၣ်စိမိၤ(TCI) ကၠိပျၫ်အမူးတၫ်ရဲၣ်တၫ်ကျဲၤအပူၤ တၫ်မၤ၀ဲတၫ်စံးဘျုးစံးဖှိၣ်တၫ်ဘါ, ဖျိကၠိဟါတၫ်အီၣ်ဒီး တၫ်ဟ့ၣ်လီၤလံာ်အုၣ်သး(ဘွဲ့လက်မှတ်)တၫ်ရဲၣ်တၫ်ကျဲၤတဖၣ် ပာ်ဃုာ်၀ဲန့ၣ်လီၤ.

ဖဲလါမးၡး(၅)သီအနံၤ, ဂီၤ(၈)နၣ်ရံၣ်အဆၢကတီၫ်, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅), မုၫ်တြီၫ်ကီၫ်ရ့ၣ်,ဘုသိၣ်ကီၫ်ဆၣ်, အူဒါထၣ်ဟီၣ်က၀ီၤပူၤ တၫ်မၤ၀ဲ(၆)၀ီတ၀ီ ဒီးကထၢၣ်ထံၣ်သၣ်ပၠၣ်ခရံာ်ဖိဖၠၣ်စိမိၤ(TCI) ကၠိပျၫ်အမူးတၫ်ရဲၣ်တၫ်ကျဲၤ ဖဲ TCIဘျီၣ်ရိဖှိၣ်ပူၤန့ၣ်လီၤ. TCIကၠိပျၫ်တၫ်ရဲၣ်တၫ်ကျဲၤအံၤ တၫ်စးထီၣ်အီၤလၢ တၫ်ဘူၣ်တၫ်ဘါတၫ်ရဲၣ်တၫ်ကျဲၤ, တၫ်ဟ့ၣ်လီၤလံာ်အုၣ်သးလၢဖျိထီၣ်ကၠိတဖၣ်ဒီး တၫ်ဟ့ၣ်လီၤစ့ၫ်ကီးခိၣ်ဖးတဖၣ်န့ၣ်လီၤ.

တကးဘၣ် ခိၣ်နၫ်ပှၤဘၣ်မူဘၣ်ဒါလၢဟဲထီၣ်၀ဲ ကၠိပျၫ်တၫ်ရဲၣ်တၫ်ကျဲၤပူၤတဖၣ်စ့ၫ်ကီး တဲလီၤတၫ်ကတိၤဟ့ၣ်ဂံၫ်ဟ့ၣ်ဘါတဖၣ်န့ၣ်လီၤ. တၫ်ပျၫ်ကၠိမူးတၫ်ရဲၣ်တၫ်ကျဲၤ၀ံၤအလီၫ်ခံ ဟါလီၤခီအဆၢကတီၫ် တၫ်မၤ၀ဲစ့ၫ်ကီး ဟါတၫ်အီၣ်တၫ်ရဲၣ်တၫ်ကျဲၤဒီး တၫ်သူၣ်၀ံၣ်သးဆၢတၫ်ရဲၣ်တၫ်ကျဲၤတဖၣ်စ့ၫ်ကီး တၫ်သ့ၣ်ညါဘၣ်န့ၣ်လီၤ.

“တၫ်သိၣ်နဲၣ်လိအပူၤ တၫ်ကီတၫ်ခဲအဒိၣ်ကတၢၫ်န့ၣ် ကၠိသရၣ်တလၢပှဲၤဘၣ်. ကီၫ်ပူၤ, ကီၫ်ချၢပှၤကူၣ်သ့ကူၣ်ဘၣ်တဖၣ် တၫ်ကဟဲပာ်ဖှိၣ်မၤသကိးအဂီၫ် ပကွဲမုာ်အီၤလီၤ. ကၠိဖိလၢဖျိထီၣ်တနီၤအကျါ ပှၤလၢကဆဲးထီၣ်ကၠိတဖၣ်တခီ သုတဟ့ၣ်အဃၣ်ညီညီဘၣ်ဒီး တၫ်ကဂုၫ်ကျဲးစၢးတိဖျိတုၤလၢ တၫ်မုၫ်လၫ်ဖီတဲၣ်န့ၫ်တစုဒီး မ့မ့ၫ်ဖျိကၠိအဂၤတနီၤလၢ ကက့ၤလီၤပာ်ဖှိၣ်မၤသကိးတၫ်လၢ ကီၫ်ရ့ၣ်, ကီၫ်ဆၣ်, ၀ဲၤကျိၤ, ၀ဲၤဒ့တခါစုာ်စုာ်တခီ ဒ်မူဒါလၢအလီၫ်ဘၣ်တဖၣ် ကမၤလၢပှဲၤအဂ့ၫ်“ TCIကၠိ, ခီၣ်ဖၠူထၢၣ်၀ဲၤကျိၤခိၣ် သရၣ်စီၤတၫ်လုၫ်မူ တဲဟ့ၣ်ဂံၫ်ဟ့ၣ်ဘါ၀ဲန့ၣ်လီၤ.

TCI ကၠိပျၫ်တၫ်ရဲၣ်တၫ်ကျဲၤပူၤ ခိၣ်နၫ်လၢဟဲထီၣ်၀ဲတဖၣ်မ့ၫ်၀ဲ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA), သုးရိၣ်မဲခိၣ်ကျၢၫ်(၂) စီၤဘီကၠီၣ်ဟဲ, သုးက့နီၫ်ဂံၫ်(၅) သုးက့ခိၣ်စီၤဂံၫ်နွံ, မုၫ်တြီၫ်ကီၫ်ရ့ၣ်ခိၣ်ပဒိၣ်စီၤထဲဒၢၫ်, လီၫ်ခၢၣ်သးကညီပိာ်မုၣ်ကရၢခိၣ်နီၫ်ကညီဖိ, SGPA Founder စီၤကပံာ်, (KTWG) သရၣ်မုၣ်လၢၫ်ထူ, မုၫ်တြီၫ်ကီၫ်ရ့ၣ် ကူၣ်သ့ဆဲးလၤ၀ဲကျိၤခိၣ်ပဒိၣ်ယူၣ်ဘံၣ်ဖိဒီး ခိၣ်နၫ်အဂုၤအဂၤတဖၣ်စ့ၫ်ကီးလဲၤထီၣ်၀ဲန့ၣ်လီၤ.

TCIကၠိ, အဲးကလံး၀ဲၤကျိၤခိၣ် သရၣ်မုၣ်နီၫ်နိၣ်ရံရွှၣ်(နော်ရင်းရွှေ) စ့ၫ်ကီးတဲ၀ဲလၢ “တၫ်သိၣ်လိနဲၣ်လိအပူၤ တၫ်ကီတၫ်ခဲအဒိၣ်ကတၢၫ်တခီ မ့ၫ်ကၠိသရၣ် တလၢပှဲၤဘၣ်န့ၣ်လီၤ. လၢန့ၣ်အမဲာ်ညါ ကၠိဖိတဖၣ်အကျါ ကၠိဖိလၢဟဲထီၣ်လၢ၀့ၫ်ပူၤဒီး ကၠိဖိလၢအိၣ်လၢကစၢၫ်ခိၣ်တဖၣ်တခီ levelလီၤဆီလိာ်သးတစဲးအဃိ တၫ်ဘၣ်ထိၣ်ဃူသိၣ်လိ၀ဲအဃိ တၫ်ကီတၫ်ခဲအိၣ်၀ဲအဂ့ၫ်“ တဲ၀ဲန့ၣ်လီၤ.

၂၀၂၃-၂၀၂၄နံၣ် တၫ်သိၣ်လိၣ်နံၣ်အပူၤ TCIကၠိဖိ မုၣ်/ခွါ ခဲလၢာ်ပာ်ဖှိၣ်အိၣ်၀ဲ (၉၃)ဂၤန့ၣ်လီၤ. ကီၫ်ပူၤ, ကီၫ်သူလ့ၤပူၤဒီး ပှၤဘၣ်ကီဘၣ်ခဲဒဲက၀ီၤပူၤ ကၠိဖိတဖၣ်စ့ၫ်ကီး ဟဲထီၣ်မၤလိတၫ်လၢ ဒီးကထၢၣ်ထံၣ်သၣ်ပၠၣ်ခရံာ်ဖိဖၠၣ်စိမိၤ(TCI)ကၠိ အိၣ်၀ဲဒၣ်န့ၣ်လီၤ.

“လၢန့ၣ်အမဲာ်ညါ ခီဖျိလၢသုးကီၣ်းကး အတၫ်မၤတံာ်တာ်တဖၣ်အဃိ တၫ်သိၣ်နဲၣ်လိတဖၣ် တၫ်ဘၣ်သုးလီၫ်သုးကျဲလဲၤသိၣ်လိန့ၫ်ဘၣ်တၫ်လၢပှၫ်လၫ်ကျါအိၣ်အသိး တၫ်သိၣ်လိနဲၣ်လိအပူၤ တၫ်ပီးတၫ်လီလၢအလိၣ်ဘၣ်တဖၣ်စ့ၫ်ကီး တလၢပှဲၤအဃိ တၫ်ကီတၫ်ခဲအိၣ်၀ဲအဂ့ၫ်“ TCIကၠိ, မုၫ်ကျိၤ၀ဲၤကွာ်၀ဲၤကျိၤခိၣ် စီၤတနၫ်ထူစီ တဲ၀ဲန့ၣ်လီၤ.

TCI ကၠိပျၫ်တၫ်ရဲၣ်တၫ်ကျဲၤပူၤ ကၠိဖိ မုၣ်/ခွါ, ကၠိဖိမိၫ်ပၫ်, ကၠိသရၣ်/သရၣ်မုၣ်ဒီး ခိၣ်နၫ်ပှၤဘၣ်မူဘၣ်ဒါခဲလာ်ပာ်ဖှိၣ်(၃၀၀)ဂၤ ဟဲထီၣ်၀ဲန့ၣ်လီၤ.

ဒီးကထၢၣ်ထံၣ်သၣ်ပၠၣ်ခရံာ်ဖိဖၠၣ်စိမိၤအံၤ တၫ်စးထီၣ်ဒုးအိၣ်ထီၣ်တ့ၫ်အီၤဖဲ (၂၀၁၄)နံၣ်ဒီးတုၤလၢ(၂၀၂၄)နံၣ်, အနံၣ်ယံာ်(၁၀)အတီၫ်ပူၤ ကၠိဖိလၢဖျိထီၣ်အိၣ်(၆)ဖုဒီး ကၠိဖိလၢဖျိထီၣ်ခဲလာ်အိၣ်၀ဲ(၉၂)ဂၤလံန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၫ်ပၢဟီၣ်က၀ီၤပူၤ ကၠိဖိတဖၣ်ဟဲအါထီၣ်အဃိ လိၣ်ဘၣ်ကၠိသရၣ်, တၫ်အိၣ်ဆိးလီၫ်ကျဲ, တၫ်ဆီၣ်ထွဲမၤစၢၤအဂုၤအဂၤတဖၣ်အါမးန့ၣ်လီၤ.