လါမးရှး(၇)သီ, ၂၀၂၄နံၣ်
ရခၢၣ်ကီၫ်စဲၣ်ပူၤ သုးကီၣ်ကးဒီး ရခၢၣ်သုးမုၫ်ဒိၣ် တၫ်ဒုးလိာ်သးအဖီခိၣ် ဟဲတုၤဃီၤ၀ဲလၢ ၀့ၫ်ခိၣ်စ့းတွ့ၣ်(စစ်တွေ)အဃိ တၫ်အိၣ်သးအၢထီၣ်၀ဲအဂ့ၫ် ဘီမုၫ်စၢဖှိၣ်ကရၢ ဘၣ်ထွဲဟီၣ်ခိၣ်ဖိတၫ်ဒိသူၣ်ဒိသးတၫ်တၢၣ်ပီၣ်တဲသကိး၀ဲၤဒၢး(UNOCHA) ဘိးဘၣ်ပာ်ဖျါ၀ဲအဂ့ၫ် RFA တၫ်ကစီၣ်သန့ ပာ်ဖျါ၀ဲလီၤ.
စးထီၣ်ဖဲလါဖ့ၤဘြူၤအါရံၤအလၢာ် စ့းတွ့ၣ်၀့ၫ်(စစ်တွေမြို့)ဖီခိၣ် ကျိဖးဒိၣ်အချံလီၤတဲာ်တကးဘၣ် ၦၤဘၣ်သုးလီၫ်သုးကျဲအိၣ်အါထီၣ်အသိး ဆူၣ်ချ့တၫ်ကဟုကယာ်တဖၣ်စ့ၫ်ကီး ဘၣ်ဟးဂီၤကွံာ်၀ဲလီၤ.
အပူၤကွံာ်နံၣ် စးထီၣ်ဖဲလါနိၣ်၀့ဘၢၣ်န့ၣ် ပလဲး၀း(ပလက်ဝ)ဒီး ရခၢၣ်ကီၫ်စဲၣ်ပူၤ ၦၤစံၣ်သုးၦၤဘၣ်ကီဘၣ်ခဲဖိ အိၣ်ထီၣ်တကလီၫ်တခီဃၣ်ဃၣ်န့ၣ်လီၤ. တၫ်န့ၣ်အဃိ တၫ်မ့ၫ်ပာ်ဖှိၣ်ဒီးအပူၤကွံာ် ၦၤဘၣ်ကီဘၣ်ခဲဖိ နီၫ်ဂံၫ်န့ၣ် ၦၤဘၣ်ကီဘၣ်ခဲဖိ နီၫ်ဂံၫ်အိၣ်ထီၣ် သၢကလီၫ်တခီလံန့ၣ်လီၤ.
လၢကတီၫ်အံၤ ရခၢၣ်ကီၫ်စဲၣ်ပူၤ ထံကျဲ, ခိကျဲ ဘၣ်တၫ်ကးတံာ်ကွံာ်အဃိ ဟံၣ်တၫ်ပီးတၫ်လီဒီး တၫ်အီၣ်တၫ်အီတဖၣ် ဘၣ်ကၤ(ၡား)ထီၣ်၀ံၤ အၦ့ၤကလံၤဒိၣ်ထီၣ်ဒီး ကမျၢၫ်ကွၫ်ဆၢၣ်မဲာ်ဘၣ် တၫ်ပတုာ်ကွံာ် အ့ၣ်ထၢၣ်နဲး(Internet)ဒီး လီတဲစိတၫ်ဆဲးကျိး(ဖုန်းလိုင်း) တဖၣ်အဂ့ၫ် UNOCHAတဲ၀ဲလီၤ. ဘၣ်ကီဘၣ်ခဲဒဲက၀ီၤ(ဒုက္ခသည်စခန်း)ပူၤ ၦၤမၤတၫ်ဖိတဖၣ်ဒီး ၦၤမၤစၢၤတၫ်ဖိဖဲန့ၣ်တဖၣ် ဆီၣ်ထွဲမၤစၢၤတၫ် ဖဲတၫ်လီၫ်လၢမၤန့ၫ်မၤသ့၀ဲအလီၫ်တဖၣ်အဂ့ၫ် တၫ်သ့ၣ်ညါဘၣ်လီၤ.
