လါမးရှး(၇)သီ, ၂၀၂၄နံၣ်
ကီၫ်ပယီၤပူၤ တၫ်မၤအၢမၤသီတဖၣ်လၢကဲထီၣ်သးတဖၣ် တၫ်ထီဒါ၀ဲဆူၣ်ဆူၣ်ကလၢၤအဂ့ၫ်ဒီး တၫ်မၤအၢမၤသီတဖၣ် ကပတုာ်ကွံာ်တဘျီဃီအဂီၫ် အၣ်စံၣ်ယၣ်(အာဆီယံ)ခိၣ်နၫ်တဖၣ်ဒီး အီစတြ့လယါ(ဩစတြေးလျ)ထံကီၫ်အဘၢၣ်စၢၤ တၫ်မၤ၀ဲ ပတီၫ်ထီတၫ်တၢၣ်ပီၣ်တဲသကိး(၃)သီ၀ံၤအလီၫ်ခံ ဖဲလါမးၡး(၆)သီအနံၤ လၢအတၫ်ထုးထီၣ်ပာ်ဖျါအပူၤ ဃ့ထီၣ်ဃာ်၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ကီၫ်ပယီၤပူၤ တၫ်သဘံၣ်သဘုၣ်, တၫ်ဃံးတၫ်စ့ၤ လၢဟဲဒိၣ်ထီၣ်တဖၣ်တၫ်ဘှါၡဲအီၤကန့ၫ်အဂီၫ်, တၫ်မၤဖျါထီၣ် အၣ်စံၣ်ယၣ်တၫ်အၢၣ်လီၤ(၅)ထံၣ်အမိၫ်လံမိၫ်ပှၫ်ကန့ၫ်အဂီၫ် တၫ်ကဆီၣ်ထွဲမၤစၢၤ၀ဲအဂ့ၫ်စ့ၫ်ကီး လၢတၫ်ထုးထီၣ်ပာ်ဖျါအပူၤ ပာ်ဖျါဃာ်၀ဲန့ၣ်လီၤ. ဒ်သိး တၫ်မၤဖျါထီၣ်အၣ်စံၣ်ယၣ်တၫ်အၢၣ်လီၤ(၅)ထံၣ်ကန့ၫ်အဂီၫ် အၣ်စံၣ်ယၣ်-အီစတြ့လယါကရၢတခီ တၫ်ကဆီၣ်တခူဃ့ထီၣ်ဆူ ထံကီၫ်အဂုၤအဂၤပာ်ဃုာ် ထံကီၫ်လၢအအိၣ်ဘူးဒီးကီၫ်ပယီၤတဖၣ် ဒီးဘီမုၫ်စၢဖှိၣ်ကရၢ(ကုလသမဂ္ဂ)အအိၣ်အဂ့ၫ် လၢတၫ်ထုးထီၣ်ပာ်ဖျါအပူၤပာ်ဖျါဃာ်၀ဲန့ၣ်လီၤ.
တကးဘၣ် တၫ်ကဟ့ၣ်ပှၤဟီၣ်ခိၣ်ဖိတၫ်ဒိသူၣ်ဒိသးတၫ်ဆီၣ်ထွဲမၤစၢၤတဖၣ် တုၤလီၤတီၤလီၤအဂီၫ်ဒီး ပှၤခဲလၢာ်ပာ်ဃုာ်တၫ်ထိၣ်ဃူတၫ်တၢၣ်ပီၣ်တဲသကိးတဖၣ် တၫ်ကမၤအီၤတုၤလီၤတုၤလီၤအဂီၫ်စ့ၫ်ကီး တဲဆီၣ်တခူထီၣ်ဃာ်၀ဲန့ၣ်လီၤ. အီစတြ့လယါဒီး အံၣ်စံၣ်ယၣ်ကဲထီၣ်တ့ၫ် တၫ်တၢၣ်ပီၣ်တဲသကိးထံကီၫ် ပှဲၤထီၣ်(၅၀)နံၣ်တၫ်မၤလၤကပီၤမုၫ်နံၤအသိး တၫ်မၤ၀ဲအၣ်စံၣ်ယၣ်ဒီး အီစတြ့လယါပတီၫ်ထီတၫ်တၢၣ်ပီၣ်တဲသကိး လၢလါမးၡး(၄)သီအနံၤတုၤ(၆)သီအနံၤ, (၃)သီအတီၫ်ပူၤ ဖဲ၀့ၫ်မဲၫ်ဘိ(Melbourne) န့ၣ်လီၤ.
ကီၫ်ပယီၤပူၤ ၂၀၂၁နံၣ်, လါဖ့ၤဘြူၤအါရံၤ(၁)အနံၤ, သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤလံၤလံၤ သုးကီၣ်ကးအံၤ လၢအၣ်စံၣ်ယၣ်တၫ်အိၣ်ဖှိၣ်တဖၣ်အပူၤ တၫ်တပျဲထီၣ်၀ဲဘၣ်ဒီး ပျဲထီၣ်ဒၣ်ထဲ ပှၤလၢတကဲထံရူၫ်ကီၫ်သဲးခၢၣ်စးတဖၣ်အဃိ လၢတၫ်အိၣ်ဖှိၣ်တဖၣ်အပူၤ သုးကီၣ်ကးခၢၣ်စးတဖၣ် တၫ်လဲၤထီၣ်၀ဲတအိၣ်ဘၣ်န့ၣ်လီၤ.
ref:voa
