လါမးရှး (၄)သီ, ၂၀၂၄နံၣ်
ကီၫ်ကၠီၣ်တဲၣ်, ၀့ၫ်ဘီကီာ်(ဘန်ကောက်မြို့) ဘျီၣ်ဒိၣ်(လွှတ်တော်)ပူၤ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ယံာ်(၃)နံၣ်အတီၫ်ပူၤ ကီၫ်ပယီၤအပူၤတၫ်သဘံၣ်သဘုၣ်တဖၣ်ဒီး ထံဖိကီၫ်ဖိကမျၢၫ် ဘၣ်ကီဘၣ်ခဲ တၫ်ဂီၤတဖၣ် ဘၣ်တၫ်ဒုးနဲၣ်ဖျါထီၣ်အီၤ အဆိကတၢၫ်တဘျီန့ၣ်လီၤ.
ကီၫ်ပယီၤကလုာ်ဒူၣ်တဖၣ် အတၫ်အိၣ်မူအိၣ်ဂဲၤဒီး လၢကီၫ်ဆၢဒီတကျိၤ ၦၤဃ့ၫ်သုးၦၤလီၫ်အိၣ်ကမှံဖိ(စစ်ဘေးရှောင်များ) အတၫ်ပီးတၫ်လီတဖၣ် ဒ်ဒွဲဂ့ၤဆဲးလၤတၫ်ဒုးနဲၣ်ဒၢး(အနုပညာလက်ရာပြခန်း)အသိး အဆိကတၢၫ်တဘျီ ဘၣ်တၫ်အိးထီၣ်ဒုးနဲၣ်ဖျါ၀ဲန့ၣ်လီၤ.
ဒွဲဂ့ၤဆဲးလၤတၫ်ဒုးနဲၣ်ဒၢးန့ၣ် ဖဲလါမးၡး(၃)သီဒီး (၄)သီအနံၤန့ၣ် တၫ်ကဒုးနဲၣ်၀ဲ၀ံၤ တၫ်ရဲၣ်တၫ်ကျဲၤတခီ ဘၣ်တၫ်တီခိၣ်ရိၣ်မဲၤမၤအီၤခီဖျိလၢ Spirit in Education Movement (SEM)န့ၣ်လီၤ.
ကၠီၣ်တဲၣ်ဘျီၣ်ဒိၣ်ပူၤ လၢယံာ်(၃)နံၣ် သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ကီၫ်ပယီၤဂ့ၫ်၀ီ တၫ်ဘှါဆှဲအီၤကန့ၫ်အဂီၫ် ကၠီၣ်တဲၣ်ၦၤမၤထံရူၫ်ကီၫ်သဲးဖိတဖၣ်ဒီး ဒီကလုာ်ဃူဖိးပဒိၣ်(NUG)ပာ်ဃုာ် ကီၫ်ပယီၤဒံၣ်မိၣ်ကရ့ၣ်စံၣ်ဂံၫ်ဘါကရၢတဖၣ်(မြန်မာ့ဒီမိုကရေစီ အင်အားစုအဖွဲ့များ) လၢ(၂)သီအတီၫ်ပူၤ တၢၣ်ပီၣ်တဲသကိးတၫ်အကတီၫ် ဒွဲဂ့ၤဆဲးလၤတၫ်ဒုးနဲၣ်ဒၢး ဘၣ်တၫ်ဒုးနဲၣ်ဖျါအီၤန့ၣ်လီၤ.
ဘၣ်ထွဲဒီးသုးကီၣ်ကး အကလံၤကျါတၫ်ခးလီၤတၫ်တဖၣ်လၢအမ့ၫ် Installation Art အပူၤ တၫ်လီၫ်လၢဘၣ်တၫ်လဲၤခးလီၤလၢကလံၤကျါ တၫ်ပီးတၫ်လီလၢအိၣ်တ့ၫ်တဖၣ်ဒီး တၫ်လီၫ်လၢသုးကီၣ်ကးလဲၤခးလီၤ, အနီၫ်ဂံၫ်နီၫ်ဒွး, တၫ်သံတၫ်ၦၫ် Data Visualizationစ့ၫ်ကီး ဘၣ်တၫ်ပာ်ဖျါဃုာ်၀ဲအဂ့ၫ် တၫ်သ့ၣ်ညါဘၣ်လီၤ.
တၫ်တၢၣ်ပီၣ်တဲသကိးအပူၤ ဒီကလုာ်ဃူဖိးပဒိၣ်(NUG)ဒီး ကလုာ်ဒူၣ်ဖီၣ်စုက၀ဲၤကရၢ(တိုင်းရင်းသားလက်နက်ကိုင် အဖွဲ့)ပာ်ဃုာ် ကၠီၣ်တဲၣ်ပဒိၣ်အကိတိာ်တဖၣ်(ထိုင်းအစိုးရအဖွဲ့က ဝန်ကြီးများ), ကၠီၣ်တဲၣ်ပၣ်တံၣ်ကရၢတဖၣ်(ထိုင်းပါတီများ), ဟီၣ်ခိၣ်ဖိခွဲးဃာ်ကရၢတဖၣ်(လူ့အခွင့်အရေးအဖွဲ့များ), တၫ်ကစီၣ်ဒီး မံၣ်ဒံၣ်ယၣ်(မီဒီယာဌာန)တဖၣ် ကထီၣ်တၫ်အိၣ်ဖှိၣ်တၢၣ်ပီၣ်တဲသကိး၀ဲန့ၣ်လီၤ.
ref:westernnews
