လါမးရှး (၄)သီ, ၂၀၂၄နံၣ်
ဖဲ ၂၀၂၄နံၣ်, လါမးၡး(၁)သီအနံၤတုၤ(၃)သီအနံၤ, (၃)သီအတီၫ်ပူၤ ယိၤဒိၣ်ကလံၤစိးဟီၣ်က၀ီၤ(ရှမ်းမြောက်ဒေသ) သိၣ်မှံကရၢ(၃)ဖုဒီး သုးကီၣ်ကးပှၤဘၣ်မူဘၣ်ဒါတဖၣ် ထံၣ်လိာ်တၢၣ်ပီၣ်တဲသကိးသး ဖဲကီၫ်တရူး, ၀့ၫ်ကူၣ်မ့(ကူမင်းမြို့)အဂ့ၫ် တၫ်သ့ၣ်ညါဘၣ်န့ၣ်လီၤ.
အဆိကတၢၫ်တၫ်သ့ၣ်ညါဘၣ်လၢ သိၣ်မှံကရၢ(၃)ဖုဒီး သုးကီၣ်ကးအဘၢၣ်စၢၤ ပာ်လီၤ၀ဲတၫ်အၢၣ်လီၤအီလီၤ (၆)ထံၣ်အဂ့ၫ်န့ၣ်လီၤ. ကိးကးဟီၣ်က၀ီၤ(ကိုးကန့်ဒေသ)ပူၤ တၫ်ကပာ်ပနီၣ်ဒ် MNDAA လၢယိၤဒိၣ်ကီၫ်စဲၣ်ဟီၣ်က၀ီၤလီၤဆီ(ရှမ်းပြည်နယ်အထူးဒေသ) အဖိးသဲစးပဒိၣ်အသိးန့ၣ်လီၤ.
AA, TNLA ဒီး MNDAA သိၣ်မှံကရၢ(၃)ဖု ထီၣ်ဒုးမၤန့ၫ်ဃာ်၀ဲ၀့ၫ်တဖၣ် နစက ကပာ်ပနီၣ်အီၤဒ် အ၀ဲသ့ၣ်န့ၫ်ပၢဘၣ်၀့ၫ်အသိး၀ံၤဒီး ခံခီခံကပၤသုးတဖၣ် တၫ်ကဘၣ်အိၣ်၀ဲဒၣ်လၢ တၫ်အၢၣ်လီၤဃာ်ဟီၣ်က၀ီၤပူၤ၀ံၤ သုးခံခီခံကပၤကဟးအိၣ်ကစီၤပာ်သးအဂီၫ်န့ၣ်လီၤ. AA, TNLA ဒီး MNDAA သိၣ်မှံကရၢ(၃)ဖုအံၤ တၫ်ကဘၣ်ဟးဆှဲးလၢ တၫ်ကမၤဘၣ်ဒိ တရူးထံကီၫ် ဒီကလုာ်အတၫ်ကဲဘျုးမုာ်ကျိၤ၀ဲၤကွၫ်(တရုတ်နိုင်ငံအမျိုးသားအကျိုးစီးပွား)အဂ့ၫ်စ့ၫ်ကီး တၫ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲ ခၠ့ဆွ့ၣ်ဟီၣ်(ချင်းရွှေဟော်) နစက ကပာ်လီၤ၀ဲတၫ်ထၢခိသွဲ, တၫ်သမံသမိးတၫ်ဖိတၫ်လံၤ(ကုန်စည်စစ်ဆေးရေး), တၫ်ပၢဆှၢပှၤနုာ်လီၤဟးထီၣ်(လူဝင်မှုကြီးကြပ်ရေး)တဖၣ်အသိး ကိးကးတၫ်ကရၢကရိတဖၣ်စ့ၫ်ကီး တၫ်ကဟံးမူဒါသဃၢၤဒီးအီၤန့ၣ်လီၤ.
လၢန့ၣ်အမဲာ်ညါ ခၠ့ဆွ့ၣ်ဟီၣ် တၫ်သမံသမိးတြဲၤ (ချင်းရွှေဟော်ဂိတ်)တဆီ တၫ်မၤတၫ်ကူၤလဲၤမၤကၤဒီး ကီၫ်တရူးအပူၤ ခိသွဲကျိာ်စ့(၇၀)မျးကယၤ လၢတၫ်ထၢန့ၫ်အီၤတဖၣ် သိၣ်မှံကရၢ(၃)ဖုခၢၣ်စး (ညီနောင် မဟာမိတ် ၃-ဖွဲ့ကိုယ်စား) ကိကးပဒိၣ်ကဟံးန့ၫ်၀ဲ၀ံၤ မ့မ့ၫ် (၃၀)မျးကယၤတခီ နစက ကဟံး၀ဲအဂီၫ် တၫ်အၢၣ်လီၤဃာ်၀ဲန့ၣ်လီၤ.
တရူးအတၫ်နုာ်လီၤဘှါၡဲတၫ်လၢတၫ်ဘၢၣ်စၢၤအဃိ တၫ်ပာ်လီၤန့ၫ်၀ဲတၫ်အၢၣ်လီၤအီလီၤတဖၣ်အဂ့ၫ် တၫ်ကစီၣ်တဖၣ်ဟးထီၣ်၀ဲဘၣ်ဆၣ် မ့မ့ၫ် ခံခီခံကပၤတခီဘၣ်ထွဲဒီးတၫ်ဂ့ၫ်သ့ၣ်တဖၣ်အဖီခိၣ် ကတီၫ်ခဲအံၤ တၫ်ထုးထီၣ်ပာ်ဖျါတအိၣ်၀ဲနီတမံၤဒံးဘၣ်န့ၣ်လီၤ.
စးထီၣ် ဖဲအပူၤကွံာ် ၂၀၂၄နံၣ်, လါယနူၤအါရံၤ(၁၁)သီအနံၤ သိၣ်မှံကရၢ(၃)ဖုဒီး သုးကီၣ်ကးအဘၢၣ်စၢၤ လၢဟဲၣ်က့ၣ်တၫ်အၢၣ်လီၤ(ဟိုင်ဂင်သဘောတူညီချက်)အဖီခိၣ် တၫ်မၤ၀ဲတၫ်ပတုာ်တၫ်ခးန့ၣ်လီၤ. တၫ်မၤတၫ်ပတုာ်တၫ်ခး၀ံၤအလီၫ်ခံ ဖဲ ကိကးဟီၣ်က၀ီၤ(ကိုးကန့်ဒေသ)ပူၤ တၫ်ခးပတုာ်၀ဲဘၣ်ဆၣ် မ့မ့ၫ် TNLAဒီး AA ပၢဆှၢရဲၣ်ကျဲၤဟီၣ်က၀ီၤတဖၣ်အပူၤ တၫ်ဒုးတဖၣ်အိၣ်ဒံး၀ဲအဖၢမုၫ်န့ၣ်လီၤ. ရခၢၣ်ကီၫ်စဲၣ်, မီၣ်တီ(မောင်တော)ဒီး ပိၣ်နါကၠိကီၫ်ဆၣ်(ပုဏ္ဏားကျွန်း)တဖၣ်အပူၤ တုၤလၢလါမးၡး(၂)သီအနံၤန့ၣ် တၫ်ဒုးတဖၣ်ကဲထီၣ်ဒံးလီၤအဂ့ၫ် ရခၢၣ်သုးမုၫ်ဒိၣ် AA ထုးထီၣ်ပာ်ဖျါဃာ်၀ဲန့ၣ်လီၤ.
photo:SPMNews
