လါမးရှး (၃)သီ, ၂၀၂၄နံၣ်
ကီၫ်ကရ့ၣ်နံၣ်ပူၤ စးထီၣ်လၢ ၂၀၂၁နံၣ်, လါဖ့ၤဘြူၤအါရံၤ(၁)သီ, သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီး တုၤလီၤလၢ ၂၀၂၄နံၣ်, လါယနူၤအါရံၤ(၃)သီအနံၤ, (၃)နံၣ်ဘျဲၣ်အတီၫ်ပူၤ ခီဖျိလၢသုးကီၣ်ကး မၤသံကွံာ်အီၤအဃိ ကမျၢၫ်လၢတၫ်ကမၣ်တအိၣ် ဘူးထီၣ်(၅၀၀)ဂၤသံ၀ဲအသိး သုးကီၣ်ကးခးလီၤတၫ်လၢကဘီယူၤဒီး ကျိဖးဒိၣ်တဖၣ်အဃိ ပှၤဃ့ၫ်သုးပှၤလီၫ်အိၣ်ကမှံဖိ(၁၅၀)ဂၤသံ၀ဲအဂ့ၫ် တၫ်လဲၤထီၣ်လဲၤထီကရ့ၣ်နံၣ်ကမျၢၫ်ဂံၫ်ဘါကရူၫ်(တိုးတက်သော ကရင်နီပြည်သူ့အင်အားစု ) PKPF ထုးထီၣ်ပာ်ဖျါဃာ်၀ဲဖဲ လါမးၡး(၁)သီအနံၤန့ၣ်လီၤ.
ဒ်န့ၣ်အသိး ကမျၢၫ်လၢသုးကီၣ်ကးဖီၣ်န့ၫ်ဆူၣ်အီၤ အိၣ်၀ဲ(၁၅၂)ဂၤ, တၫ်ဘူၣ်တၫ်ဘါတၫ်သူၣ်ထီၣ် ဟးဂီၤကွံာ်၀ဲ(၄၉)ဖျၢၣ်, ကမျၢၫ်အိၣ်ဟံၣ်ဘူးထီၣ်(၂၅၀၀)ဖျၢၣ်, တၫ်ဟ့ၣ်ကသံၣ်ဒၢးပာ်ဃုာ်တၫ်ဆါဟံၣ်ခဲလၢာ်(၁၄)ဖျၢၣ် ဒီး တၫ်သိၣ်လိကၠိ(၂၂)ဖျၢၣ်စ့ၫ်ကီးဟးဂီၤကွံာ်၀ဲန့ၣ်လီၤ.
ကီၫ်ကရ့ၣ်နံၣ်အပူၤ စးထီၣ်လၢ ၂၀၂၁နံၣ်, လါဖ့ၤဘြူၤအါရံၤ(၁)သီ, သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဒီး တုၤလီၤလၢ ၂၀၂၄နံၣ်, လါယနူၤအါရံၤ(၃)သီအနံၤ, (၃)ဘျဲၣ်အတီၫ်ပူၤ တၫ်ပၢၫ်ဆၢသုးပာ်ဖှိၣ်တပၤသံ၀ဲ ဘူးထီၣ်(၅၀၀)ဂၤအဂ့ၫ် PKPF ထုးထီၣ်ပာ်ဖျါဃာ်၀ဲန့ၣ်လီၤ.
ကရ့ၣ်နံၣ်တၫ်ပၢၫ်ဆၢသုးကရၢဖိ(ကရင်နီတော်လှန်ရေးတပ်ဖွဲ့ဝင်)တဖၣ်အံၤ ဖဲလၢ ၂၀၂၁နံၣ် (၄၁)ဂၤ, ၂၀၂၂နံၣ် (၁၇၀)ဂၤ, ၂၀၂၃နံၣ် (၂၂၈)ဂၤ ဒီး ၂၀၂၄နံၣ်န့ၣ် (၅၀)ဂၤ ခဲလၢာ်ပာ်ဖှိၣ် (၄၈၉)ဂၤသံ၀ဲန့ၣ်လီၤ.
တၫ်ပၢၫ်ဆၢသုးကရၢဖိလၢအသံတဖၣ်အံၤ မ့ၫ်တၫ်ပၢၫ်ဆၢတၫ်ကရၢကရိလၢ စးထီၣ်အိၣ်ထီၣ်လၢ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံတဖၣ် ပာ်ဃုာ်အသိး တၫ်ပၢၫ်ဆၢကရူၫ်ကရၢလၢ အိၣ်ပာ်စၢၤလၢအပူၤကွံာ်တဖၣ်အပူၤစ့ၫ်ကီးပာ်ဃုာ်၀ဲန့ၣ်လီၤ.
တၫ်ပၢၫ်ဆၢသုးကရၢဖိတဖၣ်အံၤ ခီဖျိလၢသုးကီၣ်ကး သူ၀ဲမ့ၣ်ပိၫ်လၢအတယၢၤအိၣ်ပီၣ်(၅၀၀)တဖၣ်၀ံၤ လဲၤဒုးတၫ်တဖၣ်, ခးကျိဖးဒိၣ်တဖၣ် တကးဘၣ် ဟီၣ်လာ်မ့ၣ်ပိၫ်တဖၣ်(မြေမြှုပ်မိုင်များ)အဃိ သံ၀ဲအဂ့ၫ်ပာ်ဖျါဃာ်၀ဲန့ၣ်လီၤ.
PKPF အတၫ်ပာ်ဖျါလၢ (၃)နံၣ်ဘျဲၣ်ကတီၫ် ကီၫ်ကရ့ၣ်နံၣ်ပူၤ တၫ်ဒုးကဲထီၫ်တ့ၫ်၀ဲ (၉၈၅)ဘျီအသိး သုးကီၣ်ကးတပၤ လဲၤခးလီၤတၫ်လၢကလံၤကျါ အိၣ်ထီၣ်၀ဲ(၁၃၀၀)ဘျီဃၣ်ဃၣ်အဂ့ၫ် တၫ်သ့ၣ်ညါဘၣ်လၢ တၫ်ပာ်ဖျါအဖီခိၣ်န့ၣ်လီၤ.
ဖဲလၢ ၂၀၂၃နံၣ်အတီၫ်ပူၤန့ၣ် တၫ်ဒုးကဲထီၣ်အါထီၣ်အဂ့ၫ် ပာ်ဖျါဃာ်၀ဲ၀ံၤ တၫ်ပၢၫ်ဆၢသုးတဖၣ် ခးလီၤစ့ၫ်ကီးသုးကီၣ်ကးအကဘီယူၤ(၂)ခိၣ်ဒီး သိၣ်လ့ထး(သံချပ်ကာကား)ပာ်ဃုာ် တၫ်ဒုးသူသိလ့ၣ်(စစ်သုံးကား)(၆၈)ခိၣ်စ့ၫ်ကီး တၫ်မၤဟးဂီၤကွံာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်ဒုးတဖၣ်အပူၤ သုးကီၣ်ကးအပှၤသုးဖိ သံ၀ဲ(၃,၁၃၃)ဂၤအဂ့ၫ် တၫ်သ့ၣ်ညါဘၣ်၀ဲဒီး မ့မ့ၫ်တၫ်ဒုးမဲာ်ဖံးခိၣ်(မြေပြင်)အပူၤတခီ တၫ်သံတၫ်ပှၫ်အနီၫ်ဂံၫ်နီၫ်ဒွး ကအါန့ၫ်ဒံးအလီၫ်န့ၣ်လီၤ.
ကတီၫ်ခဲအံၤ ကီၫ်ကရ့ၣ်နံၣ်ပူၤ မဲၫ်စဲး(မယ်စဲ့), ၡါတီ(ရှားတော), မိၤခံ(မော်ချီး)ဒီး ယွၣ်သ့း(ရွာသစ်)ဟီၣ်က၀ီၤတဖၣ် တၫ်ပၢၫ်ဆၢသုးတပၤ ပၢဆှၢဃာ်၀ဲလၢာ်လၢာ်ဆ့ဆ့၀ံၤ မ့မ့ၫ် ဒံမီဆိၣ်(ဒီးမောဆို), ဖရူၣ်ဆိၣ်(ဖရူဆို) ဒီး လွဲၣ်ကီၫ်(လွိုင်ကော်)တခီ တၫ်ပၢဆှၢရဲၣ်ကျဲၤ၀ဲတန့ၫ်ခဲလၢာ်ဒံးဘၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်ဂီၤ-ကီၫ်ကရ့ၣ်နံၣ်(ကရင်နီပြည်)ပူၤ (၃)နံၣ်ဘျဲၣ်ကတီၫ် သုးကီၣ်ကး(စစ်ကောင်စီ)မၤကမၣ်ပှၤဟီၣ်ခိၣ်ခွဲးယာ်တဖၣ်
photo:KNDF
