လါမးရှး (၁)သီ, ၂၀၂၄နံၣ်
ပှၤလၢတအဲၣ်ဒိးနုာ်လီၤလၢသုးပူၤတဖၣ် တၫ်နုာ်လီၤလၢပၢၤကီၫ်သုးပူၤန့ၫ်၀ဲဒီး တၫ်ကဟ့ၣ်လါလဲဒီး တၫ်ဆီၣ်ထွဲမၤစၢၤတဖၣ်အဂ့ၫ် တၫ်တဲဆီၣ်တခူ၀ဲ၀ံၤ ပၢၤကီၫ်သုးသီတဖၣ်ကန့ၫ်အဂီၫ် ထၢန့ၫ်၀ဲအဂ့ၫ် တၫ်သ့ၣ်ညါဘၣ်လၢ အ့ၣ်ယၣ်၀တံၣ်ကီၫ်ခီပူၤ ကမျၢၫ်တဖၣ်အအိၣ်န့ၣ်လီၤ.
“ပှၤပၢဆှၢဟီၣ်က၀ီၤ(နယ်ထိန်း)တဖၣ် တဲ၀ဲပှၤသးစၫ်တဖၣ်လၢ သုမ့ၫ်တအဲၣ်ဒိးကဲသုးဘၣ်န့ၣ် နုာ်လီၤလၢပၢၤကီၫ်သုးပူၤ လါလဲစ့ၫ်ကီး(၂)ကလီၤဘျဲၣ်ဒီး တၫ်ကဟ့ၣ်တၫ်အိၣ်ဆိးလီၫ်လီၤ. တၫ်ဒုးစ့ၫ်ကီး သုတဒုးဘၣ်တၫ်ဘၣ်အဂ့ၫ် တဲ၀ဲလီၤ. သုမ့ၫ်ဖျိ (၈)တီၤန့ၣ်န့ၫ်လံ အဂုၤအဂၤတလိၣ်ဘၣ်” အဂ့ၫ် ၀ါခဲၣ်မးကီၫ်ဆၣ် ပိာ်ခွါလၢသးနံၣ်အိၣ်(၃၀)တဂၤ စံး၀ဲန့ၣ်လီၤ.
ပၢၤကီၫ်သုးတဖၣ်တခီ ဖဲလၢသုးကီၣ်ကးပာ်ဂၢၫ်ပာ်ကျၢၫ် ကမျၢၫ်တၫ်ဘၣ်ကဲသုးတၫ်ဘျၢကတီၫ် သူ၀ဲတၫ်ဘျၢ၀ံၤ ဒ်သိးကန့ၫ်ဘၣ် ပၢၤကီၫ်သုးသီအဂီၫ် ပှၤပၢဆှၢဟီၣ်က၀ီၤတဖၣ် ဂုၫ်ကျဲးစၢး၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
“သုးကီၣ်ကး အတၫ်ဘျၢလၢကမျၢၫ်တၫ်ဘၣ်ကဲသုးတၫ်ဘျၢအဃိ ပှၤသးစၫ်တဖၣ် ဘၣ်ယိၣ်လၢတၫ်ကနုာ်လီၤဘၣ်လၢ သုးပူၤန့ၣ်လီၤ. ပှၤသးစၫ်တဖၣ် ဘၣ်ယိၣ်တၫ်ဒ်အံၤအဆၢတကီၫ် ပၢၤကီၫ်တခီ သုမ့ၫ်နုာ်လီၤလၢ သုးပူၤန့ၣ်သုကဒုးဘၣ်တၫ်ဒုး, လါလဲစ့ၫ်ကီးစှၤအသိး သုသံသ့လီၤ. သုမ့ၫ်နုာ်လီၤလၢ ပၢၤကီၫ်သုးပူၤတဘျီဃီန့ၣ် သုတဘၣ်ကဲသုးလၢၤဘၣ်. တၫ်ဆၢကတီၫ်မ့ၫ်ဘၣ်န့ၣ် သုဟးထီၣ်န့ၫ်လီၤအဂ့ၫ်တဲ၀ဲအဃိ ပှၤသးစၫ်အါအါဂီၫ်ဂီၫ် နုာ်လီၤလၢ ပၢၤကီၫ်သုးပူၤ” အဂ့ၫ် အ့ၣ်ယၣ်၀တံၣ်ကီၫ်ခီ ပၢၤကီၫ်သုးဖိလီၫ်လံၤလၢ တအဲၣ်ဒိးပာ်ဖျါအမံၤတဂၤတဲ ၀ဲန့ၣ်လီၤ.
ပၢၤကီၫ်သုးကရၢအပူၤ ပှၤပၢဆှၢဟီၣ်က၀ီၤတဂၤတခီ တလါန့ၣ် တၫ်ကဘၣ်ကိးပၢၤကီၫ်သုးဖိသီတဂၤထဲအန့ၫ်၀ံၤ တၫ်ကိးပၢၤကီၫ်သုးဖိသီမ့ၫ်န့ၫ်န့ၣ် တၫ်မၤထီထီၣ်လီၫ်လၤအသိး တၫ်ခွဲးတၫ်ယၤအဂုၤအဂၤတဖၣ်စ့ၫ်ကီးန့ၫ်၀ဲအဂ့ၫ် တၫ်သ့ၣ်ညါဘၣ်လၢ ပှၤလၢအဘူးဒီးပၢၤကီၫ်သုးကရၢအအိၣ်န့ၣ်လီၤ.
ref:ayeyarwaddytimes
photo:reuters
