လါဖ့ၤဘြူၤအါရံၤ ၂၉သီႇ ၂၀၂၄နံၣ်
မကွ့ကီၫ်ခီ(မကွေးတိုင်း), မ့ဘူကီၫ်ရ့ၣ်(မင်းဘူးခရိုင်), စလ့ကီၫ်ဆၣ်(စလင်းမြို့နယ်), ကၠူၣ်၀ိကၠံ(ကြူဝန်းကြီး)သ၀ီကပၤ ဖဲတနံၤအံၤ လါဖ့ၤဘြူၤအါရံၤ(၂၉)သီအနံၤ မုၫ်ဆါခီ (၁၂)နၣ်ရံၣ် (၄၅)မံးနံးအဆၢတကီၫ် သုးကီၣ်ကး အကဘီယူၤဒုးသုး(၁)ခိၣ် လီၤတဲာ်ဟးဂီၤကွံာ်၀ဲအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.
ကဘီယူၤဒုးသုးအံၤ မ့ၫ်တရူးထံကီၫ်ထုးထီၣ်(တရုတ်နိုင်ငံထုတ်) MIG – 29ကလုာ်၀ံၤ နီၣ်လိ၀ဲအဆၢကတီၫ် စဲးဖီကဟၣ်ဟးဂီၤဒီး လီၤတဲာ်၀ဲအဂ့ၫ်စံး၀ဲန့ၣ်လီၤ.
ပှၤနီၣ်ကဘီယူၤဖိ(၂)ဂၤတခီ စံၣ်တခွ့ထီၣ်(ခုန်ထွက်လွတ်မြောက်)၀ဲဒၣ်လၢ ကလံၤသဒၢမုၫ်၀ံၤ သုးကီၣ်ကး ဟဲကိး၀ဲဒၣ် ကဘီယူၤအဂ့ၫ် မ့ဘူကီၫ်ရ့ၣ် ပကဖတၫ်ကစီၣ် ပှၤဘၣ်မူဘၣ်ဒါ ကိၣ်အညၣ်သါ (ကိုအညာသား) တဲ၀ဲန့ၣ်လီၤ.
“ကဘီယူၤအဖီခိၣ် ပှၤ(၂)ဂၤန့ၣ် စံၣ်တခွ့ပူၤဖျဲးအသး(ခုန်ထွက်လွတ်မြောက်)လၢ ကလံၤသဒၢမုၫ်(လေထီး)လီၤ. ပှၤလၢစံၣ်တခွ့တဖၣ် ဖဲ(၁)နၣ်ရံၣ်ဃၣ်ဃၣ်အဆၢကတီၫ် ဟဲကိး၀ဲဒၣ်လၢ Mi 17လီၤ“
ဖဲလၢဟဲကိး၀ဲ ပှၤနီၣ်ကဘီယူၤဖိ(၂)ဂၤအဆၢကတီၫ် သုးကီၣ်ကးအပှၤသုးဖိတဖၣ်ဒီး ပၢၤကီၫ်သုးတဖၣ် တၫ်ပာ်လီၤတၫ်ဘံၣ်တၫ်ဘၢ ဖဲကဘီယူၤလီၤတဲာ်တၫ်လီၫ်အကပၤ၀ံၤ မ့မ့ၫ်ကတီၫ်ခဲအံၤတခီ တၫ်က့ၤဟးထီၣ်လၢ ဖဲတၫ်ကဲထီၣ်သးတၫ်လီၫ်လံအဂ့ၫ် တဲ၀ဲန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ စလ့ကီၫ်ဆၣ်ပူၤ သုးကီၣ်ကး အကဘီယူၤ လီၤတဲာ်၀ဲအံၤ မ့ၫ်၀ဲအဆိကတၢၫ်တဘျီလီၤအဂ့ၫ် လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
ref:rfa
