လါဖ့ၤဘြူၤအါရံၤ ၂၈သီႇ ၂၀၂၄နံၣ်
ဘျံး-ဒ၀ဲၫ်ကီၫ်ရ့ၣ်, မုၫ်ထီၣ်ဟီၣ်က၀ီၤ တၫ်ဒုးလၢကဲထီၣ်သးတဖၣ်အပူၤ ကီၫ်သူလ့ၤသုးမုၫ်ဒိၣ်(KTLA) အပှၤသုးဖိတနီၤ ပာ်ဖှိၣ်လိာ်သးဒီး KNU၀ံၤ တၫ်မၤ၀ဲဒုးယၤရဲၣ်ကျဲၤတဖၣ်အဂ့ၫ် တၫ်သ့ၣ်ညါဘၣ်လၢ ခံခီခံကပၤသုးကရၢတဖၣ် အတၫ်တဲအဖီခိၣ်န့ၣ်လီၤ.
လါယနူၤအါရံၤ (၂၄)သီအနံၤ, ခ့ၣ်အဲၣ်ယူၣ်-သုးက့နီၫ်ဂံၫ်(၄), KNLA သုးရ့ၣ်(၁၂), သုးက့နီၫ်ဂံၫ်(၆), KNLA သုးရ့ၣ်(၂၇) ဒီး PDF သုးပာ်ဖှိၣ်တဖၣ်အံၤ ထီၣ်ဒုးမၤန့ၫ်၀ဲ သုးကီၣ်ကးအသုးကလၢၤ လၢအိၣ်ဆီလီၤအသးဖဲ ဒ၀ဲၫ်ကီၫ်ဆၣ်, မုၫ်ထီၣ်ဟီၣ်က၀ီၤ, ဘါခၠီဟီၣ်က၀ီၤ(ဘန်းချောင်းဒေသ), ကၠီးထူးသုးကလၢၤ(ကျောက်ထုစခန်း)န့ၣ်လီၤ.
တၫ်ထီၣ်ဒုးမၤန့ၫ်သုးကလၢၤ၀ံၤအလီၫ်ခံ KTLAအပှၤသုးဖိလၢ ဟဲပာ်ဖှိၣ်ထီၣ်သးဒီး KNLAအိၣ်၀ဲ (၂)ဖုအဂ့ၫ် သုးရ့ၣ်(၂၇)ဒီး သုးရ့ၣ်(၁၂) သုးရ့ၣ်ခိၣ် စီၤမူဂ့ၤတဲ၀ဲန့ၣ်လီၤ.
“ပအိၣ်တခီ ဟဲက့ၤတုၤတနီၤလံ. ဖဲတၫ်ဖီလာ်တပၤန့ၣ် ဟဲပာ်ဖှိၣ်ထီၣ်သးဒီး ပှၤအိၣ်(၁)ဖု(၂)ဖုလံ. မ့မ့ၫ်ယၤတခီ ယကွဲမုာ်ဒီး ယတူၫ်လိာ်အီၤလီၤ. သနာ်က့အ၀ဲသ့ၣ် ဟဲပာ်ဖှိၣ်ထီၣ်သးတန့ၫ်ဘၣ်. အ၀ဲသ့ၣ်တၫ်ကီတၫ်ခဲကအိၣ်ကလုာ်ကလုာ်ဧါ“ အ၀ဲစံး၀ဲန့ၣ်လီၤ.
KTLA အပှၤသုးဖိလၢ ဟဲပာ်ဖှိၣ်ထီၣ်သးဒီး ခ့ၣ်အဲၣ်ယူၣ်, သုးက့နီၫ်ဂံၫ်(၄), သုးရ့ၣ်(၁၀), သုးရ့ၣ်(၁၂) အိၣ်၀ဲ(၁)ဖု(၂)ဖု၀ံၤ သုးအဂံၫ်အဘါ ကအိၣ်၀ဲ(၅၀)ဂၤဃၣ်ဃၣ်အဂ့ၫ် ခ့ၣ်အဲၣ်ယူၣ်-သုးက့နီၫ်ဂံၫ်(၄), ဘျံး-ဒ၀ဲၫ်ကီၫ်ရ့ၣ်နဲၣ်ရွဲၣ် ပဒိၣ်စီၤအဲၣ်နၤ တဲ၀ဲန့ၣ်လီၤ.
“အ၀ဲသ့ၣ်အကျါ သ၀ီဖိဒၢးအိၣ်လီၤ, သုးဖိလီၫ်လံၤတဖၣ် စ့ၫ်ကီးပာ်ဃုာ်၀ဲလီၤ“ အဂ့ၫ် ပဒိၣ်စီၤအဲၣ်နၤတဲ၀ဲန့ၣ်လီၤ. ကတီၫ်ခဲအံၤတခီ ထဲဒၣ် ပာ်ဖှိၣ်မၤသကိးတၫ်ဒီးသုးဂ့ၫ်ဂီၤတပၤလီၤအဂ့ၫ် ခံခီခံကပၤသုးကရၢတဖၣ် အတၫ်တဲအဖီခိၣ် တၫ်သ့ၣ်ညါဘၣ်န့ၣ်လီၤ.
“ပ၀ဲဒီး K4 ပပာ်ထီၣ်အီၤလံ. သုးမဲာ်ဖံးခိၣ်(စစ်မြေပြင်) ပှၤသးပှၫ်ကဒဲကဒဲ တဲလိာ်သးဒီး ပာ်ဖှိၣ်ထီၣ်၀ဲလီၤ. တၫ်နုာ်လၢ KNLAတခီဒုတအိၣ်ဒံးဘၣ်. တၫ်ပာ်ဖှိၣ်ထဲဒၣ်လၢ သုးဂ့ၫ်၀ီတပၤလီၤ“အဂ့ၫ် KTLAသုးဒ့ခိၣ်ပှၤဘၣ်မူဘၣ်ဒါတဂၤ တဲ၀ဲန့ၣ်လီၤ.
ထဲဒၣ် KTLAအစုတီၤဖီလာ် ကရၢဆံးဖိတဖၣ် ဟဲက့ၤပာ်ဖှိၣ်ထီၣ်သးဒီး KNU၀ံၤ သုးခိၣ်အဲၣ်ခွံပာ်ဃုာ် ခိၣ်နၫ်အဂုၤအဂၤတခီ တၫ်ပာ်ဖှိၣ်မၤသကိးတအိၣ်ဒံးဘၣ်အဂ့ၫ် ခံခီခံကပၤသုးကရၢတဖၣ် ပာ်ဂၢၫ်ပာ်ကျၢၫ်တဲ၀ဲန့ၣ်လီၤ.
ဖဲအပူၤကွံာ် လါဖ့ၤဘြူၤအါရံၤ(၁၇)သီလံၤလံၤ တၫ်ဒုးလၢကဲထီၣ်သးဖဲ မုၫ်ထီၣ်ဟီၣ်က၀ီၤတဖၣ်အပူၤ KNLA၊ PDFသုးပာ်ဖှိၣ်တဖၣ်ဒီး KTLAအပှၤသုးဖိတနီၤစ့ၫ်ကီးပာ်ဃုာ် ဒုး၀ဲန့ၣ်လီၤ. ဘျံး-ဒ၀ဲၫ်ကီၫ်ရ့ၣ်, မုၫ်ထီၣ်ဟီၣ်က၀ီၤ(အရှေ့တောဒေသ)ပူၤ သုးကီၣ်ကးတပၤ တၫ်ဘၣ်ဒိဘၣ်ထံးဒီး တၫ်သံတၫ်ပှၫ်အိၣ်အါအသိး တၫ်ပာ်တ့ၫ်သုးကလၢၤတဖၣ်စ့ၫ်ကီးအိၣ်၀ဲ၀ံၤ ဒ်သိးသုးကီၣ်ကးတပၤ က့ၤပၢဆှၢက့ၤဟီၣ်က၀ီၤတဖၣ်ကန့ၫ်အဂီၫ် ဟဲဒုး၀ဲစ့ၫ်ကီးဒီးကလံၤကျါတၫ်ဒုးတဖၣ်န့ၣ်လီၤ.
ref:daweiwatch
