လါဖ့ၤဘြူၤအါရံၤ ၂၈သီႇ ၂၀၂၄နံၣ်
သုးကီၣ်ကးလဲၤတ့ၫ်လီၤမ့ၣ်ပိၫ်လၢကလံၤကျါ ဖဲပှၤဃ့ၫ်သုးပှၤလီၫ်အိၣ်ကမှံအိၣ်ကဒုလီၫ်တၫ်သူၣ်ထီၣ်ဒီး သ၀ီတဖၣ်အဃိ ပှၤဃ့ၫ်သုးပှၤလီၫ်အိၣ်ကမှံဖိသၣ်ပာ်ဃုာ် (၂၅)ဂၤဘၣ်ဒိ၀ဲအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.
ဖဲ လါဖ့ၤဘြူၤအါရံၤ (၂၇)သီအနံၤ, ဟါ(၁)နၣ်ရံၣ်ဃၣ်ဃၣ်အဆၢကတီၫ် ရခၢၣ်ကီၫ်စဲၣ်, မ့ပၠါကီၫ်ဆၣ်(မင်းပြားမြို့နယ်), သ့ၣ်ကၣ်သ၀ီ(သေကန်ရွာ) ပှၤဃ့ၫ်သုးပှၤလီၫ်အိၣ်ကမှံအိၣ်ကဒုအလီၫ် တၫ်သိၣ်လိကၠိဒီး သ၀ီပူၤ သုးကီၣ်ကးလဲၤတ့ၫ်လီၤမ့ၣ်ပိၣ်လၢ ကလံၤကျါန့ၣ်လီၤ.
တၫ်လဲၤတ့ၫ်လီၤမ့ၣ်ပိၫ်အဃိ ပှၤဃ့ၫ်သုးပှၤလီၫ်အိၣ်ကမှံဖိဒီး ဒူသ၀ီဖိတစှၤန့ၣ်(၂၅)ဂၤဘၣ်ဒိ၀ဲ၀ံၤ အဂၤ(၁၅)ဂၤတခီ ဘၣ်ဒိ၀ဲနးနးကျံးကျံးဒီး လိၣ်လၢတၫ်ကဘၣ်ကူစါယါဘျါဂ့ၫ်ဂီၤအူအဂ့ၫ် လီၫ်က၀ီၤကမျၢၫ်တဖၣ် တဲ၀ဲဆူ Western News န့ၣ်လီၤ.
“တၫ်ဒုးကဲထီၣ်သးတအိၣ်ဘၣ်. ဟဲတ့ၫ်လီၤမ့ၣ်ပိၫ်(ဗုံး)လီၤ. အဆိကတၢၫ်ဟဲတ့ၫ်လီၤ မ့ၣ်ပိၫ် (၂)ဖျၢၣ်လီၤ. ခးလီၤလၢသ့ၣ်ကၣ်သ၀ီ(သေကန်ရွာ)ပူၤလီၤ. ပှၤဃ့ၫ်သုးပှၤလီၫ်အိၣ်ကမှံတဖၣ် အိၣ်ကဒု၀ဲဒၣ်ဖဲ တၫ်သိၣ်လိကၠိတဖၣ်အပူၤလီၤ. ဖိသၣ်ပာ်ဃုာ်(၂၅)ဂၤဘျဲၣ်လီၤ. တနီၤတခီ ဘၣ်ဒိ၀ဲနးနး“ အဂ့ၫ်တဲ၀ဲန့ၣ်လီၤ.
တကးဘၣ် တၫ်ဟဲခးလီၤတၫ်၀ံၤ တၫ်ဟဲခးလီၤတၫ်ကဒီးအသီတဘျီ၀ံၤအလီၫ်ခံ တၫ်သိၣ်လိကၠိဒီး ကမျၢၣ်အိၣ်ဟံၣ် (၁၀)ဖျၢၣ် ဟးဂီၤကွံာ်ဒီးဆၣ်ဖိကီၫ်ဖိပာ်ဃုာ် အါအါဂီၫ်ဂီၫ် ဘၣ်ဒိဘၣ်ထံး၀ဲအဂ့ၫ် သ့ၣ်ကၣ်သ၀ီ(သေကန်ရွာ)ဖိတဖၣ်တဲ၀ဲန့ၣ်လီၤ.
“ပှၤဃ့ၫ်သုးပှၤလီၫ်အိၣ်ကမှံဖိတဖၣ်အံၤ အိၣ်၀ဲဒၣ်ဖဲတၫ်လီၫ်သကုၤဆးဒးလီၤ. လီၤဆီဒၣ်တၫ် တၫ်ဒုးကဲထီၣ်သးဖဲ မ့ပၠါ၀့ၫ်(မင်းပြားမြို့)၀ံၤအလီၫ်ခံ ဟဲတုၤအိၣ်လၢပသ၀ီန့ၣ်လီၤ. အိၣ်၀ဲဒၣ်ဖဲ တၫ်သိၣ်ကၠိဒီး သီခါဖၠၣ်တဖၣ်လီၤ. ခဲအံၤတခီ တၫ်ဒုးကဲထီၣ်သးတအိၣ်ဘၣ်ဒီး သုးကီၣ်ကးတခီ ဟဲတ့ၫ်လီၤမ့ၣ်ပိၫ်(ဗုံး)လီၤ. သ၀ီ, တၫ်သိၣ်လိကၠိ, ဟံၣ်ဃီတၫ်သူၣ်ထီၣ်အါအါဂီၫ်ဂီၫ် ဟးဂီၤကွံာ်၀ဲန့ၣ်လီၤ. ဂ့ၫ်ဂီၤအူတၫ်ကူစါယါဘျါအဂီၫ် တၫ်ရဲၣ်မၤတဖၣ်စ့ၫ်ကီးအိၣ်၀ဲအဂ့ၫ်“ တဲ၀ဲန့ၣ်လီၤ.
သ့ၣ်ကၣ်သ၀ီ(သေကန်ရွာ)အံၤ မ့ၫ်၀ဲမ့ပၠါကီၫ်ဆၣ်(မင်းပြားမြို့နယ်)ပူၤသ၀ီတဖျၢၣ်၀ံၤ အိၣ်သူၣ်လီၤအသးဖဲ ၀့ၫ်တကူၣ်-စ့းတွ့ၣ်သိလ့ၣ်ကျဲမုၫ်(ရန်ကုန်-စစ်တွေကားလမ်းမ) ဒီး အိၣ်ဘူးလိာ်သးဒီး ယၣ်မီၣ်တိၤ(ရာမောင်တံတား)န့ၣ်လီၤ. သ့ၣ်ကၣ်သ၀ီပူၤ ပှၤနီၫ်ဂံၫ်အိၣ်၀ဲ(၄၀၀)ဘျဲၣ်, ဟံၣ်ခိၣ်အိၣ်၀ဲ(၁၀၀)ဘျဲၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
သုးကီၣ်ကးအသုး အိၣ်ဆီလီၤအသး မ့ပၠါ၀့ၫ်(မင်းပြားမြို့)ပူၤ ၃၇၉, ၃၈၀ ဒီး ၅၄၁တဖၣ်အိၣ်၀ဲ၀ံၤ ရခၢၣ်သုးမုၫ်ဒိၣ်(ရက္ခိုင့်တပ်တော်) AA လဲၤထီၣ်ဒုး၀ဲသုးရ့ၣ်တဖၣ်၀ံၤအလီၫ်ခံ ထီၣ်ဒုးမၤန့ၫ်၀ဲ ကီၫ်ခီလီၫ်ခၢၣ်သး(၉) (တိုင်းဗဟို-၉) သုးတၫ်သိၣ်လိကၠိန့ၣ်လီၤ.
ref:westernnews
