လါဖ့ၤဘြူၤအါရံၤ ၂၈သီႇ ၂၀၂၄နံၣ်
တလၢၤကီၫ်စဲၣ်(မွန်ပြည်နယ်), သထူၣ်ကီၫ်ဆၣ်(သထုံမြို့နယ်), မိကီသ၀ီ(မိုးကောင်းကျေးရွာ), ၀့ၫ်တကူၣ်-မီၣ်လမၠဲၣ်ကျဲမုၫ်ဖီခိၣ် မိကီတိၤ(မိုးကောင်းတံတား) ဘၣ်တၫ်မၤပိၫ်ဖးမၤဟးဂီၤကွံာ်အဃိ တိၤဒီတဘိဟးဂီၤကွံာ်၀ဲအဂ့ၫ် Than Lwin Times တၫ်ကစီၣ်သန့ ပာ်ဖျါ၀ဲလီၤ.
မိကီတိၤအံၤ ဖဲတနံၤအံၤ လါဖ့ၤဘြူၤအါရံၤ(၂၈)သီအနံၤ ဂီၤ(၃)နၣ်ရံၣ်ဃၣ်ဃၣ်အကတီၫ် ဘၣ်တၫ်မၤပိၫ်ဖးဟးဂီၤကွံာ်၀ဲန့ၣ်လီၤ.
တိၤဒီတဘိလီၤၦီၫ်ကွံာ်၀ဲလီၤ. သိလ့ၣ်လဲၤတသ့နီတခိၣ်လၢၤဘၣ်. ဟံၣ်သိလ့ၣ်ဒိး(အိမ်စီးကား)တဖၣ် ဘၣ်လဲၤတရံးလၢသ၀ီကျဲတကပၤန့ၣ်လီၤအဂ့ၫ် လီၫ်က၀ီၤဖိတဂၤတဲ၀ဲန့ၣ်လီၤ.
ဘၣ်ထွဲ မိကီတိၤ ဘၣ်တၫ်မၤပိၫ်ဖးဟးဂီၤကွံာ်အီၤတၫ်ဂ့ၫ်န့ၣ် သုးကီၣ်ကးဒီး တၫ်ပၢၫ်ဆၢသုး ခံကပၤလၢာ် ပာ်ဖျါတၫ်တအိၣ်နီတမံၤဒံးဘၣ်.
မိကီတိၤ လၢဘၣ်တၫ်မၤပိၫ်ဖးဟးဂီၤကွံာ်အံၤ မ့ၫ်တိၤတဘိလၢ အထီအိၣ်(၃၇)ပျၫ်, အလဲၫ်အိၣ်(၄၈)ပျၫ်၀ံၤ မ့ၫ်တၫ်ကူၣ်လဲၤမၤကၤ(ကုန်သွယ်)ကျဲအရ့ဒိၣ်တဘိလၢ တလၢၤကီၫ်စဲၣ်(မွန်ပြည်နယ်), ကညီကီၫ်စဲၣ်(ကရင်ပြည်နယ်), ပကိ(ပဲခူး), ၀့ၫ်တကူၣ်(ရန်ကုန်) ဒီးတနီသရံၣ်ကီၫ်ခီ(တနင်္သာရီတိုင်း)တဖၣ်န့ၣ်လီၤ.
