ရခၢၣ်ကီၫ်စဲၣ်ဟီၣ်က၀ီၤအပူၤ တၫ်ဒုးလၢကဲထီၣ်တဖၣ် လၢကတီၫ်အံၤ ဆူၣ်ထီၣ်၀ဲလီၤ. ရခၢၣ်သုးမုၫ်ဒိၣ် အတၫ်ထီၣ်သုးတဖၣ်အပူၤ သုးကီၣ်ကးတကပၤ လၢခိ, ကလံၤ, ထံသုးတဖၣ် ပာ်ဖှိၣ်တြီဆၢ၀ဲဘၣ်ဆၣ် သုးကီၣ်ကး အတၫ်အိၣ်ခိးလီၤတြီဆၢခဲလၢာ် ဘၣ်တၫ်ဒုးဖျိးကွံာ်၀ံၤ မ့ပၠါ(မင်းပြား), ကၠီးတီၣ်(ကျောက်တော်), မၠီးအူ၀့ၫ်(မြောက်ဦးမြို့)အပူၤ သုးကီၣ်ကး အသုးတြိၤ၀ဲၤလီၫ်ခိၣ်သ့ၣ်(တပ်မဌာနချုပ်), ဒုးယၤ၀ဲၤလီၫ်ခိၣ်သ့ၣ်(စကခဌာနချုပ်), သုးရ့ၣ်၀ဲၤလီၫ်ခိၣ်သ့ၣ်(တပ်ရင်းဌာနချုပ်), ပၢၤကီၫ်သုးရ့ၣ်သုးကလၢၤတဖၣ်(ရဲတပ်ရင်းစခန်းများ), ပၢၤကီၫ်သုးကလၢၤ(ရဲစခန်း) တအိၣ်တ့ၫ်နီတဖျၢၣ် ထီၣ်ဒုးမၤန့ၫ်ဃာ်၀ဲ ခဲလၢာ်လံန့ၣ်လီၤ. သုးကီၣ်ကးတကပၤ အသုးကလၢၤတဖၣ် ဘၣ်လီၤကွံာ်၀ံၤအလီၫ်ခံ အတၫ်ဂုၫ်ကျဲးစၢးလၢ ကထီၣ်ဒုးမၤန့ၫ်ကဒါက့ၤ၀ဲဘၣ်ဆၣ် မၤ၀ဲတန့ၫ်လၢၤဘၣ်.
၀့ၫ်(၃)ဖျၢၣ်အံၤအပူၤ သုးကီၣ်ကး အသုးကလၢၤ တၫ်ထီၣ်ဒုးမၤန့ၫ်အီၤ ကန့ၫ်ခဲလၢာ်အဂီၫ် တၫ်ဆၢကတီၫ်ယံာ်၀ဲ (၁)လါဘျဲၣ်န့ၣ်လီၤ. တချူးလၢတၫ်ထီၣ်ဒုးဒံးဘၣ်အကတီၫ် သုးကီၣ်ကး အသုးကလၢၤတဖၣ် လၢအနံၣ်အလါယံာ်တဖၣ်အပူၤ ရခၢၣ်သုးမုၫ်ဒိၣ်တကပၤ က၀ီၤကးတံာ်ဃာ်၀ဲန့ၣ်လီၤ. သုးကီၣ်ကး အသုးကလၢၤတနီၤ ဘၣ်တၫ်ထီၣ်ဒုးမၤန့ၫ်အီၤလၢ စှၤသီအတီၫ်ပူၤဘၣ်ဆၣ် တနီၤဒု ယံာ်လၢအနွံတဖၣ်လီၤ.
လၢကတီၫ်အံၤ ရခၢၣ်ဟီၣ်က၀ီၤ တၫ်ဒုးတဘျီအံၤအပူၤ သုးကီၣ်ကးတကပၤ ဒုးဆၢ၀ဲလၢခိကျဲ, ကလံၤကျါ, ထံကျါဘၣ်ဆၣ် သူ၀ဲအါတက့ၫ် ကလံၤကျါဒီး ထံကျါဒုးယၤတကပၤန့ၫ်လီၤ.
ဖဲလါဖ့ၤဘြူၤအါရံၣ် (၇သီ ဒီး ၈သီ) ထံကျါဒုးယၤအပူၤ ရခၢၣ်သုးမုၫ်ဒိၣ်တကပၤ ဒုး၀ဲလၢတၫ်တိာ်ကူၣ်ကျဲၤ (ဗျူဟာမြောက်) တုၤလီၤတီၤလီၤအဃိ သုးကီၣ်ကး အသုးကဘီ (၃)ခိၣ်လၢာ် ဘၣ်ဟးဂီၤကွံာ်၀ဲလီၤ. ဖဲကဘီ ဘူးကလီၤဘျၢအကတီၫ် တၫ်မၢပာ်လီၤတၫ်စုက၀ဲၤ, ယူာ်ထီၣ်နီၫ်တယၫ်၀ါဒီး တၫ်တဲဟ့ၣ်ပလီၫ်အီၤ (၃)၀ီဘၣ်ဆၣ် တဒိကနၣ်၀ဲဘၣ်အမဲာ်ညါ ဂုၫ်ကျဲးစၢး မၤဆၢက့ၤတၫ်ခီဖျိ ကလံၤကျါ (လေကြောင်း)တကပၤလီၤ.
သုးကီၣ်ကး အသုးကဘီတဖၣ်အံၤ ဖဲဟဲထီၣ်လၢ ထံကျဲဒီတဘိန့ၣ် ခးစိဃီၤ၀ဲ ထံကျိအကပၤ ဒူသ၀ီတဖၣ်လၢ ကျိဖိ, ကျိဖးဒိၣ်တဖၣ်, ခးလီၤ၀ဲလၢ တၫ်ပညိၣ်အိၣ်အပူၤ လၢနံၤလၢနၤကိးဆၢကတီၫ်ဒဲး လၢနံၣ်လါယံာ်တဖၣ် (နှစ်ရှည်လများ) အပူၤအိၣ်၀ဲဒီး တၫ်မၤနီၣ်(မှတ်တမ်း)တဖၣ် အိၣ်၀ဲအဂ့ၫ် ရခၢၣ်သုးမုၫ်ဒိၣ်တကပၤ တဲ၀ဲလီၤ. အတၫ်ခးလီၤတၫ်တဖၣ်အပူၤ ထံဖိကီၫ်ဖိကမျၢၫ် ဘၣ်သံဘၣ်ၦၫ် တၫ်ဘၣ်ဒိဘၣ်ထံးအိၣ်၀ဲ ကိးမုၫ်နံၤဒဲးအဃိ ဘၣ်တၫ်မၤဆၢကဒါက့ၤအီၤဒ်သိးအံၤအဂ့ၫ် ပာ်ဖျါ၀ဲလီၤ.
သုးကီၣ်ကးတကပၤ လၢကတီၫ်အံၤ ရခၢၣ်ဟီၣ်က၀ီၤ တၫ်ဒုးတဖၣ်အပူၤ သူ၀ဲထံသုးတကပၤဘၣ်ဆၣ် ရခၢၣ်သုးမုၫ်ဒိၣ်တကပၤ ခီၣ်ဆၢဒုး၀ဲန့ၫ်ဂ့ၤဂ့ၤလီၤ. သုးကီၣ်ကး အသုးကလၢၤလၢအိၣ်တ့ၫ်တဖၣ် လၢချူးဆၢချူးကတီၫ် ကပာ်လီၤတၫ်စုက၀ဲၤအဂီၫ် တၫ်ဟ့ၣ်ပလီၫ် ဒုးသ့ၣ်ညါကဒီးအီၤအဂ့ၫ် ရခၢၣ်သုးမုၫ်ဒိၣ်တကပၤ ဘိးဘၣ်ပာ်ဖျါ၀ဲလီၤ.
photo:AA
