ဖဲလါဖ့ၤဘြူၤအါရံၤ(၁၀)သီအနံၤ, သုးကီၣ်ကး အတၫ်ရၤလီၤပာ်လီၤတၫ်ဘျၢလၢ တၫ်ကဘၣ်ကဲသုးတၫ်ဘျၢအံၤ အကမၤဖျါထီၣ် အမိၫ်လံမိၫ်ၦၫ်အဂီၫ် စးထီၣ်ဖဲမဟါအနံၤန့ၣ် သုးကီၣ်ကးအသုးတဖၣ် ဟးဖီၣ်န့ၫ်ဆူၣ် ၀့ၫ်တကူၣ်ဒီး မါတလ့၀့ၫ် သးစၫ်လၢသးနံၣ်အိၣ် (၁၈)နံၣ်ဒီး (၃၀)နံၣ်တဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲမဟါအနံၤ လါဖ့ၤဘြူၤအါရံၤ(၁၁)သီအနံၤ, ဟါအဆၢကတီၫ် သုးကီၣ်ကးသုးတဖၣ် ဖီၣ်န့ၫ်ဆူၣ်၀ဲ ပိာ်ခွါတဂၤလၢ အိၣ်ဖဲ ၀့ၫ်တကူၣ်, လဲတါ(လှည်းတန်း) အူထိလ့ဂၢၤကျဲ (ဦးထွန်းလင်းခြံလမ်း)အဂ့ၫ် ကမၣ်ယိးကီၫ်ဆၣ်(ကမာရွတ်မြို့နယ်) ကမျၢၫ်ပိာ်မုၣ်တဂၤ တဲ၀ဲန့ၣ်လီၤ.
“မဟါအနံၤ, ဟါ(၆)နၣ်ရံၣ် အဆၢကတီၫ် ကမျၢၫ်ပိာ်ခွါလၢအိၣ်ဖဲ အူထိလ့ဂၢၤကျဲ (ဦးထွန်းလင်းခြံလမ်း)တဂၤ သုးကီၣ်ကး ဖီၣ်၀ဲအဂ့ၫ် တၫ်သ့ၣ်ညါဘၣ်လီၤ. ကီၫ်ဆၣ်(မြို့နယ်)အဂၤတဖၣ် အပူၤစ့ၫ်ကီး သုးကီၣ်ကး ဟးဖီၣ်၀ဲလီၤ. ၦၤသးစၫ်လၢအိၣ်ဖဲအံၤတဖၣ် ဘၣ်ယိၣ်ပျံၤုး၀ဲလၢ တၫ်ကဘၣ်လဲၤကဲသုးလၢ သုးကီၣ်ကး အအိၣ်အဂ့ၫ်” စံး၀ဲန့ၣ်လီၤ.
“တၫ်ထၢန့ၫ်ဆူၣ်သုးဒ်အံၤန့ၣ် မ့ၫ်ဒၣ် သုးဟံးန့ၫ်ဆူၣ် ထံကီၫ်တၫ်စိတၫ်ကမီၤ သုးကီၣ်ကး အသုးခိၣ်နၫ်ဒိၣ်ထီတဖၣ် အတၫ်ကဲဘျုး ကအိၣ်အဂီၫ်ဒီး တၫ်စိတၫ်ကမီၤ ကအိၣ်ဂၢၤဆိးကျၢၫ်လီၤအဂီၫ် ယီၫ်သဘှံးမၤသံကွံာ် သူ၀ဲၦၤသးစၫ်တဖၣ် ခါဆူညါတၫ်အိၣ်မူ” အဂ့ၫ် မါတလ့(မန္တလေး) ၦၤသးစၫ်လၢ သးနံၣ်အိၣ် (၂၃)နံၣ်တဂၤတဲ၀ဲန့ၣ်လီၤ.
တၫ်ဘၣ်ကဲသုး တၫ်ဆၢကတီၫ်တခီ ညီနုၫ်တအါန့ၫ် (၂၄)လါ, မ့မ့ၫ်ၦၤသ့ၦၤဘၣ်တခီ တအါန့ၫ် (၃၆)လါ တၫ်ပာ်ပနီၣ်၀ဲသ့၀ံၤ ထံကီၫ်ဂ့ၫ်ဂီၫ်အူ တၫ်အိၣ်သးမ့ၫ်အိၣ်ထီၣ်န့ၣ် တၫ်ဘၣ်ကဲသုး တၫ်ဆၢကတီၫ် တၫ်မၤအါထီၣ်တုၤလၢ (၅)နံၣ် သ့၀ဲအဂ့ၫ် ပာ်လီၤဃာ်တၫ်ဘျၢန့ၣ်လီၤ.
“ၦၤသးစၫ်အါအါဂီၫ်ဂီၫ်တခီ ကဟဲတုၤဆူ တၫ်ပၢၫ်ဆၢတပၤလီၤ. လီၫ်ခံတဘီန့ၣ် လၢအ၀ဲသ့ၣ်ကဒဲကဒဲအဘၢၣ်စၢၤ တၫ်သဘံၣ်သဘုၣ် ကအိၣ်ထီၣ်လီၤ. မ့ၫ်ဘၣ်တဲလၢအထီ(ရေရှည်)န့ၣ် တၫ်ကဘၣ်ကဲသုး တၫ်ဘျၢလၢ အပာ်လီၤ၀ဲအံၤ ကမ့ၫ်က့ၤတၫ်ဘျၢတခါလၢ ကက့ၤစဲလီၤအကိာ်ယူၫ်ဘိလၢပျံၤလီၤ. ခဲအံၤဒု ကမျၢၫ်တဖၣ် ဘၣ်ကွၫ်ဆၢၣ်မဲာ်ဘၣ် တၫ်ဂ့ၫ်ကီလီၤ. တၫ်ကဘၣ်ကဲသုးတၫ်ဘျၢန့ၣ် ကတဲာ်ကတီၤဆိပာ် ဖးယံာ်လံလၢ လၢညါပဒိၣ်အစိၤလံၤလံၤလံန့ၣ်လီၤ. ဘၣ်ဆၣ်ဒီး အပာ်လီၤ၀ဲ တၫ်ဘျၢခဲအံၤန့ၣ် မ့ၫ်ဒၣ် ကဒုးယၤအဂီၫ် သုးအဂံၫ်အဘါ တအိၣ်လၢၤဘၣ်အဃိလီၤ. တဆိကမိၣ် ဆိကမး၀ဲဘၣ်ဒီး မၤလီၤ၀ဲလီၤ” အဂ့ၫ် လူးဘီၣ်သ့းဒံၣ်မိၣ်ကရဲးတံးပၣ်တံၣ်(လူ့ဘောင်သစ်ဒီမိုကရစ်တစ်ပါတီ) ၦၤပၢၤလီၫ်ဆ့ၣ်နီၤ အူအီၣ်မိစီၣ် (ဦးအောင်မိုးဇော်) တဲ၀ဲဆူ အၣ်ထူခ့ၣ်န့ၣ်လီၤ.
လၢကတီၫ်အံၤ သုးကီၣ်ကးန့ၣ် လၢထံကီၫ်ဒီတဘ့ၣ်အပူၤ သုးဂ့ၫ်၀ီတကပၤ တမၤနၢၤတၫ်လၢၤဘၣ်ဒီး ဖဲသုးဂံၫ်ဘါစှၤလီၤအဆၢကတီၫ် မၤမူထီၣ်က့ၤ၀ဲ တၫ်ဘၣ်ကဲသုးတၫ်ဘျၢ (စစ်မှုထမ်းဥပဒေ) ဒ်သိးအံၤန့ၣ်လီၤ.
ကမျၢၫ်တၫ်ဘၣ်ကဲသုးတၫ်ဘျၢန့ၣ် သုးမီၤစိရိၤလီၫ်လံၤသါရွ့ၣ် တီခိၣ်ရိၣ်မဲ နအဖသုးပဒိၣ်အစိၤ(နအဖစစ်အစိုးရလက်ထက်) ဖဲ၂၀၁၀နံၣ်န့ၣ် ပာ်လီၤဃာ်၀ဲဘၣ်ဆၣ် သုးဆီၣ်ထွဲ ကၠးခဲၣ်ယ့ပၣ်တံၣ် (ကြံ့ခိုင်ရေးပါတီ) ပဒိၣ်ပၢတၫ်အစိၤဒီး ကမျၢၫ်ပဒိၣ် (အရပ်သားအစိုးရ) ပၢတၫ်အစိၤ, (၂)စိၤလၢာ်န့ၣ် တၫ်သူ၀ဲတအိၣ်ဘၣ်. အူသါရွ့ၣ် ပၢတၫ်အစိၤ ထၢနုာ်ဃာ်၀ဲ ကမျၢၫ်တၫ်ကဲသုးတၫ်ဘျၢအပူၤ ဖဲတၫ်ပာ်ပနီၣ် လံာ်တၫ်ကလုၫ်အမုၫ်နံၤန့ၣ် တၫ်စိကမီၤကဘၣ်ပၢအဂ့ၫ် ပာ်ဖျါ၀ဲဘၣ်ဆၣ် လံာ်တၫ်ကလုၫ် (အမိန့်ကြေညာချက်) တဟးထီၣ်၀ဲဘၣ်.
photo:ABN
