ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၂), တီအူကီၫ်ရ့ၣ်, ထီတထူၣ်ကီၫ်ဆၣ် ၀့ၫ်စယဲးကၠံ ဒုးယၤရဲၣ်ကျဲၤအပူၤ တၫ်မၤပိာ်ဖး ဟးဂီၤကွံာ် သုးကီၣ်ကး အတၫ်တိစၢၤမၤစၢၤကျဲအကျိၤ တိၤတဖၣ်အသိး တၫ်ဒွဲၣ်အူမၤဟးဂီၤကွံာ် သုးကီၣ်ကး ခီၣ်ချ့သုးရ့ၣ်(၇၃)သုးကလၢၤ ဂံၫ်ခီၣ်ထံးတၫ်သူၣ်ထီၣ်တဖၣ်၀ံၤ တၫ်မၤန့ၫ်စ့ၫ်ကီး လံာ်လဲၫ်လၢအရ့ဒိၣ်ဒီး ကျိချံၦာ်သၣ်တဖၣ်အဂ့ၫ် ကလံၤထံးနီၫ်ဂံၫ်(၂) သုးဟီၣ်က၀ီၤအဒ့(တောင်ပိုင်း အမှတ် ၂ စစ်ဒေသခွဲ) ပာ်ဖျါဃာ်၀ဲန့ၣ်လီၤ.
ဖဲအပူၤကွံာ် လါဖ့ၤဘြူၤအါရံၤ(၇)သီအနံၤ, ကျိၤကညီၣ်ဒီး စဲလမီပာ်ဖှိၣ်ဒုးယၤရဲၣ်ကျဲၤ (ဖားစည်ဟိန်းသံနဲ့ ဆယ်လမွန် ပူးပေါင်စစ်ဆင်ရေး)အသိး တၫ်လဲၤနုာ်လီၤဒုးမၤန့ၫ်၀ဲ သုးကီၣ်ကး အတၫ်တိစၢၤမၤစၢၤကျဲအကျိၤ မၠိးစိ(မြို့စိုး)တိၤ တၫ်သမံသမိးတြဲၤဒီး တိၤတဖၣ်၀ံၤ တိၤတဖၣ်စ့ၫ်ကီး တၫ်မၤပိာ်ဖးဟးဂီၤကွံာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
တကးဘၣ် တၫ်လဲၤနုာ်လီၤဒုးမၤန့ၫ်စ့ၫ်ကီး သုးကီၣ်ကး အရ့ဒိၣ်ကျဲအကျိၤ တၫ်သမံသမိးတြဲၤလၢအိၣ်ဖဲ နတၣ်ကူ (နှစ်တန့်ကူး)တိၤ ဒီး ယ့ၣ်ကၠံၣ်ခၠီ (ရေကြည်ချောင်း)တိၤတဖၣ်အသိး တၫ်မၤပိာ်ဖးဟးဂီၤကွံာ်စ့ၫ်ကီး နတၣ်ကူ (နှစ်တန့်ကူး)တိၤအဂ့ၫ် ပာ်ဖျါဃာ်၀ဲန့ၣ်လီၤ.
ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA) အတၫ်တီခိၣ်ရိၣ်မဲဃုာ်ဒီး ကမျၢၫ်တၫ်ဒီသဒၢသုးမုၫ်ဒိၣ်(PDF)တဖၣ် လဲၤနုာ်လီၤဒုး၀ဲ စယဲးကၠံ၀့ၫ် နီၫ်ဂံၫ်(၇၃)ခီၣ်ချ့သုးရ့ၣ် သုးကလၢၤ၀ံၤ တကးဘၣ် တၫ်လဲၤနုာ်လီၤဒုးစ့ၫ်ကီး သုးကီၣ်ကးပၢၤကီၫ်သုးကလၢၤဒီး တၫ်ဘံၣ်တၫ်ဘၢသုးတၫ်လီၫ်၀ံၤ တၫ်မၤစၫ်လီၤကွံာ်၀ဲ သုးကီၣ်ကးတၫ်ပၢတၫ်ပြး တၫ်လဲၤသရံးသး (စစ်ကောင်စီ အုပ်ချုပ်ရေးယန္တရား)တဖၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
စယဲးကၠံ၀့ၫ် ဒုးယၤရဲၣ်ကျဲၤအပူၤ သုးကီၣ်ကးတပၤ (၇၀)ဂၤသံ၀ဲ၀ံၤ တၫ်ဘၣ်ဒိဘၣ်ထံးအိၣ်၀ဲ အါအါဂီၫ်ဂီၫ်အသိး တၫ်ပၢၫ်ဆၢသုးပာ်ဖှိၣ်တပၤစ့ၫ်ကီး သံ၀ဲ(၅)ဂၤန့ၣ်လီၤ. ဒုးယၤရဲၣ်ကျဲၤအပူၤ သုးကီၣ်ကးတပၤ ဟဲခးလီၤတၫ်လၢကလံၤကျါ အဘျီ(၈၀)ဘျဲၣ်အဃိ သုးဂ့ၫ်၀ီတၫ်ခးပညိၣ်တမ့ၫ် လီၫ်က၀ီၤကမျၢၫ်အိၣ်ဟံၣ်ဃီတဖၣ် ဟးဂီၤကွံာ်၀ဲအသိး ကမျၢၫ်တနီၤ တၫ်ဘၣ်ဒိဘၣ်ထံးအိၣ်၀ဲန့ၣ်လီၤ.
တၫ်ပၢၫ်ဆၢသုးပာ်ဖှိၣ်တဖၣ် ကမၤအါထီၣ်ဒုးယၤလၢ ပရဲလိာ်ကျိ (ကီၤလိာ်ကျိ) ဟီၣ်က၀ီၤဒီတဘ့ၣ် (စစ်တောင်းမြစ်ဝှမ်းဒေသ)ပူၤ အဃိ လီၫ်က၀ီၤကမျၢၫ်တဖၣ် ကပူၤဖျဲးဒီး တၫ်လီၤဘၣ်ယိၣ်အဂီၫ် ကကတဲာ်ကတီၤဆိပာ် တၫ်လၢအလိၣ်ဘၣ်တဖၣ်အဂ့ၫ် စ့ၫ်ကီး ကလံၤထံးနီၫ်ဂံၫ်(၂)သုးဟီၣ်က၀ီၤအဒ့ (တောင်ပိုင်း အမှတ် ၂ စစ်ဒေသခွဲ) ပာ်ဖျါဃာ်၀ဲလၢ အလံာ်ဘိးဘၣ်ရၤလီၤအပူၤန့ၣ်လီၤ.
photo:JOC
