လါဖ့ၤဘြူၤအါရံၣ်(၁၁)သီအနံၤန့ၣ် မ့ၫ်ကညီဒီကလုာ်အမုၫ်နံၤန့ၣ်လီၤ. ကညီကလုာ်န့ၣ် ဖဲဟီၣ်ခိၣ်တၫ်ဒုးဖးဒိၣ်(၂)ဘျီတဘျီ၀ံၤအလီၫ်ခံ အဆၢကတီၫ် ကညီကီၫ်လၢ ကညီဒီတကလုာ်သးလီ၀ဲန့ၣ် ဃ့ထီၣ်၀ဲလၢ ဘျီၣ်ဒိၣ်အပူၤန့ၣ်လီၤ. ဘၣ်ဆၣ်သနာ်က့ (ဖဆပလ)ပဒိၣ်န့ၣ် တဲ၀ဲလၢ တၫ်ဃ့ထီၣ်ကညီကီၫ်န့ၣ် မ့ၫ်အဲကလံးဟ့ၣ်ဂံၫ်ဟ့ၣ်ဘါ ဆီၣ်တခူထီၣ်အဂ့ၫ်, ကညီကလုာ်န့ၣ်အိၣ်ဒၣ်ထဲ စုတကၠီၤဖိလီၤအဂ့ၫ် ပဲာ်အၢပဲာ်သီ၀ဲလီၤ. လၢတၫ်န့ၣ်အဃိ ဖဲ(၁၉၄၈)နံၣ်, လါဖ့ၤဘြူၤအါရံၣ်(၃)သီအနံၤန့ၣ် ကညီဒီကလုာ်စၢဖှိၣ်ကရၢ (KNU)န့ၣ် ကွဲးဃ့ထီၣ်လံာ်ဆူ (ဖဆပလ)ပဒိၣ်အအိၣ် လၢကဟ့ၣ်ကညီကီၫ်အဂီၫ်န့ၣ်လီၤ.
လၢလံာ်၀ဲန့ၣ်အပူၤ ဒ်သိးတၫ်ကသ့ၣ်ညါဘၣ် (ဖဆပလ)အတၫ်ပာ်သး လၢတလါအတီၫ်ပူၤ, လါမးၡး(၃)သီအနံၤ ပာ်၀ဲလၢအလီၫ်ခံကတၢၫ် တၫ်ကစံးဆၢကဒါက့ၤအဂီၫ်, လံာ်စံးဆၢမ့ၫ်တအိၣ် မ့တမ့ၫ် တၫ်မ့ၫ်ဂ့ၫ်လိာ်လၢ ကဟ့ၣ်ကညီကီၫ်န့ၣ် ကညီဒီကလုာ်တကပၤ ကဘၣ်ထွဲထီၣ်အခီၣ် ဆူညါတခါအဂ့ၫ် ကွဲးဃ့ထီၣ်လံာ်န့ၣ်လီၤ. လံာ်ဃ့ထီၣ်၀ဲန့ၣ် အတယၢၫ်ကဃၢထီၣ်အဂီၫ် ဖဲလါဖ့ၤဘြူၤအါရံၣ်(၁၁)သီအနံၤန့ၣ် ကညီကလုာ်လၢအိၣ်လၢ ကီၫ်ပယီၤအပူၤခဲလၢာ် သးလီကညီကီၫ်အဂ့ၫ် လဲၤထီၣ်ဆူ ၀့ၫ်တကူၣ် ပာ်ဖျါထီၣ်အတၫ်ပာ်သးလီၤ.
တၫ်ပာ်ဖျါထီၣ် တၫ်ပာ်သးအပူၤ ကီၫ်ဆၣ်လၢပာ်ဃုာ်တဖၣ် မ့ၫ်၀ဲ ကီၫ်ပယီၤလာ်ခီတကပၤ ၀့ၫ်တကူၣ် (ရန်ကုန်), ပကိ (ပဲခူး), အ့ၣ်ယၣ်၀တံၣ် (ထံထၣ်စွ့), ကီၫ်ပယီၤကလံၤစိးတကပၤ မၠံးကၠံနါ (မြစ်ကြီးနား), ကလံၤထံးတကပၤ တုၤလၢ ၀့ၫ်မၠံး (မြိတ်မြို့), ယိၤဒိၣ်ကီၫ်စဲၣ်အပူၤ နးခါ (နမ့်ခမ်း), ကိးခဲၣ် (ကွတ်ခိုင်), လါၡိ (လားၡိုး), တီၣ်ကၠံ (တောင်ကြီး), ကၠဲတိၣ် (ကျိုင်းတုံ), ကီၫ်ပယီၤတၫ်ခၢၣ်သးတကပၤ မ့းထံၣ်လၣ် (မိတ္ထီလာ), ခၠီး (ချောက်), ယ့ၣ်နၣ်ခၠီ (ရေနံချောင်း) တၫ်လီၫ်တဖၣ် ကီၫ်ပယီၤဒီတဘ့ၣ်အပူၤ ကညီဖိၦၤနီၫ်ဂံၫ် (၄၅၄၁၀၀)ဂၤဘျဲၣ် ပာ်ဖျါထီၣ် တၫ်ပာ်သးလီၤ. တၫ်ပာ်ဖျါထီၣ်တၫ်ပာ်သးအပူၤ တၫ်ကိးသတြီၤထီၣ်တဖၣ် မ့ၫ်၀ဲ –
- (၁) ဟ့ၣ်ကညီကီၫ် တဘျီဃီ (တၫ်သဘျ့) (ကရင်ပြည်ချက်ခြင်းပေး)
- (၂) ကညီတဘး, ပယီၤတဘး ဒုးနဲၣ်ခဲအံၤ (တၫ်တုၤသိးထဲသိးဒီး ဒံၣ်မိၣ်ကရ့ၣ်စံၣ်) (ကရင်တကျပ် ဗမာတကျပ် ချက်ချင်းပြ)
- (၃) ကလုာ်တၫ်သဘံၣ်သဘုၣ် တလီကီ (လူမျိုးရေး အဓိကရုဏ်းအလိုမရှိ)(ၦၤကိးဂၤအိၣ်လၢတၫ်အဲၣ်တၫ်ကွံ)ဒီး
- (၄) တသးလီ ထံလီၫ်ကီၫ်ပူၤ တၫ်ဒုးတၫ်ယၤ (ပြည်တွင်းစစ်အလိုမရှိ) (တၫ်မုာ်တၫ်ခုၣ်) တဖၣ်န့ၣ်လီၤ.
တၫ်ပာ်ဖျါထီၣ် တၫ်ပာ်သးတဘျီအံၤ ကီၫ်ပယီၤ တၫ်စံၣ်စိၤတဲစိၤအပူၤ မ့ၫ်အဒိၣ်ကတၢၫ်ဒီး တၫ်ပာ်ကဲအိၣ်ကတၢၫ် တၫ်ပာ်ဖျါထီၣ်တၫ်ပာ်သးအဂ့ၫ် အိၣ်တ့ၫ်လၢ တၫ်စံၣ်စိၤတဲစိၤအပူၤန့ၣ်လီၤ.
ဖဲ(၁၉၅၃)နံၣ် လါနိၣ်၀့ဘၢၣ်(၂၃)သီ တၫ်မၤ၀ဲ KNU ခီကရဲးတၫ်အိၣ်ဖှိၣ်ဖဲ ဖၣ်ပူၣ်န့ၣ် လါဖ့ၤဘြူၤအါရံၣ်(၁၁)သီအနံၤန့ၣ် တၫ်ကပာ်ပနီၣ်လၢ ကညီဒီကလုာ်အမုၫ်နံၤအဂီၫ် အ့ၣ်ယၣ်၀တံၣ်(ထံထၣ်စွ့) နီၫ်ဂံၫ်(၁) (ဧရာဝတီမြစ်ဝကျွန်းပေါ် အမှတ်(၁)ခရိုင်) ကီၫ်ရ့ၣ်ခိၣ် မါကၠီၣ်အ့(မန်းကျော်အေး) ဆှၢနုာ်၀ဲ၀ံၤ သုးတြိၤခိၣ် သုးခိၣ်ကျၢၫ်ဂီၫ်ဂ့ၫ်ကီၫ်ထူ တူၫ်လိာ်၀ဲအဃိ လါဖ့ၤဘြူၤအါရံၣ်(၁၁)သီအနံၤ ကဲထီၣ်၀ဲ ကညီဒီကလုာ်အမုၫ်နံၤ၀ံၤ လၢ(၂၀၂၄)နံၣ်, လါဖ့ၤဘြူၤအါရံၣ်(၁၁)သီအနံၤန့ၣ် ကညီဒီကလုာ်အမုၫ်နံၤ တုၤဃီၤ၀ဲလၢ(၇၆)နံၣ်လံန့ၣ်လီၤ.
