စးထီၣ်လၢ ၂၀၂၄နံၣ်, လါယနူၤအါရံၤ(၁)သီဒီး တုၤလီၤလၢ လါဖ့ၤဘြူၤအါရံၤ(၇)သီအတီၫ်ပူၤ သုးကီၣ်ကးကလံၤကျါတၫ်ဒုးတဖၣ်အဃိ ဖိသၣ်လၢသးနံၣ်အိၣ်(၁၈)နံၣ်ဆူအဖီလာ် (၂၀)ဂၤသံတ့ၫ်၀ဲအဂ့ၫ် တၫ်မၤစၢၤထံရူၫ်ကီၫ်သဲး ပှၤလီၤဃိၣ်ဖိကရၢ AAPP ထုးထီၣ်ပာ်ဖျါဃာ်၀ဲန့ၣ်လီၤ. ဖိသၣ်လၢသးနံၣ်အိၣ်(၁၈)နံၣ်ဆူအဖီလာ် သံတ့ၫ်(၂၀)ဂၤအကျါ ဖိသၣ်ပိာ်မုၣ်(၄)ဂၤဒီး ဖိသၣ်ပိာ်ခွါ(၁၆)ဂၤ ပာ်ဃုာ်၀ဲအဂ့ၫ် စံး၀ဲန့ၣ်လီၤ.
လါဖ့ၤဘြူၤအါရံၤ(၅)သီအနံၤ, သုးကီၣ်ကးလဲၤတ့ၫ်လီၤမ့ၣ်ပိၫ်လၢကလံၤကျါဖဲ ကရ့ၣ်နံၣ်ကီၫ်စဲၣ်, ဒံၣ်မီဆိၣ်ကီၫ်ဆၣ်, ဒီစံၣ်အံၣ်သ၀ီဒီး လွဲၫ်နါဖးသ၀ီ တၫ်သိၣ်လိကၠိတဖၣ်အပူၤ အဘျီ(၁၀)ဃၣ်ဃၣ်န့ၣ်လီၤ. ဒီစံၣ်အံၣ်သ၀ီ မူၣ်ကၠိၣ်ကၠိဒီး တီၤခၢၣ်သးကၠိ(၂)ဖျၢၣ် မ့ၣ်ပိၫ်လဲၤလီၤတဲာ် ပိာ်ဖးထီၣ်၀ဲဒၣ်အဃိ ဖိသၣ်လၢအထီၣ်ကၠိတဖၣ် လၢအမ့ၫ် ခိၣ်အဲၣ်လၢၫ်သး (ခွန်းအယ်လယ်သ), ခိၣ်အဲၣ်ဒိၣ်ထူ (ခွန်းအယ်ဒိုထူး), ခိၣ်စါလဲၫ် (ခွန်းစန်းလှိုင်) ဒီး ခိၣ်ခရံာ်စထိၣ်ဖၢၣ် (ခွန်းခရစ္စတိုဖာ)တဖၣ် မ့ၣ်ပိၫ်အက့အခီဘၣ်ဒီး သံ၀ဲ၀ံၤ တကးဒံးဘၣ် ဖိသၣ်အဂၤ(၂၇)ဂၤစ့ၫ်ကီး ဘၣ်ဒိဘၣ်ထံး၀ဲအဂ့ၫ် AAPP စံး၀ဲန့ၣ်လီၤ.
မ့မ့ၫ်လၢသုးကီၣ်ကးအစုတီၤဖီလာ် တၫ်ကစီၣ်သန့တဖၣ်တခီ တၫ်လဲၤတ့ၫ်လီၤမ့ၣ်ပိၫ်ဖဲ ဒံၣ်မီဆိၣ်ကီၫ်ဆၣ်အပူၤတအိၣ်၀ဲဘၣ်ဒီး ကလံၤကျါတၫ်လဲၤဒုးအီၤဒီးသံတဖၣ်အံၤ မ့ၫ်ဒၣ်တၫ်ကစီၣ်အကမၣ်လီၤအဂ့ၫ် ဘိးဘၣ်ရၤလီၤဃာ်တၫ်ကစီၣ်ဖဲ လါဖ့ၤဘြူၤအါရံၤ(၅)သီအနံၤ, ဟါအဆၢကတီၫ်န့ၣ်လီၤ.
တၫ်မၤစၢၤထံရူၫ်ကီၫ်သဲး ပှၤလီၤဃိၣ်ဖိကရၢ AAPP အတၫ်မၤနီၣ်ထၢဖှိၣ်လၢ တုၤလၢလါဖ့ၤဘြူၤအါရံၤ(၇)သီအနံၤအဖီခိၣ် သုးဟံးန့ၫ်ဆူၣ် ထံကီၫ်တၫ်စိတၫ်ကမီၤ၀ံၤအလီၫ်ခံ သုးကီၣ်ကးဒီး အစုတီၤဖီလာ်သုးတဖၣ်အဃိ ပှၤလၢဟူးဂဲၤလၢဒံၣ်မိၣ်ကရ့ၣ်စံၣ်ဂ့ၫ်၀ီတဖၣ်ဒီး လီၫ်က၀ီၤကမျၢၫ် (၄၅၀၀)ဂၤသံတ့ၫ်၀ဲဒီး တကးဒံးဘၣ် ပှၤအဂၤ(၁၀၀)လၢတၫ်ပာ်ပနီၣ်အီၤတသ့တဖၣ်စ့ၫ်ကီး တၫ်မၤသံအီၤအဂ့ၫ် စံး၀ဲန့ၣ်လီၤ.
သုးကီၣ်ကးအဃိ (၁)လါဘျဲၣ်အတီၫ်ပူၤ ဖိသၣ်(၂၀)ဂၤသံ၀ဲအဂ့ၫ် AAPP တဲ၀ဲ
