သုးကီၣ်ကး လဲၤတ့ၫ်လီၤမ့ၣ်ပိၫ်လၢကဘီယူၤအဃိ ပှၤကၠိဖိလၢသံတဖၣ် ဘၣ်တၫ်ခူၣ်လီၤခူသူၣ်အီၤ

ကီၫ်ကရ့ၣ်နံၣ် ဒံၣ်မီဆိၣ် အလီၫ်ခံတကပၤ သုးကီၣ်ကး ဟဲတ့ၫ်လီၤမ့ၣ်ပိၫ်လၢကဘီယူၤ ဖဲတၫ်သိၣ်လိကၠိပူၤအဃိ ပှၤကၠိဖိလၢဘၣ်သံတဖၣ် တၫ်ဘံၣ်တၫ်ဘၢအဖီခိၣ် ဖဲလါဖ့ၤဘြူၤအါရံၣ်(၆)သီအနံၤ ဘၣ်တၫ်ခူၣ်လီၤခူသူၣ်အီၤလၢ တၫ်ခူသူၣ်အပူၤအဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်အအိၣ်န့ၣ်လီၤ. သုးကီၣ်ကးန့ၣ် လၢဒံၣ်မီဆိၣ်အလီၫ်ခံ တၫ်လီၫ်ခံတီၤ ဖဲအပူၤကွံာ်လါဖ့ၤဘြူၤအါရံၣ်(၅)သီအနံၤ လဲၤတ့ၫ်လီၤမ့ၣ်ပိၫ်လၢ ကဘီယူၤအဃိ ဖိသၣ်အိၣ်လၢကၠိပူၤမၤလိလံာ်(၄)ဂၤ ဘၣ်သံ၀ံၤ ကၠိဖိမုၣ်ခွါခဲလၢာ်(၂၈)ဂၤ ဘၣ်ဒိဘၣ်ထံး၀ဲန့ၣ်လီၤ.

ပှၤဘၣ်ဒိဘၣ်ထံးအကျါ ပှၤလၢဘၣ်ဒိဘၣ်ထံးနးနးကျံးကျံးတဖၣ်တခီ ဘၣ်တၫ်ဆှၢအီၤလၢ တၫ်ဆါဟံၣ်န့ၣ်လီၤ. ပှၤကၠိဖိ(၄)ဂၤလၢ ဘၣ်သံတခီ ဖဲလါဖ့ၤဘြူၤအါရံၣ်(၆)သီနံၤ ဟါလီၤခီအဆၢကတီၫ ဘၣတၫခူၣလီၤအီၤလၢ အဆိအချ့န့ၣ်လီၤ. ပှၤဘၣ်ယိၣ်လၢကတ့ၫ်လီၤကဒီးမ့ၣ်ပိၫ်အဃိလီၤ. ပှၤခူၣ်လီၤအီၤဘၣ်ဆၣ် တၫ်ခူၣ်လီၤအီၤဂ့ၤဂ့ၤ၀ါ၀ါတန့ၫ်ဘၣ်. မ့ၫ်လၢတၫ်ဘံၣ်တၫ်ဘၢအဃိလီၤအဂ့ၫ် ကၠိသရၣ်မုၣ်လၢဘၣ်မူဘၣ်ဒါတဂၤ တဲ၀ဲလီၤ.

သုးကီၣ်ကးန့ၣ် တၫ်လီၫ်လၢတဘၣ်ထွဲဒီးသုးဂ့ၫ်၀ီ လၢအမ့ၫ် ကၠိတၫ်သိၣ်လိအလီၫ်တဖၣ်, တၫ်ဆါဟံၣ်တဖၣ် တ့ၫ်လီၤ၀ဲလၢမ့ၣ်ပိၫ်, ခးလီၤ၀ဲလၢကျိဖးဒိၣ်တဖၣ်အဃိ နီၫ်သးဂ့ၫ်၀ီတကပၤ တၫ်ဘံၣ်တၫ်ဘၢ တအိၣ်လၢၤဘၣ်ဒီး လီၫ်က၀ီၤဖိတဖၣ် တမံဘၣ်မုာ်မုာ်ဘၣ်အဂ့ၫ် တၫ်သ့ၣ်ညါဘၣ်လီၤ.

ကလံၤကျါတၫ်ခးလီၤတၫ်အပူၤ G-7 ကၠိဖိပိာ်မုၣ်တဂၤလၢအမ့ၫ် နီၫ်ဘျူးမူတဲ၀ဲလၢ “တချူးတၫ်တ့ၫ်လီၤမ့ၣ်ပိၫ်အကတီၫ် လၢကၠိန့ၣ် ကၠိဖိတဖၣ်ရဲၣ်လီၤအသးလီၤ. ဖဲန့ၣ်အကတီၫ် ဒရိ(ဒရုန်း)စ့ၫ်ကီးဟဲလီၤ. ဖဲမၤလိလံာ်အကတီၫ် ကဘီယူၤဟဲတ့ၫ်လီၤမ့ၣ်ပိၫ် တဘျီဃီ ပှၤဘၣ်ဃ့ၫ်ပြံဃ့ၫ်ပြါဒီး ဖဲန့ၣ်အကတီၫ် ပျံၤတၫ်ဖုးတၫ်ဒိၣ်မးအဂ့ၫ်” တဲ၀ဲန့ၣ်လီၤ.

သုးကီၣ်ကး လဲၤတ့ၫ်လီၤမ့ၣ်ပိၫ်လၢကဘီယူၤအဃိ ပှၤကၠိဖိလၢသံတဖၣ် ဘၣ်တၫ်ခူၣ်လီၤခူသူၣ်အီၤ